Arquivo de noticias do CCG

Galicia como destino turístico, nomeadamente turismo cultural, está á alza. Os últimos datos do INE constatan o incremento das noites hoteleiras na nosa comunidade nun 5,7 % con respecto ao ano anterior. Buscar un equilibrio entre a demanda turística cada vez máis numerosa e a xestión patrimonial é o obxectivo das xornadas “Turismo masivo e patrimonio”, que comezan mañá no Consello da Cultura Galega. Ramón Villares, presidente do CCG; María del Carmen Martínez Ínsua, directora xeral de Patrimonio Cultural; Nava Castro Domínguez, directora de Turismo de Galicia; Rebeca Blanco Rotea, coordinadora da Sección de Patrimonio e Bens Culturais do CCG, e o coordinador da cita, Carlos Nárdiz, son os encargados da inauguración dunhas xornadas que se poden seguir en directo desde o web da institución.

“É preciso un maior esforzo e unha decidida aposta gubernamental para acadar os compromisos adquiridos na Carta Europea para as Linguas Rexionais ou minoritarias” explicou Rosario Álvarez, vicepresidenta do Consello da Cultura Galega (CCG) na lectura das conclusións do “Foro de debate sobre a Carta Europea para as Linguas Rexionais ou Minoritarias”. Unha cita que xuntou, por primeira vez, a unha trintena de representantes de todas as linguas que se falan en España.

Representantes de todas as linguas existentes en España, con recoñecemento oficial ou sen el, reúnense por primeira vez no Consello da Cultura Galega (CCG). Unha cita pioneira que conta coa colaboración do Consello de Europa e que celebra os vinte e cinco anos da aprobación dun documento clave: a Carta Europea para as Linguas Rexionais ou Minoritarias. Ramón Villares, presidente do CCG; Víctor Freixanes, presidente da Real Academia Galega; Sixto Molina, xefe da Secretaría da Carta Europea para as linguas do Consello de Europa; Valentín García, secretario xeral de Política Lingüística, e o coordinador do foro, Fernando Ramallo, inaugurarán este encontro que se pode seguir en directo desde o web do CCG.

O Consello da Cultura Galega (CCG) lamenta a perda do notario e intelectual galego Alfonzo Zulueta de Haz, que finou onte en Vigo aos 93 anos. Zulueta asumiu a presidencia do CCG tras a morte de Carlos Casares, en 2002, e desempeñou o cargo ata o ano 2006, en que foi elixido Ramón Villares. A institución destaca a súa entrega en prol da cultura galega, así como a súa sensibilidade no ámbito social. O enterro será mañá despois da misa que terá lugar ás 12:00 horas no tanatorio de Emorvisa mentres que o funeral será pola tarde (20:00 horas) na igrexa dos Apóstolos.

Neste 2017 cúmprense vinte e cinco anos da aprobación da Carta Europea para as Linguas Rexionais ou Minoritarias. Un documento clave que se analizará no marco dun foro de debate que o Consello da Cultura Galega (CCG) organiza coa colaboración do Consello de Europa. A cita terá lugar este xoves e venres e nela participarán unha trintena de especialistas que permitirá coñecer a situación de todas as linguas existentes en España. A cita poderase seguir en directo desde o web do CCG.

Cúmprense cen anos de que un mozo Albert Einstein vise publicada unha das obras coas que revolucionou o mundo científico. Na primavera de 1917 saía do prelo “Teoría da relatividade” (Über die spezielle und die allgemeine Relativitätstheorie). Desde entón sucedéronse máis de 407 edicións e a tradución a varias linguas. Agora tamén en galego grazas ao Consello da Cultura Galega (CCG). Esta mañá o presidente da institución, Ramón Villares, canda os dous responsables da publicación, Jorge Mira e Francisco Díaz-Fierros, presentaron a edición galega que inclúe a obra revisada, a edición facsímil e dous estudos que contextualizan a obra no mundo científico e no eido galego. A obra pode descargarse de balde desde o web consellodacultura.gal.

