Arquivo de noticias do CCG

A directora do Centro de Documentación en Igualdade e Feminismos (CDIF), Carme Adán, estivo na tarde deste venres na Casa da Calzada de Cambados (19:00 horas) para presentar o Manual básico para afrontar as violencias machistas: recoñecer. Actuar e Restaurar”. Unha guía útil que informa de xeito visual e doado de todos os recursos cos que pode contar unha muller que se atope nunha situación de violencia machista.

O Consello da Cultura Galega (CCG) preestrea este sábado, 14 de setembro, o seu novo proxecto audiovisual Na procura do son perdido. A zanfona, memoria da Transición. O documental achégase ao rexurdir que tivo este instrumento nas décadas dos 70 e 80. Foi realizado pola aCentral Folque e a produtora audiovisual Aqueladas con dirección de Ramon Pinheiro. A presidenta do CCG, Rosario Álvarez, asiste ás 18:30 horas, á presentación que ten lugar en Lugo, no marco do Festival Celme da Zanfona xunto con produtor Mauro Sanín, e os protagonistas Xosé L. Rivas Cruz "Mini" e Luciano Pérez. Un pouco antes, ás 18:00 horas, o documental tamén se preestrea en Tui, no marco do Encontro profesional de música Galiza_Portugal MUMI I Musicas no Minho, coa participación do director, Ramón Pinheiro, o luthier Antón Corral, e a coordinadora da Sección de Artes Escénicas, Audiovisuais e Musicais do CCG, Cristina Domínguez.

Judit Carrera Escudé (Barcelona, 1974) dirixe desde 2018 o Centre de Cultura Contemporània de Barcelona (CCCB). É politóloga de formación e ten unha ampla carreira como xestora e promotora cultural no ámbito da cultura e das relacións internacionais. Estivo na tarde deste mércores no Consello da Cultura Galega (CCG), nun encontro dirixido a profesionais da xestión cultural, do sector audiovisual, das artes escénicas, responsables de museos e de centros de arte, entre outros axentes culturais. A presidenta do CCG, Rosario Álvarez, estivo presente nesta cita coordinada por Paula Cabaleiro, membro do Pleno da institución.

O Consello da Cultura Galega (CCG) colaborou coa consellería de Sanidade no marco da actividade organzada co gallo do Día Mundial para a prevención do suicidio. No marco desta actividade tivo lugar unha lectura contemorativa a cargo da escritora Rosa Aneiros.

A José Torres Creo (Pontecesures, 1874 – Vigo, 1939) debémoslle a composición de O sol da primaveira (tamén coñecida como Alborada), Mozos e mozas, San Campio e O Neno Xesús, presentes nos repertorios de múltiples orfeóns e corais, ademáis de formar parte do catálogo clásico da música coral galega. A súa entrada no Álbum de Galicia, a colección dixital de biografías que mantén o Consello da Cultura Galega (CCG), é da autoría de Pablo Abreu Fernández.

O vicepresidente, Xosé M. Núñez Seixas recibiu esta mañá a un grupo de alumnos de quinto de secundaria do instituto arxentino galego “Santiago Apóstol”, que realiza anualmente unha viaxe de estudos por Galicia. Acompañados polas docentes Macarena Fuentes e Gabriela Rilla, coñeceron a institución, viron a variedade de recursos que poden atopar nas nosas webs e recibiron un pequeno agasallo (o catálogo da exposición “Materiais Seoane” , o volume “Fardel de Eisilado” da Colección Clásicos da Emigarción que contén a reprodución facsimilar do texto e un estudo introdutorio de Gregorio Ferreiro Fente, entre outros materiais). Nese intercambio cultural, o alumnado deixou para o CCG un gravado da artista arxentina Mariana Hoffman (Tandil, 1965).

A Casa Habaneira acolleu esta mañá a inauguración da mostra O soño cubano da emigración galega, unha proposta do Consello da Cultura Galega (CCG), coa colaboración da Secretaría Xeral da Emigración, que ilustra a fortaleza, a continuidade e a visibilidade da presenza galega na Habana. A presidenta do CCG, Rosario Álvarez, e a alcaldesa de Guitiriz, Marisol Morandeira, destacaron na inauguración a pegada da emigración nesta localidade lucense que se plasma no espazo no que pode ver a exposición ata o vindeiro 30 de setembro.

