Arquivo de noticias do CCG

O Encontro “Conexôes IV. A literatura brasileira hoxe. Diálogos Galiza-Brasil”, o primeiro que se desenvolve en Europa, subliñou a necesidade dun maior coñecemento, de “deixar de vivirmos de costas” e dunha meirande cooperación entre dous espazos con tantos puntos de contacto, nomeadamente nos camiños da lingua. Organizado polo Consello da Cultura Galega (CCG) e Itaú Cultural (Brasil), o Encontro pretende establecer un diálogo entre escritores brasileiros e expertos brasilianistas sobre as dinámicas actuais da literatura brasileira e contrastar esa situación con escritores, críticos, editores, docentes e tradutores galegos. As sesións, que finalizarán mañá día 19, poden seguirse en directo, a través da canle de difusión de eventos do CCG, na súa web: www.consellodacultura.org

O Presidente do Consello da Cultura Galega, Ramón Villares, acompañado pola Comisión Executiva, entregou hoxe ao Conselleiro de Cultura e Turismo da Xunta de Galicia, Roberto Varela, o “Informe sobre a regulación e a organización e funcionamento das fundacións culturais de interese galego”. O informe fora solicitado polo Conselleiro de Cultura e elaborado por unha Comisión Técnica Temporal creada no Consello da Cultura Galega a finais de 2010. O Pleno da institución aprobou o pasado 26 de xullo o informe, que, entre outras propostas, recomenda a centralización do exercicio do Protectorado nun só organismo administrativo con maior capacidade de intervención e regulación. O documento ofrece unha reflexión xeral sobre a situación e os principais problemas que presenta o sector fundacional en Galicia e recomenda unha reforma do actual marco normativo para intentar mellorar a actual regulación das fundacións de interese galego, en particular das culturais, e a súa organización, funcionamento e actuación. Galicia conta con 520 fundacións de interese galego. O noventa por cento foron creadas a partir de 1983.

O Consello da Cultura Galega (CCG) e o Centro Galego de Artes da Imaxe (CGAI) inaugurarron hoxe na sala do peirao de Curuxeiras-Ferrol a exposición itinerante “OS ADEUSES, 73 imaxes da emigración galega (1957-1963)” captadas polo fotoxornalista Alberto Martí. O acto contaou coas presenzas de Ramón Villares, presidente do CCG, Guillermo Escrigas, director do CGAI, Ángel María del Real, Presidente da Autoridade Portuaria de Ferrol-San Cibrao, e Alberto Martí. A exposición estará en Ferrol ata o 5 de novembro. Con anterioridade puido verse na Coruña, Vigo, Santiago de Compostela e A Pobra do Caramiñal.

A presentación do informe A SITUACIÓN SOCIOCULTURAL DOS CONCELLOS GALEGOS DE MENOS DE 50.000 HABITANTES. II MAPA CULTURAL DE GALICIA, publicado polo Consello da Cultura Galega (CCG), serviu para chamar a atención sobre a necesidade de adecuar mellor recursos e obxectivos en tempos de crise. Tamén para insistir no feito de que as políticas culturais non deben ser vistas como gasto senón como investimento. Nesa liña coincidiron o Presidente do CCG, Ramón Villares, o director do informe, Xesús A.. Lage Picos, e o Presidente da Federación Galega de Municipios e Provincias (FEGAMP), Carlos Fernández. O informe constata o feito de que nos inicios do 2009 “a cultura amósase amplamente arraigada na xeografía galega como un servizo máis do Estado do Benestar” e daquela o grao de institucionalización das políticas culturais ten acadado o seu cénit.

"Non se pode ser infinitamente indulxente co comportamento do cidadán Cunqueiro entre o 20 de xullo de 1936 e o ano 1950", sostivo Xesús Alonso Montero diante de Xosé Fortes, máis propenso á "indulxencia fronte ás debilidades humanas". O Cunqueiro militante da Falange, ao servizo do Franquismo, foi o argumento do Faladoiro "Os intelectuais galegos e o Franquismo", organizado polo Consello da Cultura Galega e celebrado onte no Sexo Edificio do Museo de Pontevedra e no que participaron tamén Luís Cochón e Olivia Rodríguez. O acto foi seguido por setenta persoas.

