Arquivo de noticias do CCG

O Consello da Cultura Galega (CCG) celebrou unha sesión plenaria no serán deste mércores na que acordou a concesión das súas Medallas a Luis García Montero, director do instituto Cervantes, e a Helena González, profesora da Universidade de Barcelona, pola súa contribución na promoción da lingua e a cultura galega no exterior. Ademais, aprobouse a programación de actividades para 2022 que prestará atención aos movementos sociais e culturais na forxa da autonomía; á cultura marítima e ao pasado, presente e futuro dos medios de comunicación en Galicia. Ademais da celebración do tradicional Concerto das Letras Galegas tamén se organizarán actividades arredor da figura de Delgado Gurriarán, próximo homenaxeado no Día das Letras Galegas, con accións que estarán vencelladas a análise dos exilios. No plenario tamén se presentou o balance do último trimestre, que estivo marcado pola recuperación da actividade presencial.

Foi un excelente conferenciante, xornalista, ensaísta, pedagogo e un recoñecido bibliógrafo, que chegou a ter máis de mil volumes de tema galego, centos de xornais e revistas antigas, e unha importante colección de manuscritos e notas das súas investigacións. Antonio Couceiro Freijomil (Pontedeume, 1888 - Compostela, 1995) é a última persoa en incorporarse ao Álbum de Galicia, proxecto dixital que xunta biografías de persoas que destacaron en moi diversos ámbitos da cultura galega.

“Fálalle galego” foi a primeira campaña pública en defensa do idioma dun novísimo goberno autonómico. Corría o ano 1984 e atendía á necesidade da transmisión xeracional do idioma. 37 anos despois o tema volve estar sobre a mesa, xa que todos os indicadores sinalan a transmisión do galego como un problema grave, aínda que non o único. Sobre este aspecto incide a XXIII edición dos Encontros para a normalización lingüística que organiza cada ano o Centro de Documentación Sociolingüística de Galicia (CDSG), arquivo do Consello da Cultura Galega (CCG). Os vídeos coas intervencións das persoas participantes xa están dispoñibles desde o web do CCG e o vindeiro xoves 4 de novembro terá lugar a xornada presencial de debate.

A partir de 1959 a emigración galega dirixiuse cara a aqueles países europeos que se atopaban en pleno desenvolvemento industrial e tecnolóxico e que precisaban man de obra estranxeira. Alemaña, Suíza, Francia e Holanda, seguidos do Reino Unido e Bélxica convertéronse nos países de destino das novas vagas migratorias. A duodécima entrega do especial “Historias de ida e volta”, un proxecto web realizado polo Consello da Cultura Galega en colaboración coa Secretaría Xeral da Emigración, ofrece fotografías e documentos que poñen de manifesto a emigración galega cara a Europa nos anos setenta e setenta.

Nieves Fernández Vidueira é escritora, fotógrafa, tallista da madeira, deseñadora e creadora de traxes, disfraces e máscaras de entroido, aínda que ela se define a si mesma como criadora de ovellas. A súa figura é obxecto da xornada homenaxe que o Centro de Documentación en Igualdade e Feminismos (CDIF) do Consello da Cultura Galega (CCG) lle fai este xoves, 21 de outubro. A cita pretende ser un espazo de reflexión arredor da diversidade das contribucións das mulleres do rural no mantemento dun espazo social, económico e natural. A presidenta do Consello da Cultura, Rosario Álvarez; a directora do CDIF, María Xosé Porteiro; máis as coordinadoras da xornada, Lucía Oca e Rosa Arcos, inauguran esta cita presencial que tamén se pode seguir en directo por internet.

Antonio Culebras (Santiago de Compostela, 1907-Becerreá, 1954) foi un destacado médico internista republicano cuxa traxectoria vital e profesional estivo moi marcada pola Guerra Civil Española e a súa represión posterior. Xose Antón Fraga asina a súa biografía no Álbum de Galicia.

