Arquivo de noticias do CCG

O ciclo de reflexión Pensarmos, que organiza mensualmente a Sección de Pensamento do Consello da Cultura Galega (CCG) que coordina Carme Adán, ten este xoves 19 de maio (18:00horas) unha nova cita. Desta volta co filósofo e profesor Javier Vilanova, que falará da filosofía de sentido común. Estará con el na mesa a tamén profesora, Nieves Herrero. A sesión é presencial, pode seguirse en directo a través do web e das redes sociais da institución.

José Rubia Barcia, Ernesto Guerra da Cal, Emilio González López, Ramón Martínez López ou Eugenio Fernández Granell comparten o feito de ser intelectuais galegos que se tiveron que exiliar entre 1936 e 1939. As rutas que seguiron, así como a evolución do seu pensamento e a relación entre vida e obra, forman parte da sesión “Fragmentos da comunidade: o exilio galego de posguerra en Norteamérica” que organiza o Consello da Cultura Galega (CCG) e o Observatorio de la Lengua Española y las Culturas Hispánicas en los Estados Unidos do Instituto Cervantes. A cita desenvólvese a través da plataforma Zoom (en liña o xoves, 19 de maio ás 19:00, hora española) e ten aberta a súa participación.

O Teatro Lauro Olmo do Barco de Valdeorras encheuse no serán deste luns para homenaxear con música a un dos seus fillos pródigos: Florencio Delgado Gurriarán (Vilamartín de Valdeorras, Ourense, 1903 - Fair Oaks, USA, 1987). A duodécima edición do Concerto das Letras Galegas, antesala festiva do Día das Letras que organiza o Consello da Cultura Galega (CCG), repasou musicalmente o legado do homenaxeado e tamén lembrou a memoria das exiliadas e exiliados republicanos que, coma Florencio, pasaron de Galicia a México. O concerto supuxo a estrea da peza Diásporas, composta para a ocasión por Carme Rodríguez a partir dos textos de Galicia infinda, poemario referencial do autor. A presidenta do CCG, Rosario Álvarez; unha ampla representación dos concellos da comarca, entre eles, o alcalde do Barco de Valdeorras, Alfredo García, e o de Vilamartín, Enrique Álvarez; mais o secretario xeral de Política Lingüística, Valentín García; a directora xeral de Patrimonio, María del Carmen Martínez; o presidente da Real Academia Galega, Víctor Freixanes, e a familia do homenaxeado asistiron a este concerto que tamén se emitirá na TVG este martes, 17 de maio, dentro da programación especial das letras galegas.

O Consello da Cultura Galega (CCG), coa colaboración do concello do Barco de Valdeorras, abre este luns 16 de maio os actos de celebración do Día das Letras Galegas que homenaxea ao poeta e activista político e cultural Florencio Delgado Gurriarán (Vilamartín de Valdeorras, Ourense, 1903 - Fair Oaks, USA, 1987). Faino co tradicional Concerto das Letras Galegas que corre a cargo do grupo Zoar Ensemble cun programa musical que repasa o legado do homenaxeado e tamén lembra a memoria dos exiliados e exiliadas republicanos que, coma Florencio, pasaron de Galicia a México. As entradas son gratuítas, pódense retirar no propio día do concerto que terá lugar no Teatro Lauro Olmo (Barco de Valdeorras, 20:00 horas) e será retransmitido en directo pola web do CCG e a da CRTVG. Nel estrearase a peza Diásporas, composta para a ocasión por Carme Rodríguez.

A cidade estadounidense de Kalamazoo acolle ata o sábado o 57th International Congress on Medieval Studies organizado polo Instituto Medieval da Western Michigan University. Trátase dun congreso de referencia sobre estudos medievais a nivel internacional. O congreso ten no seu extenso programa varias sesións dedicadas a analizar a Galicia Medieval que están coordinadas polo especialista Simon Doubleday. Unha desas sesións consiste nunha mesa redonda que parte da publicación do Consello da Cultura Galega (CCG) Galicia no tempo de Afonso X, do que Doubleday é tamén editor.

Bos Aires celebra estes días a 46ª edición da súa Feria Internacional do Libro. Unha cita destacada no panorama mundial na que participa o Consello da Cultura Galega (CCG), en virtude do convenio de colaboración asinado co Instituto Cervantes, co Institut Ramón Llul e o Etxepare Euskal Institutua. No marco do programa da feira, este venres 13 de maio terá lugar un encontro con autores que escriben nas linguas cooficiais do Estado. A cita estará moderada polo poeta e director do Instituto Cervantes, Luis García Montero, e nela participan, a escritora galega, Berta Dávila, premio Xerais 2021 e premio da Crítica de narrativa galega 2019; o antropólogo e narrador Adriá Pujol; xunto coa escritora Marta Sanz, premio Herralde de novela 2015 e finalista do Premio Nadal 2006. O encontro conta coa colaboración da Consejería Cultural da Embaixada de España na Arxentina.

