Arquivo de noticias do CCG

O Álbum de Galicia, colección de biografías do Consello da Cultura Galega (CCG), incorpora hoxe a entrada de Elsa Sánchez de Oesterheld (Bos Aires, 1925-2015), defensora dos dereitos humanos, integrante da Asociación Civil Avoas de Praza Maio. Dedicou a súa vida a procurar aos seus netos, nados en cativerio, despois do golpe militar de 1976 en Arxentina, co que perdeu á maior parte da súa familia. Carme Vidal é a autora da entrada que está dispoñible para consulta no web do CCG.

Este 1 de outubro cúmprense 89 anos da aprobación do dereito das mulleres ao voto. Unha efeméride na que o Consello da Cultura Galega (CCG) pon en rede a web do Centro de Documentación en Igualdade e Feminismos, o CDIF, o cuarto arquivo que o CCG creou en 2019. É un “Arquivo que, ademais de inventariar, documentar, preservar e dispoñeros fondos, debe actuar como incitador á reflexión, divulgador de contidos e dinamizador da sociedade galega” destaca a presidenta, Rosario Álvarez. O centro, que ten a súa orixe nunha comisión temporal creada en 2005, ten como directora a María Xosé Porteiro.

“Olladas de mulleres no mundo” é o título dun ciclo de cinema co que o Consello da Cultura Galega(CCG) e o Centro Galego de Artes da Imaxe (CGAI) pretenden amosar o traballo de actrices, directoras ou produtoras de cine. Arrinca o 8 de marzo, o Día da Muller Traballadora, e permite ver a través de proxeccións e coloquios o cinema feito tanto en Galicia coma noutras partes do mundo desde unha perspectiva de xénero. As galegas Diana Toucedo e Xisela Franco xunto coa realizadora belga Chantal Akerman, recentemente falecida, conforman o programa desta edición.

“A presenza da muller no ámbito da fotografía en Galicia é historicamente moi escasa”, destacou María Xosé Agra na inauguración da xornada “Mary Quintero. A luz que alumea a vida”, que tivo lugar hoxe no Consello da Cultura Galega (CCG). A cita analizou e comentou a traxectoria desta creadora que fixo a súa primeira exposición con 16 anos e foi unha innovadora na técnica fotográfica. O seu traballo está presente tamén a través dunha exposición montada nas instalacións do Consello ata a vindeira semana. O presidente do CCG, Ramón Villares, salientou na inauguración o traballo da Comisión de Igualdade e a intención de seguir incidindo na análise da fotografía como un modo de entender a acción colectiva. Anunciouse tamén que na vindeira edición a homenaxeada será Kathleen Nora March (Nova York, EEUU) .

A luz que alumea a vida é o título da xornada coa que a Comisión de Igualdade do Consello da Cultura Galega (CCG) quere centrar o foco nunha fotógrafa viguesa tan descoñecida para o público como destacada foi na súa profesión. Mary Quintero (Melide, 1931) é unha das pioneiras da fotografía profesional en Galicia e unha retratista preocupada pola iluminación e uso de novas técnicas. A cita terá lugar mañá xoves en Santiago co obxectivo de visibilizar o traballo de mulleres que, como ela, están a pasar desapercibidas no mundo da imaxe. A xornada complétase cunha exposición nas instalacións do CCG que exhibe algunhas das fotografías e materiais que marcaron a súa traxectoria e que comentará a propia Quintero.

