Arquivo de noticias do CCG

Cando se considera que unha persoa é maior? A resposta a esta pregunta non é baladí, xa que afecta a moitas normas xurídicas e interpretación xudiciais, como as que determinan a tutela ou a xubilación forzosa. Isto pode dar lugar a situacións de desigualdade e discriminación. Por ese motivo, o Consello da Cultura Galega e a Valedora do Pobo promoven a xornada “O idadismo, discriminación por mor da idade”. A xornada, que se desenvolverá o vindeiro 8 de febreiro no Auditorio Manuel María do Carballiño, acaba de abrir o seu prazo de inscrición.

Reflexionar sobre o papel que desenvolven os museos á hora de desafiar os retos e as necesidades do século XXI e de construír unha sociedade libre, democrática e culta. Esta é a premisa coa que o Consello da Cultura Galega (CCG) e a Fundación María José Jove (FMJJ) organizan o vindeiro 4 de febreiro a xornada “Situarnos: o poder dos museos”. O encontro pon o foco no modelo concreto do Museo Nacional Centro de Reina Sofía (MNCARS), que explicará o seu director, Manuel Borja Villel. A cita ten dúas partes: unha sesión matutina pechada a profesionais do sector e outra vespertina, aberta ao público, na que Borja Villel dialogará con Santiago Olmo, director do Centro Galego de Arte Contemporánea (CGAC). No web do CCG xa está aberta a inscrición para a sesión de tarde.

Durante un ano o ciclo Pensarmos, promovido polo Consello da Cultura Galega (CCG), dedicou todas as súas sesións a afondar sobre o concepto da mentira en ámbitos que van desde a comunicación ata a xustiza. A última cita arredor deste tema, adiada por mor da situación sanitaria, é a do escritor Juan Jacinto Muñoz-Rengel que falará este venres de “Unha historia da mentira”. Carme Adán, coordinadora da Sección de Pensamento do Consello da Cultura Galega (CCG) que organiza esta cita, presentará o diálogo entre o escritor malagueño e o editor Francisco Castro. A cita é presencial pero pode seguirse en directo a través das redes da institución.

Desenvolver accións e actividades que contribúan a analizar e promover o patrimonio cultural e natural de Galicia, especialmente no ámbito da sostibilidade. Estes son os obxectivos do convenio de colaboración asinado polas presidentas do Consello da Cultura Galega (CCG) e da Fundación María José Jove (FMJJ), Rosario Álvarez e Felipa Jove, respectivamente.

O político, escritor e activista Xosé Velo (Celanova, Ourense, 1916- São Paulo, 1972) é a nova personalidade en incorporarse ao Álbum de Galicia. Aser Álvarez González asina a biografía deste líder do Directorio Revolucionario Ibérico de Liberación (DRIL), principal ideólogo e promotor da operación para a toma do barco portugués Santa María (rebautizado como Santa Liberdade) en 1961, para denunciar internacionalmente as ditaduras de Franco e Salazar.

Por que investiron as Caixas e os Bancos en arte? Que se fai e que se podería facer para estimular fiscalmente o coleccionismo? Cal e a situación do coleccionismo privado na arte contemporánea en España? Tres destacados profesionais do sector, Carmen de la Guerra, Manuel Haro Ramos e Luis Trigo, debaten mañá no Consello da Cultura Galega (CCG) estas cuestións. A cita titúlase “O coleccionismo privado da arte como soporte da cultura” e está coordinada por Manuel Quintana Martelo, coordinador da Sección de Creación e Artes Visuais Contemporáneas do CCG. A cita é presencial pero pode seguirse en directo a través das redes sociais da institución.