“Á luz dos estudos realizados no marco deste informe considera que a instalación do proxecto Gama produciría unha grave fractura no territorio, no que introduce un elevado grao de incerteza sobre a evolución futura e a viabilidade da recomposición do contexto social e territorial”. Esta é unha das conclusións do Informe sobre o proxecto para a implantación dunha industria de fibra téxtil a base de celulosa e as súas infraestruturas asociadas elaborado por unha decena de expertos de diferentes ámbitos reunidos polo Consello da Cultura Galega (CCG) sobre a instalación que a empresa portuguesa Greenfiber (Altri) quere implantar en Palas de Rei (Lugo). A presidenta do CCG, Rosario Álvarez; a coordinadora da Comisión técnica temporal creada para a súa elaboración, Teresa Nieto; e máis o coordinador técnico do informe, Eduardo Corbelle, presentaron este documento de carácter multidisciplinar, elaborado coa pretensión de achegar información documentada para a toma de posición e decisións sobre o proxecto. O informe, que foi remitido á Secretaría Xeral de Industria e Desenvolvemento Enerxético, xa está dispoñible para descarga desde o web da institución.

Concha Castroviejo (Santiago de Compostela, 1910-Madrid, 1995)foi unha crítica e escritora de moi singular dicir, acusada independencia e forte personalidade. A súa entrada no Álbum de Galicia, coleccion de bio-bibliografías do Consello da Cultura Galega(CCG), elaborada por Nanina Santos, acaba de ser actualizada para incorporar novas investigacions realizadas sobre a súa figura e o seu legado literario.

Proxector, iniciativa de divulgación científica na nosa lingua que desenvolve o Centro de Documentación Sociolingüística de Galicia (CDSG) do Consello da Cultura Galega (CCG), en colaboración coa Universidade de Santiago de Compostela (USC), súmase ao Día Mundial do Corazón, que se celebra o 29 de setembro, co especial “Escoita o corazón”. Os doce recursos que escolma cada entrega deste proxecto dan voz nesta ocasión a especialistas en cardioloxía, dermatoloxía, intelixencia artificial e fisioterapia para achegar información sobre as características, problemas e formas de protexer o corazón.

O Consello da Cultura Galega (CCG) lamenta o pasamento do presidente e editor de La Voz de Galicia, figura determinante na prensa galega. Santiago Rey Fernández-Latorre (A Coruña, 1938-2024) era o sétimo presidente de La Voz de Galicia, xornal fundado polo seu avó, Juan Fernández Latorre, en 1882.

A coincidir co segundo centenario do seu nacemento, o Consello da Cultura Galega publicou no Álbum de Galicia unha biografía do xornalista, funcionario e literato Benito Vicetto (Ferrol, 1824-1878), elaborada polo filólogo e investigador Xurxo Martínez González. Vicetto ocupou "un posto central na literatura feita en Galicia no século XIX" pero sobre todo é un dos precursores do rexionalismo e da vindicación da historia e da identidade galegas a mediados dese século.

O 24 de novembro de 2023 o Consello da Cultura Galega celebrou o seu 40º aniversario no Palacio da Ópera da Coruña. Velaí estreouse a peza Terra, cantata para solista, coro e orquestra, do compositor Juan Durán con textos de Ramón Cabanillas. Con motivo do Día Nacional de Galicia, o Consello da Cultura Galega publicou no seu web a gravación do concerto e o folleto adxunto, en libre descarga.

O Fondo Miguel Gutiérrez de propaganda política, catalogado e documentado polo grupo de investigación HISPONA da USC no sistema documental do Consello da Cultura Galega, ten na rede un novo itinerario a través dos seus fondos. Denomínase 'Aqueles 25 de xullo' e escolma panfletos e carteis que nos permiten coñecer como se concibiron os primeiros 25 de xullos trala morte de Franco. O papel dos distintos partidos políticos, a ritualidade dese día e os importantes matices entre os grupos de esquerda e nacionalistas que fan ver, sobre todo, as diferentes posturas en relación ao nacionalismo e os cambios sociais.

