Valentina Formoso Gosende

Profesora das materias de Lingua galega e de Portugués no IES Félix Muriel de Rianxo, onde coordina o Equipo de Normalización Lingüística. É tamén a coordinadora xeral da Coordinadora Galega de Equipos de Normalización e Dinamización Lingüística (CGENDL) desde 2009. Compaxinou sempre a súa vida laboral coa investigación en sociolingüística. Comezou a súa carreira laboral no departamento de normalización lingüística da Confederación de Empresarios de Galicia (CEG), experiencia que lle serviu para, ademais de elaborar varios materiais lingüísticos para o ámbito económico e empresarial, sentar as bases do que sería a súa tese de doutoramento: A lingua galega no ámbito empresarial: usos e representacións sociolingüísticas. A experiencia do ámbito do ensino secundario e dos Equipos de Normalización avalou outra investigación que se concretou na súa última publicación, o libro Do estigma á estima. Propostas para un novo discurso lingüístico (2013, Ed. Xerais). Ten publicado varios artigos arredor destas dúas áreas de investigación e tamén sobre terminoloxía, ámbito en que afondou durante a súa estadía en TERMIGAL.