Manuel Bragado

Vigo, 1959. É mestre, editor e activista cultural. Na actualidade, orientador do CEIP de Laredo e CEIP de Cedeira de Redondela, foi director xeral de Edicións Xerais de Galicia S.A., dende 1994 a 2018. Licenciado en Ciencias da Educación pola Universidade de Santiago (1976-1981), foi profesor da materia «Edición e actividade editorial» do Mestrado en Edición 2009/2010 das Universidades de Vigo e Santiago de Compostela. É presidente da Fundación Luzes, secretario da Asociación Premios da Crítica de Galicia, membro do Consello de Cooperación Bibliotecaria de Galicia, do padroado da Fundación Celso Emilio Ferreiro, da Sociedade Jules Verne de Vigo, de ProLingua e de Nova Escola Galega. Foi presidente da Asociación Galega de Editores (2010-2014), de Culturgal (2014-2017), da asociación pedagóxica Nova Escola Galega (1986-88), director da Revista Galega de Educación (1986-2000), membro da sección de «Lingua, literatura e comunicación» do Consello da Cultura Galega e redactor do documento «Lingua e edición» da ponencia de Lingua e Cultura do Proxecto Galicia 2010. Colaborador de Faro de Vigo, publica semanalmente dende 1999 a sección «Campo de Granada», sobre actualidade socio-cultural de carácter local, pola que obtivo o Premio Gómez Román (2000) e o premio de xornalismo en lingua galega Fernández del Riego 2014. Dende 2005 mantén aberto o blog Brétemas (https://bretemas.gal), espazo polo que recibiu o Premio AELG Blog Literario 2010, o Premio Fervenzas Literarias ao mellor blog dos anos 2009, 2010, 2011 e 2012 e o Premio Gala do Libro Galego 2019 a traxectoria dun proxecto literario na rede. Ten dirixido a elaboración e os proxectos didácticos de máis de catro centenares de libros de texto dirixidos á educación non universitaria; deseñou e dirixiu varias colección de literatura e literatura infantil e xuvenil, publicou varios libros de carácter pedagóxico, estudos sobre o estado da edición en lingua galega, o libro para primeiros lectores Dona Carme (Ir Indo edicións, 1989) e Vigo, puro milagre (Xerais , 2019), onde reuniu setenta e cinco textos xornalísticos de Campo de Granada.