En 1929, trala fin a ditadura de Primo de Rivera, fúndase na Coruña a Organización Republicana Gallega Autónoma (ORGA), unha entidade que vai ter un destacado papel na política da Segunda República. En 1930, un grupo de galeguistas residentes na Arxentina decidiron crear unha sección desta organización no país americano "para darlle difusión e apoio económico". O Arquivo da Emigración Galega do Consello da Cultura Galega dixitalizou e puxo a disposición pública a documentación administrativa desta entidade dentro do seu programa Memoria documental das sociedades da emigración galega.

Cada dous meses, o proxecto Caligrafías musicais recupera unha conferencia dun experto ao redor dun tema musical galego. Desta volta, unha charla do recoñecido musicólogo José López-Calo sobre as orixes do coralismo.

O Consello da Cultura Galega presentou esta mañá tres novas publicacións sobre a emigración galega. Dúas delas corresponden á colección Clásicos da Emigración: Estebo, de Xosé Lesta Meis e Verdades como puños y consideraciones, de Justo Taladrid. No acto tamén se presentou o catálogo da exposición As xeracións do Montserrat. Memoria emocional da emigración galega ao Reino Unido. Na presentación participaron Rosario Álvarez, presidenta do Consello da Cultura Galega, Antonio Rodríguez Miranda, secretario xeral de Emigración da Xunta de Galicia, Miro Villar, autor do estudo introdutorio da obra Estebo de Xosé Lesta Meis, Emilio Xosé Ínsua, autor do traballo de contexto de Verdades como puños y consideraciones de Justo Taladrid. Pola súa banda, Pepe Barro presentou o catálogo da exposición As xeracións do Montserrat.

O coñecemento e uso das tecnoloxías de intelixencia artificial (IA) na cultura galega son moi desiguais segundo os ámbitos temáticos profesionais. Así o pon de manifesto o documento de traballo "A intelixencia artificial na cultura galega: coñecemento, usos e opinións", producido polo Observatorio da Cultura Galega do Consello da Cultura Galega. Mentres os sectores do audiovisual e das artes visuais (fotografía, deseño, arquitectura e publicidade) coñecen e empregan a IA de xeito moi estendido (63,9% e 61,8% respectivamente), noutros ámbitos é algo inferior, como a edición de libros (47,5%) ou teatro e danza (40,5%). Son a música, o comercio de libros, os departamentos de cultura das administracións públicas ou os arquivos e bibliotecas os que menos coñecen e empregan estas ferramentas, con menos dun 25% dos profesionais enquisados que manifesten un coñecemento da IA. Os datos foron presentados pola presidenta do CCG, Rosario Álvarez, durante a inauguración da xornada "A intelixencia artificial: un novo desafío para o ensino da lingua, literatura e cultura galegas na educación secundaria" que se celebra esta tarde na institución.

O Consello da Cultura Galega lamenta a morte do historiador Justo G. Beramendi, sucedida a pasada madrugada en Santiago de Compostela de xeito repentino. Justo G. Beramendi foi catedrático de Historia Contemporánea da Universidade de Santiago de Compostela e é unha das figuras referenciais para comprender, desde o punto de vista histórico, a articulación do galeguismo político entre os séculos XIX e XX. De feito, o seu libro De provincia a nación. Historia do Galeguismo político recibira o Premio Nacional de Ensaio en 2008. As súas publicacións ofrecen un marco amplo para comprender as dinámicas sociais, xeracionais, políticas nas que se insertaron movementos, partidos políticos e figuras relevantes da historia e cultura galegas.

O Arquivo da Emigración Galega do Consello da Cultura Galega pon a disposición pública a documentación recuperada da Habana (Cuba) do Círculo Habanero de los Naturales de la Devesa, Sociedad de Instrucción y Recreo, unha sociedade fundada por veciños do concello de Ribadeo en 1911 na capital cubana. A documentación, que permite estudar a xestión, administración e integrantes da sociedade, pódese consultar en liña e con libre acceso no repositorio do CCG, dentro do programa "Memoria documental das sociedades da emigración galega".