Cunha glosa da dimensión galega e internacional de Álvaro Cunqueiro, da súa relación coa cultura anglófona, feita polo ilustre galaicista da Universidade de Oxford, John Rutherfod, concluiu hoxe no Auditorio Municipal de Vigo o Congreso internacional “Mil e un Cunqueiros”, organizado polo Consello da Cultura Galega e as tres universidades galegas. “Era obrigado vir a Vigo, dixo Ramón Villares, Presidente do Consello da Cultura, porque a Vigo está unido o nome do escritor, que aquí creou boa parte da súa obra literaria e xornalistica”. O congreso, con dúas xornadas en Santiago de Compostela e unha na Coruña, agrupou nove conferencias maxistrais, cinco mesas redondas e trinta comunicacións, que permitiron revisar e aportar novas miradas ao legado dun clásico, “necesitado dunha boa edición crítica da súa obra completa”, ao ver de Rutherford. Ramón Villares, o concelleiro de Normalización Lingüística e deportes, Manel Fernández, e o vicerreitor da Universidade de Vigo, Henrique Costas, participaron no acto de clausura deste congreso, punto culminante das actividades do “Ano Cunqueiro”, organizado polo Consello da Cultura e iniciado tamén en Vigo o pasado mes de febreiro para conmemorar o centenario do escritor (Mondoñedo, 1911-Vigo,1981).

O legado literario de Álvaro Cunqueiro está a reclamar unha visión de conxunto que permita abarcar analíticamente toda a súa diversidade creadora e tamén unha actualización biográfica, que cubra baleiros significativos da súa peripecia persoal e vital. Así o constatou Fernando Valls (Universidade de Barcelona) na súa intervención na penúltima xornada do congreso internacional “Mil e un Cunqueiros” celebrada hoxe na sede do Consello da Cultura Galega. As sesións, organizadas por esta institución cultural en colaboración coas tres universidades galegas, tiveron carácter itinerante con escala o xoves na Coruña, e rematarán mañá sábado 1 de outubro no Auditorio Municipal de Vigo cunha mesa redonda e dúas conferencias, a última ao cargo do destacado galaicista John Rutherfod, da Universidade de Oxford.

Rebasado o seu ecuador, o congreso internacional "Mil e un Cunqueiros" está a cumprir os obxectivos fixados pola comisión organizadora, nomeadamente no referido ás achegas das novas investigacións sobre a obra do escritor mindoniense. "As sesións densas, intensas e non exentas de polémica así o reflicten e tamén algunhas contribucións chegadas de ámbitos italianos ou portugueseses", dixo Dolores Vilavedra, da Universidade de Santiago, integrante da comisión xunto con Manuel Forcadela (Universidade de Vigo) e Teresa López (Universidade da Coruña). O paraninfo coruñés acolleu hoxe as sesións congresuais con particular atención aos xéneros literarios na obra de Cunqueiro, a recepción do seu legado ou herdo e a configuración textual en "Merlín e familia". O congreso retornará mañá venres á sede do Consello da Cultura Galega, institución que o organizou, xunto coas universidades galegas, para conmemorar o centenario de Álvaro Cunqueiro (Mondoñedo, 1911-Vigo, 1981).

Autor dunha obra enriquecida cun grande substrato poético, o legado literario e xornalístico de Álvaro Cunqueiro revive baixo as novas miradas do congreso internacional “Mil e un Cunqueiros” inaugurado hoxe na sede do Consello da Cultura Galega. O creador, o narrador o xornalista foi esencialmente un poeta, como salientou o escritor César Antonio Molina na conferencia inaugural. Unha figura emblemática da literatura, galega e española, do século XX, que merece ser estudada e divulgada, como subliñou Ramón Villares, presidente da institución cultural organizadora do evento xunto coas tres universidades galegas. Villares recordou que era este o acto central do “Ano Cunqueiro”, impulsado e coordinado desde o Consello da Cultura para conmemorar o centenario do escritor (Mondoñedo, 1911-Vigo, 1981). No acto inaguural interviron tamén Manuel Fernández Iglesias e Francisco Durán, vicerreitores das universidades de Vigo e Santiago, respectivamente, e José María Barja, reitor da Universidade da Coruña, en cuxo Paraninfo se desenvolverán mañá, xoves, as sesións deste congreso itinerante.