Os retratos que fixo no seu estudo permiten trazar a crónica dunha época das cidades de Lugo e de Vigo. Chámase Mary Quintero (Melide, 1931) e é unha das pioneiras da fotografía profesional en Galicia. O seu traballo e a súa traxectoria centran a xornada A luz que alumea a vida, que lle dedica a Comisión de Igualdade do Consello da Cultura Galega o vindeiro 29 de outubro. Profesionais dos medios de comunicación, da fotografía e do mundo da imaxe contextualizarán o seu traballo nunha sesión que servirá tamén de homenaxe. Un dos momentos máis destacados será o percorrido vital e profesional que Quintero realizará a través das súas obras nunha exposición montada para a ocasión. A inscrición é gratuíta e pódese facer a través da páxina web da institución.

primeira xornada dos XV Encontros para Normalización Lingüística subliñou a necesidade dun activo compromiso dos poderes públicos e a adhesión e a vontade da cidadanía nun amplo compromiso social e politico para unha acción eficaz e sostida en materia lingüística. O programa analizou o proceso desenvolvido desde a aprobación da Lei de Normalización Lingüística de Galicia (1983) e prestou tamén atención á situación en Catalunya e Euskadi. O acto inaugural, presidido por Ramón Villares, presidente do Consello da Cultura Galega, contou coa asistencia de Valentín García Gómez, Secretario Xeral de Política Lingüística, Henirque Monteagudo, coordinador do Centro de Documentación Sociolingüística-CCG, E Nel Vidal en representación das Coordinadoras de Normalización da Lingua. Os Encontros, organizados ininterrumpidamente desde 1998 polo Consello da Cultura Galega, e aos que asisten cen estudiosos e especialistas, finalziarán hoxe con especial atención á comunidade educativa.

Cen especialistas inscribíronse nos XV Encontros para a Normalización Lingüística, que terán lugar os días 18 e 19 de abril organizados polo Consello da Cultura Galega a través do seu Centro para a Documentación Sociolingüística de Galicia (CDSG). O programa analizará as luces e as sombras do traballo desenvolvido na normalización e promoción do galego durante as tres últimas décadas, logo da aprobación da Lei de Normalización Lingüística de Galicia (1983). Considerarase tamén a situación do galego no ensino e na comunidade educativa, o traballo colaborativo e diferentes propostas aplicables na actualidade. Os Encontros, coordinados por Henrique Monteagudo e Susana Mayo, contan coa colaboración da Secretaría Xeral de Política Lingüística e as Coordinadoras de Traballadores e Traballadoras de Normalización da Lingua e dos Equipos de Normalización e Dinamización Lingüística. Serán inaugurados o xoves día 18 ás 10 horas no Consello da Cultura Galega.

A Comisión de Igualdade do Consello da Cultura Galega organizou e convocou para o xoves 25 de outubro a xornada “Tereixa Navaza, a voz da liberdade”, unha emotiva homenaxe á contribución da comunicadora e xornalista, nomeadamernte na radio e na televisión. O recoñecemento vai asemade para o labor da primeira xeración de mulleres xornalistas profesionais. Vinte estudosos e xornalistas desenvolverán o programa, coordinado por Ana Romaní Blanco e Carme Vidal Lage, no que participa tamén a Universidade de Santiago de Compostela. O programa abordou a dimensión científico-profesional, (O compromiso da información) e a da memoria (A información con xénero).

Co gallo da celebración do Día Internacional da Muller, o Consello da Cultura Galega (CCG) presenta esta tarde, ás 17:30, un novo grupo de traballo da institución: a Comisión Técnica de Xénero, pertencente á Sección de Filosofía e Pensamento. O coordinador da Sección, o profesor e teólogo Andrés Torres Queiruga, destaca que a idea de crear esta Comisión veu da necesidade de encher o baleiro existente no campo do pensamento sobre estudos de xénero en Galicia. A relevancia e a destacada presenza da muller na sociedade facía necesario, para esta institución, a creación dun grupo específico dentro da Sección de Filosofía e Pensamento que dese conta da historia e situación da muller na Comunidade.

Co gallo da celebración do Día Internacional da Muller, o Consello da Cultura Galega (CCG) presentará este martes, día 8, un novo grupo de traballo da institución: a Comisión Técnica de Xénero, pertencente á Sección de Filosofía e Pensamento.