A presidenta do Consello da Cultura Galega (CCG), Rosario Álvarez; o director do CSMVIGO, Esteban Valverde; o profesor do Departamento de Musicoloxía do CSMVIGO, Julio Alonso; e o autor do libro, o musicólogo, David Ferreiro presentaron este luns 9 de maio no Auditorio do CSMVIGO o libro Luis R. Brage Villar. Obra e memoria.Trátase dunha obra que contextualiza e documenta a importancia do pedagogo,director e compositor Luis R. Brage Villar, autor de Follas novas, a rapsodia galega por excelencia.

“Neste Día das Letras Galegas de 2022, cando se homenaxea tanto ao poeta como ao activista político e cultural Florencio Delgado Gurriarán (Vilamartín de Valdeorras, Ourense, 1903 - Fair Oaks, USA, 1987), é necesario honrar a memoria dos exiliados e exiliadas republicanos, que, coma el, pasaron de Galicia a México”. Deste xeito explicou Rosario Álvarez, presidenta do Consello da Cultura Galega (CCG), a dobre intencionalidade coa que institución celebra a festividade do 17 de Maio a través de dúas actividades centrais. Unha delas é o tradicional Concerto das Letras Galegas, que este ano corre a cargo do grupo Zoar e terá lugar, como vén sendo habitual, na véspera do Día das Letras na localidade do nacemento do autor (teatro Lauro Olmo, O Barco de Valdeorras 20:00 horas). O concerto será emitido en directo a través de internet e na TVG o día 17 no marco da programación especial prevista para a celebración. A outra é a publicación co facsímile do Cancioneiro da loita galega, con estudo crítico de Xesús Alonso Montero e notas de Ricardo Gurriarán, sobriño do homenaxeado.

Antón Fraguas (Cotobade, 1905- Santiago, 1999) sintetiza o coñecemento etnográfico de Galicia grazas a un laborioso e obstinado traballo de recollida a prol da nosa historia e da nosa identidade. É tamén o protagonista da nova entrega de Voces centenarias, un proxecto do Arquivo Sonoro de Galicia, dependente do Consello da Cultura Galega (CCG) achega tres cortes sonoros que condensan a súa poética.

A UNESCO declarou en 2019 o 5 de maio como o Día Mundial da Lingua Portuguesa. Arredor desta data o Consello da Cultura Galega realiza varias accións encamiñadas a visibilizar a conexión coa lusofonía. A primeira é a publicación da entrada no Álbum de Galicia de Valentín Paz-Andrade. Outra delas terá lugar mañá, venres 6 de maio, coa presentación do libro Lingua portuguesa global: comunicarse no panorama mediático luso-brasileiro, de José Gabriel Andrade. No acto estará presente Rosario Álvarez, presidenta do CCG; María Manuela Reis Martins, directora de Uminho Editora; o autor máis o catedrático da USC, Henrique Monteagudo.

Naceu en Italia e viaxou por Europa como autor, actor e tradutor de textos teatrais. Filippo Prosperi (Perugia, 1816- Vigo, 1899). Asentouse definitivamente en Galicia, primeiro en Pontevedra e despois en Vigo, onde montaría coa súa muller, Cándida Otero, un gabinete fotográfico. Polas súas cámara pasarían figuras ilustres da política, sociedade e cultura viguesa, pero tamén retratou a transformación urbana do Vigo finisecular. Vítor Vaqueiro asina a súa entrada no Álbum de Galicia.

Que papel deben cumprir os medios de comunicación na nosa sociedade? Informar ou educar? Existe a censura? Que é iso da guerra informativa? Estas son algunhas das cuestións sobre as que coñecidos xornalistas debaterán mañá na xornada “Censuras e silencios nos medios de comunicación” que organiza a Sección de Pensamento do Consello da Cultura Galega (CCG). A cita é presencial pero tamén se poderá seguir en directo a través da web e das redes sociais da institución.

A historia de Teima durou apenas un ano, o que vai de novembro de 1976 a agosto de 1977, pero marcou un fito na historia das publicacións galegas. Foi a primeira revista xornalística que se editou integramente en galego e en Galicia. Nela colaboraron e traballaron Víctor Fernández Freixanes, Manuel Rivas, Xavier Navaza, Pepe Carreiro, Xaquín Marín, Xurxo Lobato e moitos outros nomes hoxe destacados da cultura e da comunicación do país. O Consello da Cultura Galega (CCG) pon na rede o seu arquivo completo neste 3 de maio, Día da Liberdade de Prensa.