Coa conferencia “As miñas lecturas de Cunqueiro” o escritor e exministro de Cultura, César Antonio Molina, abrirá mañá, mércores día 28 o congreso internacional “Mil e un Cunqueiros”, organizado polo Consello da Cultura Galega (CCG) en colaboración coas tres universidades galegas para conmemorar o centenario do escritor (Mondoñedo, 1911-Vigo, 1981). A sesión celebrarase ás 10 horas no salón de actos do CCG inmediatamente despois da inauguración oficial presidida polo titular da institución, Ramón Villares, xunto co conselleiro de Cultura e Turismo, Roberto Varela, o Reitor da Universidade da Coruña, José María Barja, e Francisco Durán e Manuel Fernández Iglesias, vicerreitores das Universidades de Santiago e Vigo, respectivamente. O congreso, acto culminante do “Ano Cunqueiro” organizado polo CCG, prolongarase ata o sábado 1 de outubro con sesións en Compostela, A Coruña e Vigo para acoller nove conferencias maxistrais, cinco mesas redondas e máis de trinta comunicacións.

Nove conferencias maxistrais, cinco mesas redondas e máis de trinta comunicacións contribuirán a facer do congreso “Mil e un Cunqueiros” un referente para a proxección futura do universal fabulador galego. Así o ven Ramón Villares, presidente do Consello da Cultura Galega (CCG), organizador do magno encontro xunto coas tres universidades galegas, Dolores Vilavedra e Teresa López, da comisión organizadora, e Henrique Monteagudo, coordinador do programa “Ano Cunqueiro”, impulsado e realizado polo CCG para conmemorar o centenario do escritor (Mondoñedo, 1911-Vigo, 1981). Os catro presentaron hoxe este “acto central do centenario cunqueiriano”, que comezará o 28 de setembro e itinerará durante catro días por Santiago de Compostela, A Coruña e Vigo.

Os participantes no faladoiro “Cunqueiro e a cultura catalá”, organizado polo Consello da Cultura Galega e celebrado no Insitut d´Estudis Cataláns, en Barcelona, subliñaron o madrugador recoñecemento que Cataluña brindou ao xenial escritor galego, nomeadamente como poeta. Así o indicou Basilio Losada, catedrático da Universidade de Barcelona e crítico literario, logo de lembrar a aparición, entre 1932 e 1933 dos tres primeiros poemarios cunqueiriáns (Mar ao norde, Cantigas do si e non e Cantiga nova que se chama Riveira) e a excepcional acollida que tivera Alvaro Cunqueiro (1911-1981) en Barcelona en 1934, un feito ao que aludiu tamén Ramón Villares, presidente do Consello da Cultura Galega.

Cincuenta especialistas en industrias culturais e creativas procedentes de 6 países reuniranse do 19 ao 22 de setembro en San Simón, a Illa do Pensamento, con motivo da posta en marcha do proxecto INDCREA, una iniciativa promovida pola Consellería que Cultura e Turismo e o Consello da Cultura Galega (CCG) que bota a andar co foro de debate Galicia e as industrias culturais e creativas diante da Axenda 2020. O conselleiro de Cultura, Roberto Varela, e o presidente do CCG, Ramón Villares, desprazaranse o luns ás 12 horas ao enclave da ensenada da Ría de Vigo para inaugurar e participar neste encontro, organizado xunto ao CCG pola Fundación Illa de San Simón, a Agadic (Axencia Galega das Industrias Culturais) e coa participación activa das tres universidades galegas.

O Consello da Cultura Galega (CCG) e o Centro Galego de Artes da Imaxe (CGAI) inauguraron o 2 de setembro na Casa da Cultura da Pobra do Caramiñal (A Coruña), a exposición itinerante “OS ADEUSES, 73 imaxes da emigración galega (1957-1963)” captadas polo fotoxornalista Alberto Martí. O acto contou coas presenzas de Isaac Maceira, Alcalde de Pobra do Caramiñal, Ramón Villares, presidente do CCG, José María Arias Mosquera, presidente da Fundación Barrié e Banco Pastor, Alfonso Cabaleiro, secretario xeral de Medios da Xunta de Galicia, e Alberto Martí. A exposición estará na Pobra do Caramiñal ata o 20 de setembro. Con anterioridade puido verse na Coruña, Vigo e Santiago de Compostela.