A exposición Afonso X e Galicia, organizada polo Consello da Cultura Galega (CCG) para ofrecer a conexión galega do Rei Afonso X, chega a Cuba no marco do programa da VII edición de “Confluencias medievais. 800 años de sabidurías”. A Cátedra de Estudos Galegos da Universidad de la Habana organiza esta cita anual que busca difundir o patrimonio artístico e cultural da Idade Media, prestando especial atención á cultura galega, cun programa centrado no Rei Sabio. A mostra inaugúrase mañá, 25 de xaneiro, na Facultade de Artes e Letras coa presenza de Arantxa Fernández, directora da Cátedra de Estudos Galegos e de Laura López García, consejera Cultural da embaixada de España en Cuba.

A presidenta do Consello da Cultura Galega (CCG), Rosario Álvarez, recibiu esta mañá a visita da voceira do Bloque Nacionalista Galego, Ana Pontón. A xuntanza foi solicitada polo grupo político e coincide cunha liña de acción do CCG de manter contactos con outras entidades, axentes e institucións públicas e privadas. Na axenda da institución, está previsto continuar a rolda de contactos cos diferentes grupos políticos con representación parlamentaria.

Xa podes consultar no Álbum de Galicia a entrada sobre Francisco Fernández del Riego (Vilanova de Lourenzá, 1913 - Vigo, 2010), intelectual galeguista e activista cultural que en palabras da propia autora da biografía, Malores Villanueva, dedicou a súa vida a “construír un país libre e galego” e converteuse “nun home ponte entre xeracións, ideoloxías e tamén entre a Galicia de aquén e alén mar”. Colaborou asiduamente en diversas cabeceiras galeguistas, foi un prolífico autor no ámbito da investigación e divulgación lingüística e cultural e participou activamente na vida política e cultural galegas, estando o seu nome vinculado ás principais institucións culturais: Galaxia, Fundación Penzol, Real Academia Galega, Museo do Pobo Galego ou Padroado Rosalía de Castro, entre outras. O texto biográfico está acompañado doutros recursos documentais (bibliografía, galería fotográfica, recursos en liña...), que permiten achegarse desde diferentes ópticas á vida e obra deste autor.

Jesús Castro Yáñez, María Alonso Seisdedos, Raquel Senra Fernández, Itxaro Borda, Leire Martinez de Marigorta Varela, Lluïsa Soaz González, Eduard Velasco, Pau Hernánez, Ainara Maya Urroz e Isaac Xubín son as persoas seleccionadas pola comisión para a residencia de Tradución de Poesía entre catalán, éuscaro e galego. Este proxecto está promovido polo Institut Ramon Llull, co apoio do Consello da Cultura Galega e do Etxepare Euskal Institutua.

Francisco Fernández del Riego (Vilanova de Lourenzá, Lugo, 1913 - Vigo, 2010) foi un destacado intelectual e activista político. Escribiu cos pseudónimos de Adrián Solovio, Adrián Soutelo, Salvador Lorenzana, Cosme Barreiros e Alevín e marcou a cultura e política galega durante décadas. María Dolores Villanueva asina a súa biografía, que se acaba de incorporar ao Álbum de Galicia.

A presidenta do Consello da Cultura Galega (CCG), Rosario Álvarez, e a Conselleira de Emprego e Igualdade, María Jesús Lorenzana, asinaron este mércores un acordo de colaboración que permitirá a realización de accións divulgativas encamiñadas a un mellor coñecemento da diversidade sexual, a eliminación da violencia de xénero, e a visibilización de filósofas galegas destacadas. A primeira das actividades na que se concreta este acordo é unha mostra didáctica arredor do movemento LGTBIQ+ que estará lista en xuño de 2022. No acto tamén estiveron presentes, Susana López Abella, secretaria xeral de Igualdade, e, pola parte do CCG, María Xosé Porteiro, directora do Centro de Documentación en Igualdade e Feminismos (CDIF) e Carme Adán, coordinadora da Sección de Pensamento.