Convocatoria de bolsas na Casa Velázquez. 2017

Os relatorios dunha gaiteira e traballadora cultural como Cristina Pato e dun catedrático en Teoría do Sinal como Domingo Docampo serviron de indicadores para amosar cara onde vai a industria cultural galega. A diversificación da creación canda a un mercado desenvolvido tecnoloxicamente son necesarios para situar a nosa cultura no mundo global. Esta foi a idea que se abordou desde múltiples puntos de vista na xornada do Consello da Cultura Galega “A industria cultural galega no horizonte 2025” coordinada por Xosé López, Víctor Freixanes xunto con Berta García Orosa e na que participaron preto dunha vintena de teóricos e creadores.

A necesidade dunha nova educación para saber xestionar os datos, facer un gran pacto social pola cultura e unha reorganización política do sistema de medios foron algunhas das ideas que se debateron na xornada “A industria cultural galega no horizonte 2025”. O presidente do Consello da Cultura Galega (CCG), Ramón Villares, destacou na inauguración a relevancia deste tipo de encontros “que dan continuidade a un traballo de cooperación institucional e onde a cultura ten un carácter transversal”. Canda el, o presidente da Real Academia Galega e un dos coordinadores da xornada, Víctor Freixanes, incidiu na necesidade deste tipo de debate para sentar piares de futuro. A xornada remata mañá mércores no CCG e pode seguirse en directo a través do web consellodacultura.gal.

Cos cambios tecnolóxicos mudaron tamén as formas de facer cultura. Sobre todo isto falarán creadores e teóricos como Margarita Ledo, Cristina Pato, Miquel de Moragas ou Bernardo Díaz Nosty no marco da xornada “A industria cultural galega no horizonte 2025”. O presidente do Consello da Cultura Galega, Ramón Villares; o secretario xeral de Cultura, Anxo Lorenzo, e o presidente da Real Academia Galega, Víctor Freixanes, inaugurarán esta cita que se desenvolve ata o mércores na sede da institución e que se pode seguir en directo a través do sitio web consellodacultura.gal.

Amazige, árabe dariya, aragonés, aranés, asturiano, caló, catalán, éuscaro, fala, galego, leonés e portugués son, por orde alfabética, as linguas rexionais ou minoritarias existentes en España. Representantes de todas e cada unha delas estarán presentes no "Foro de debate da Carta Europea para as Linguas Rexioniais ou Minoritarias" que o Consello da Cultura Galega organiza en colaboración co Consello de Europa. O encontro, que terá lugar os días 29 e 30 de xuño en Santiago, analiza o impacto do cumprimento da Carta en España cando se cumpren vinte e cinco anos da súa aprobación.

O plan estratéxico da administración nacional e rexistros americanos (NARA), a dixitalización do museo do Real Madrid ou do arquivo Espacio P son algúns dos casos que se analizaron esta mañá no Consello da Cultura Galega (CCG) no marco da xornada “Dixitalización de arquivos. Tendencias, procesos e plans de execución”. A cita coordinada polo profesor Xosé López serviu para destacar a importancia da tecnoloxía tanto nos procesos como nos mecanismos de difusión, así como a necesidade de establecer grupos de traballo interdisciplinares para que o coñecemento que se rexistra nos arquivos chegue á cidadanía.

O Consello da Cultura Galega (CCG) acolle este xoves unha xornada que analiza a dixitalización dos arquivos en dúas direccións: a primeira céntrase en coñecer o proceso, e a segunda busca afondar como eses documentos xa dixitalizados se poñen a disposición da cidadanía. A cita será inaugurada por Xosé López, secretario da institución e coordinador desta xornada. Aínda que non quedan prazas dispoñibles, poderase seguir en directo a través do web da institución.

Marilar Aleixandre e Bieito Iglesias participan este mércores (18:30 horas) na mesa redonda “Carlos Casares e a proxección exterior da nosa literatura”. A actividade, presentada por Dolores Vilavedra e Luís G. Tosar, está organizada polo Consello da Cultura Galega e o Centro Pen de Galicia. A cita pretende recuperar o papel que Casares, homenaxeado este ano no Día das Letras Galegas, desenvolveu como embaixador da cultura e da nosa literatura.

Viana do Castelo acolle ata hoxe “O Fórum Internacional de Gestão Artística e Cultural (FIGAC)”, unha proposta que organiza o Instituto Politécnico de Viana do Castelo para proporcionar a profesionais e estudantes do sector cultural e creativo a posta en común de reflexións sobre a xestión destes eidos na actualidade. Alí estará presente Hakan Casares, responsable do Observatorio da Cultura Galega que ofrecerá este serán (16:30 hora portuguesa) un relatorio titulado “A estatística cultural e a planificación de políticas culturais”.