Trátase de recuperar e dixitalizar a memoria audiovisual dos anos finais do Franquismo e dos albores da autonomía en Galicia, noticias e programas producidos aquí entre 1971 e 1976. Ou sexa, os fondos en formato cine, 16 milímetros, do Centro Territorial de TVE, que pasarán logo á Cidade da Cultura. Con ese obxectivo asinaron hoxe un protocolo xeral de colaboración os representantes da Xunta de Galicia, Fundación Cidade da Cultura de Galicia, Radiotelevisión Española e Consello da Cultura Galega. O acto, presidido por Alberto Núñez Feijóo, Presidente da Xunta, tivo lugar no plató do Centro Territorial de TVE en San Marcos-Santiago de Compostela. Os asinantes subliñaron a importancia de dispoñer da memoria audiovisual de quince anos cruciais gardada en 4.564 latas.

O presidente do Consello da Cultura Galega, Ramón Villares, e o conselleiro de Educación e Ordenación Universitaria, Jesús Vázquez Abad, asinaron hoxe un acordo de colaboración polo que a institución cultural porá a disposición da Rede de Normalización Lingüística diferentes recursos para a promoción do galego desde o ámbito local. Trátase de crear a plataforma web “d-linga”, o buscador “lingua en titulares” e o audiovisual “cincuenta anos de defensa e promoción do galego”. No acto paticiparon tamén Anxo Lorenzo, Secretario Xeral de Política Lingüística, e Henrique Monteagudo, director do Centro de Documentación Sociolingüística de Galicia do CCG. O presuposto ascende a 40.000 euros, dos que a Consellería aportará 35.000 euros e o CCG, 5.000 euros.

A escena galega amosarase por vez primeira no Festival de Teatro en Língua Portuguesa (FESTLIP) de Río de Xaneiro mediante catro funcións do espectáculo “Memoria das memorias dun neno labrego”, un monólogo escénico-narrativo co que Cándido Pazó rende homenaxe ao libro de Xosé Neira Vilas,50 anos despois da súa primeira edición. A Agadic (Axencia Galega das Industrias Culturais) da Consellería de Cultura e Turismo e o Consello da Cultura Galega copatrocinan a presenza da compañía "Abrapalabra Creacións Escénicas" neste importante encontro teatral que se desenvolverá do 20 ao 30 de xullo na capital brasileira.

Os fondos documentais e a actividade dos catro arquivos do Consello da Cultura Galega trasladaranse neste mes de xullo á Biblioteca da Cidade da Cultura de Galicia. O convenio de colaboración será asinado mañá día 8 de xullo ás 12 horas no curso dun acto que, na referida Biblioteca, presidirá o conselleiro de Cultura e Turismo, Roberto Varela, e contará coa presenza do presidente do Consello da Cultura, Ramón Villares, e da directora-xerente da Fundación Cidade da Cultura de Galicia, Beatriz González Loroño. Ata o momento os Arquivos estaban instalados en dependencias alugadas polo CCG, institución estatutaria que ten a súa sede no Pazo de Raxoi, en Santiago de Compostela. O traslado supoñerá para o CCG un aforro de 40.OOO euros anuais en alugueres.

“Galicia sería díficil de entender sen emigración, pero moito máis difícil sería imaxinala de non se ter producido esta profunda e sostida onda migratoria, que vencellou estreitamente a imaxe dos galegos no mundo con tantos outros pobos europeos -e non europeos- que tamén foron países de emigrantes”. Así o ve Ramón Villares, presidente do Consello da Cultura Galega e catedrático de Historia Contemporánea da USC, no seu traballo “Vellas e novas formas de entender a emigración”, que abre as Actas do Congreso “Emigración e Educación (1900-1936)”, libro presentado hoxe no Consello da Cultura Galega.

O Consello da Cultura Galega acolle desde hoxe as sesións de traballo da VII Reunión de Escultura Romana en Hispania, en homenaxe á memoria do profesor Alberto Balil Illana. No acto inaugural interviron: Raquel Casal, directora do Departamento de Historia I da USC; José Manuel Rey Pichel, director xeral de Patrimonio Cultural da Xunta de Galicia, e Fernando Acuña Castroviejo, catedrático de Arquoloxía da USC, que disertou sobre “Alberto Balil e a renovación da arqueoloxía galaica”.