Coñecer a diferenza entre subvencións, patrocinio, mecenado, investimentos inmateriais, doazóns modais, premios..., é dicir, os procedementos que ten a administración para apoiar a actividade cultural. Este é o obxectivo do curso “Fomento do sector cultural” que o Consello da Cultura Galega organiza mañá xoves, no marco do convenio asinado coa Asociación Profesional de Letrados da Xunta de Galicia para ofrecer formación específica arredor dos procedementos e fórmulas administrativas para o fomento da actividade cultural. O curso é presencial pero pode seguirse en directo desde o web da institución.

O 28 e 29 de marzo de 1987 tivo lugar en Santiago os II Encontros Galegos de Feministas. A documentación desta cita (materiais publicitarios, textos manuscritos e otros recursos) conforman a terceira entrada de Sextina, proxecto do Centro de Documentación en Igualdade e Feminismos (CDIF) para visibilizar rarezas e documentos pouco coñecidos por mor da súa antigüidade, tipoloxía, forma de produción, procedencia ou xeito de difusión.

Tradutores emerxentes e consolidados de poesía de lingua catalá, galega e vasca a polo menos unha destas linguas. A eles está dirixido o proxecto de Residencia de tradución de poesía que convoca o Institut Ramon Llull coa colaboración do Consello da Cultura Galega (CCG) e o Etxepare Euskal Institutua. A convocatoria, que ten aberto o prazo de recepción de candidaturas ata o 15 de novembro, busca promover un intercambio entre as persoas seleccionadas ao tempo que desenvolven un proxecto de tradución individual.

Coñecer o estado dos fondos sonoros galegos en entidades como a Biblioteca Nacional de España, Biblioteca de Catalunya, Fundación Barrié, Compañía de RTVG, Museo do Pobo Galego e Museo Etnolóxico de Ribadavia e, ao tempo, concienciar na importancia de conservar o noso fondo sonoro. Este é o obxectivo da xornada “A preservación do patrimonio sonoro galego en arquivos, museos e fundacións”. A cita, que se desenvolve este venres, está coordinada por Xosé Ramón Pousa, director do Arquivo Sonoro de Galicia.

“Poeta sen volta e novelista de prosa transparente” así define Xosé Ramón Fandiño ao escritor, poeta e ensaísta Ramiro Fonte (Pontedeume, 1957 - Barcelona, 2008) na súa entrada do Álbum de Galicia. É a última incorporación deste proxecto dixital que xunta biografías de persoas que destacaron en moi diversos ámbitos da cultura galega.

O xornalista Xesús Fraga (Londres, 1971) acaba de ser galardoado co Premio Nacional de Narrativa que concede o Ministerio de Cultura e Deporte pola súa obra Virtudes (e misterios). O fallo do xurado destaca que a obra mostra "cunha prosa moi coidada, no fondo e na forma, a historia de dúas xeracións de mulleres valentes dunha familia en tempos hostís, e profunda nun relato sobre a emigración galega en Inglaterra e América”. Fraga é membro do Arquivo da Emigración Galega do Consello da Cultura Galega.

O papel das mulleres nas crises, o patrimonio como instrumento de cohesión social e o contexto da solidariedade e a fraternidade son as ideas centrais do III Ciclo de Cinema Galego-Portugués Mulleres, Patrimonios, Sociedade que mañá comeza no auditorio da Casa das Artes de Arcos de Valdevez (Portugal). Está organizado pola Sección de Patrimonio e Bens Culturais do Consello da Cultura Galega (CCG) e a Universidade do Minho. A cita, que cada día presenta unha curtametraxe e un filme seguido dun debate co público no que participan os seus realizadores, arrinca mañá coa proxección do filme Nación de Margarita Ledo. Na inauguración estará presente a presidenta do CCG, Rosario Álvarez, o presidente do municipio arcuense, João Manuel Esteves, e a vicereitora da Universidade do Minho, Manuela Martins.