Como afecta a débeda pública sobre a recuperación da economía? Ou que nos pode ensinar a vacinación de morcegos vampiros sobre as pandemias? Estes son algúns dos contidos que se poden atopar na nova etapa de Proxector, un espazo web con 600 vídeos didácticos feitos ou subtitulados en galego. Rosario Álvarez, presidenta do Consello da Cultura Galega (CCG) e Gumersindo Feijoo, vicerreitor de Planificación, Tecnoloxías e Sustentabilidade da Universidade de Santiago de Compostela (USC) presentaron esta mañá a renovación deste espazo que pretende visibilizar materiais científicos, de calidade e na nosa lingua, dirixidos a docentes e alumnado universitario e de Ensino Medio.

A presidenta do Consello da Cultura Galega (CCG), Rosario Álvarez, recibiu a nova directiva da Asociación Cultural val de Láncara. No encontro abordaron diferentes posibilidades de colaboración, entre elas, que a sede do CCG acolla a presentación da vindeira convocatoria do premio Ramón Piñeiro Facer País que concede esta asociación.

O Consello da Cultura Galega organiza este martes unha xornada que pretende facer balance de corenta anos de políticas culturais. Na xornada, coordinada por Xavier Campos, Marcos Lorenzo e Dolores Vilavedra, participan unha ducia de profesinais de diferentes ámbitos que identificarán as temáticas históricas máis relevantes, as fases principais e os fitos máis significativos das políticas culturais autonómicas neste período. A presidenta do CCG, Rosario Álvarez, inaugura esta cita presencial que tamén se pode seguir en directo polas redes sociais da institución.

Foi unha poeta e dramaturga de gran sona dun lado e doutro do Atlántico, cuxa obra estivo marcada pola natureza, a lingua, a paisaxe e as xentes de Galicia. Sonia Sánchez asina a biografía de Herminia Fariña Cobián (Santiago de Compostela, 1904 - Simes -Pontevedra, 1967), nova entrada do Álbum de Galicia.

O Consello da Cultura Galega (CCG) celebrou no serán deste martes unha sesión plenaria na que iniciou o proceso de renovación da súa composición. A renovación do Pleno, máximo órgano de goberno, ten lugar por metades tanto nos membros electivos, recoñecidos polos seus méritos, como nos representativos, designados polas institucións que compoñen o CCG. O proceso iníciase hoxe e remata en abril e, a continuación, terá lugar a renovación da presidencia e comisión executiva. Na sesión tamén se presentou o balance de 2021, marcado polo fortalecemento institucional e a realización de informes de asesoría. Ao plenario asistiu o Presidente de Honra da institución, o presidente da Xunta de Galicia, Alberto Núñez Feijoo.

A primeira entrada do ano do Álbum de Galicia é para Florencio Delgado Gurriarán (Vilamartín de Valdeorras, 1903- Fair Oakes, USA, 1987), figura á que se lle dedica o Día das Letras Galegas. Xosé Ramón Fandiño asina a entrada desde avogado, militante galeguista e poeta exiliado en México.

Hoxe, 31 de decembro, cúmprense 150 anos da creación da Sociedade de Beneficencia de Naturales de Galicia (SBNG). Un centro creado en Cuba para atender aos emigrantes galegos que tiñan problemas de saúde ou de traballo. O proxecto Historias de ida e volta, iniciativa do Arquivo do Emigración do Consello da Cultura Galega (CCG) co apoio da Secretaría Xeral da Emigración, suma unha entrega extra para documentar a traxectoria deste centro fundamental para entender a emigración en Cuba.

Do porto ao Palacio do Centro Galego da Habana e polo medio, o Diario de La Marina ou o cruceiro galego chantado do Centro Histórico da Habana Vella. O proxecto Roteiros, iniciativa do Consello da Cultura Galega (CCG), cruza o Atlántico para ofrecer un percorrido, deseñado por Arantxa Fernández Crespo, presidenta da Cátedra de Cultura Galega da Universidade da Habana, que pretende ser unha homenaxe ao pobo galego na diáspora.