O persoal que traballa nos arquivos públicos galegos é maioritariamente feminino pero escasamente visibilizado e a forma de traballar cos documentos que atesouran non incorpora unha perspectiva de xénero. Estas son algunhas das características da situación dos arquivos públicos galegos en relación coa situación das mulleres e que se analizaba na cuarta edición da xornada “Xénero e Documentación”. A actividade da Comisión de Igualdade do Consello da Cultura Galega foi coordinada por Dolores Pereira e os materiais alí presentados, así como os vídeos das intervencións, pódense consultar dese o sitio web da institución.

Custodian os arquivos públicos de Galicia documentos de mulleres ou sobre mulleres? Custodian ou interésanse por custodiar documentos vinculados co movemento feminista? Estas son algunhas das preguntas ás que quere responder a cuarta edición da xornada “Xénero e Documentación”, que organiza a Comisión de Igualdade do Consello da Cultura Galega. A cita, que terá lugar mañá xoves, será inaugurada pola coordinadora da comisión, María Xosé Porteiro, e pola coordinadora da xornada, Dolores Pereira e poderase seguir en directo a través do web da institución.

O século XIX foi clave no desenvolvemento da química. As teorías científicas transformáronse en rendementos económicos no campo da agricultura, con produtores máis sabedores da produtividade vexetal que lles permitiu aumentar os rendementos da terra; tamén na industria, coa mellora dos antigos obradoiros artesáns, así como no eido da saúde humana; todo isto influíu no benestar das sociedades que acadaron niveis nunca conseguidos. Sobre esta época trata o volume “Os comezos da química moderna en Galicia e a súa proxección no século XIX. Bicentenario da fundación do Colexio de Farmacia de Santiago de Compostela (1815-2015)”, que presenta mañá mércores, ás 19:00 horas, o Consello da Cultura Galega e a Academia de Farmacia de Galicia no Salón de Graos da Facultade de Farmacia. Intervirán Francisco Díaz-Fierros Viqueira, Xosé A. Fraga e José Mª. S. Sanmartín Miguez, como autores do libro, e Manuel Puga Pereira, como presidente da Academia de Farmacia de Galicia.

Con cinco edicións ás súas costas, a proposta “No bico un cantar” consolídase como unha referencia didáctica e musical para dar a coñecer a nosa literatura entre a mocidade. A praza da Catedral de Mondoñedo acolleu este serán o concerto en que cincocentos nenos e nenas cantaron cancións de poetas como Álvaro Cunqueiro, Aquilino Iglesias Alvariño ou Manuel Leiras Pulpeiro. A cita contou coa asistencia de Rosario Álvarez, vicepresidenta do Consello da Cultura Galega (CCG), Anxo Lorenzo, secretario xeral de Cultura, e Elena Candia, alcaldesa de Mondoñedo, que destacaron o valor cultural e social desta iniciativa do CCG e da Consellería, e anunciaron que o vindeiro ano a cita terá lugar en Betanzos e xirará arredor dos alalás. O concerto supuxo tamén a estrea da versión musical dos poemas “Neniae” e “¡Non o sei!” realizados polo compositor compostelán Nico Casal.

As cancións de poetas mindonienses como Álvaro Cunqueiro, Aquilino Iglesias Alvariño ou Manuel Leiras Pulpeiro protagonizan a quinta edición de “No bico un cantar”, un concerto de carácter didáctico e cultural que xunta música, poesía e mocidade. A cita contará coa presenza de Rosario Álvarez, vicepresidenta do Consello da Cultura Galega, Anxo Lorenzo, secretario xeral de Cultura, e Elena Candia, alcaldesa de Mondoñedo. A cita xuntará na praza da Catedral, ás 17:30 horas, un gran coro de cincocentos nenos e nenas chegados dos conservatorios profesionais e das escolas de música de toda Galicia, dirixidos por Maximino Zumalave. Nel estrearase a versión musical dos poemas “Neniae” e “¡Non o sei!” a cargo do compositor compostelán Nico Casal.