Tentou de incorporar unha visión experimental da xenérica moderna e contribuíu á modernización dos tratamentos terapéuticos dos balnearios. Jimena Fernández de la Vega (Veiga, Asturias 1895-Santiago, 1984) desenvolveu unha ampla traxectoria profesional que a levou por centros punteiros europeos. Pero tamén foi unha persoa familiar, loitadora e comprometida. As facetas profesional e persoal xúntanse en Jimena Fernández de la Vega. Un modelo de científica adiantada ao seu tempo que hoxe presentaron a presidenta do Consello da Cultura Galega, Rosario Álvarez; Juan M. Lema presidente da Real Academia de Ciencias e a súa sobriña, María Teresa Fernández de la Vega, presidenta do Consello de Estado. O volume, coordinado por Antón Álvarez Sousa, pretende ser unha homenaxe a esta muller recoñecida este ano co Día da Ciencia en Galicia e que se celebra cada 8 de outubro.

Voces que contribúen a indagar ao redor da ciencia galega do século XX. Esta é a idea central de Voces da Ciencia o proxecto no que o Consello da Cultura Galega e a Asociación Galega de Comunicación de Cultura Científica e Tecnolóxica pretenden indagar ao redor da memoria da ciencia galega recente a través dos seus protagonistas. Cada mes unha nova entrega que arrinca hoxe, 8 de outubro, Día da Ciencia en Galicia, coa voz do químico Fernando Fraga.

Xela Arias (Sarria, 1962-Vigo, 2003), a protagonista do Día das Letras Galegas 2021, ten unha conexión ineludible co recoñecido escritor Gianni Rodari. En 1986 colaboraba co seu pai, Valentín Arias, na tradución da popular obra do mestre da fantasía, Contos ao teléfono, para a editorial Juventud. Dese fío tira o Consello da Cultura Galega (CCG) no proxecto “Xela e Gianni”, unha serie de podcast elaborados por Charo Pita que adapta a formato sonoro os textos traducidos por Xela hai vinte e cinco anos. Ademais, este xoves 7 de outubro, o Consello da Cultura Galega e o concello de Sarria ofrecen un contacontos (en dous pases) desta obra para douscentos alumnos de primaria desta localidade.

Perfecto Feijoo (Pontevedra, 1858 – 1935) foi moito máis que o boticario da Peregrina. Foi tamén o Gaiteiro do Lérez, un apaixoado da música tradicional que fundou Aires d’a Terra o primeiro gran coro galego que sentou unha forma de entender e vivir a música do país. Francisco Javier Garbayo Montabes asina a nova entrada do Álbum de Galicia.

Suíza, Francia, Reino Unido ou Alemaña volven ser o destino de moitos galegos e galegas. Desde o ano 2008 rexístrase un aumento da mobilidade que se deu en chamar unha nova vaga migratoria que ten unha serie de características singulares: son xente formada, colectividades que fan un uso intensivo das redes sociais, e trasládanse cara a destinos europeos. Sobre este fenómeno artéllase o seminario “Novas diásporas” que organiza o Consello da Cultura Galega. A vogal da Comisión Executiva, María Xosé Porteiro, e a coordinadora do seminario, Antía Caramés, inauguran mañá xoves esta cita presencial que tamén se pode seguir pola rede.

O Consello da Cultura Galega (CCG) acolle mañá a primeira das tres actividades desenvolvidas no marco do convenio asinado coa Asociación Profesional de Letrados da Xunta de Galicia para ofrecer formación específica arredor dos procedementos e fórmulas administrativas para o fomento da actividade cultural. Titúlase “A actividade administrativa da contratación pública” e pretende dar a coñecer as claves da contratación pública para ámbito cultural. A presidenta do CCG, Rosario Álvarez, e o presidente da Asociación Profesional de Letrados da Xunta de Galicia, Manuel Fuertes, inaugurarán mañá este curso que ten as prazas están cubertas pero que se pode seguir en directo desde o web da institución.

A presidenta do Consello da Cultura Galega, Rosario Álvarez, recibiu esta tarde ao director xeral da Comunidade de Países da Lingua Portuguesa (CPLP), Armindo Brito Fernández, nunha visita institucional. É a primeira vez que o actual director da CPLP visita as instalacións do CCG onde ademais de asinar no libro de honra da institución, mantivo unha xuntanza na que abordaron futuras colaboracións e fixaron novos proxectos comúns.