O Consello da Cultura Galega celebrou no serán deste xoves dúas sesións plenarias consecutivas. Na primeira tratáronse asuntos ordinarios da institución e na segunda procedeuse á renovación dos seus membros na quenda de personalidades destacadas. A remuda deste grupo afecta, tal e como establece o regulamento da institución, a unha parte dos membros. Incorpóranse ao Plenario Alejo Amoedo, Cristina Domínguez e Celia Pereira, mentres que Elena Vázquez Cendón, Xosé Manoel Núñez Seixas e Carme Adán renovan por outra lexislatura máis. Ademais, elexiuse a Silvestre Gómez Xurxo como secretario da institución.

O Colexio san José de Verín, o Hotel Balneario de Cabreiroá, o teatro Rosalía de Castro de Vigo... a acción filantrópica de José García Barbón y Sola (Verín, 1831- Vigo, 1909) foi ampla e xenerosa. O seu legado centra este mes de abril a nova entrega do especial Historias de ida e volta. O proxecto do Arquivo do Emigración (AEG) do Consello da Cultura Galega (CCG) co apoio da Secretaría Xeral da Emigración, recupera en vinte imaxes e documentos procedentes deste arquivo algunhas das iniciativas que contribuíu a crear.

O Arquivo Sonoro de Galicia (ASG), entidade do Consello da Cultura Galega (CCG), realiza este venres 29 de abril unha nova actividade encamiñada a enriquecer o Mapa Sonoro de Galicia. O director do Arquivo, Xosé Ramón Pousa, e a concelleira delegada de Cultura e Normalización Lingüística de Betanzos, Ana Belén Veiga Pita, serán os encargados de presentar esta sesión que convida á veciñanza a rexistrar os sons característicos desta vila para incorporalos ao mapa.

O Consello da Cultura Galega e o Concello de Ferrol inauguran este venres no Centro Torrente Ballester (20:00 horas) A intimidade da imaxe, mostra que percorre a transición en Galicia da man das fotografías de Anna Turbau (Barcelona, 1949). Na inauguración estará presente a comisaria, Margarita Ledo, que realizará unha visita guiada. A exposición estará aberta ao público ata o 29 de maio.

A maioría das empresas da cultura galega xa se recuperaron da crise do coronavirus. O 43% das entidades consultadas aumentaron no último ano a súa facturación ou orzamento e a súa expectativa de crecemento para este ano é moi positiva. Con todo, o sector notou o incremento dos prezos das subministracións que precisan para a súa produción e prevé un encarecemento no sector da edición, artes visuais, teatro e danza. O Barómetro da cultura 2022, elaborado polo Observatorio da Cultura Galega, servizo do Consello da Cultura Galega (CCG) foi presentado en rolda de prensa pola presidenta da institución, Rosario Álvarez, e o coordinador do Observatorio, Hakan Casares. O documento amosa a estabilidade empresarial, con grande equilibrio entre homes e mulleres e no que o 47,9% das entidades conseguiu unha subvención. O 21% afirmou realizar accións dirixidas ao público internacional e un 66% acometeu algunha actuación encamiñada á transformación dixital. Ademais, preto do 70% das empresas e entidades culturais prevé que non notará os efectos do Xacobeo 2021-22. Con todo, o Xacobeo, o Camiño de Santiago e as Tanxugueiras percíbense como as accións culturais máis destacadas do último ano.

O Centro de Documentación Sociolingüística de Galicia (CDSG) do Consello da Cultura Galega (CCG) estrea hoxe novo espazo web. Nel poderase acceder aos proxectos e recursos realizados por este centro que busca xerar un intercambio e diálogo de materiais relacionados co proceso de normalización do galego. Coa renovación deste espazo, complétase o proxecto de renovación dos catro arquivos do CCG.

Laxeiro (lalín, 1908- Vigo, 1996) foi unha figura fundamental para entender a pintura galega do século XX. A sección de Creación e Artes Visuais Contemporáneas do Consello da Cultura Galega (CCG) súmase ás celebracións do Día das Artes Galegas cunha xornada sobre a súa figura, que se insire no marco do ciclo Revisando a nosa arte. Carmen Díaz coordina esta sesión que terá lugar este mércores 27 de abril e no que participan Javier Buján, Cecilia Doporto e Antón Castro. A xornada é presencial pero pode seguirse en directo a través do web e das redes da institución.