Difusión - Traballadoras. Martes, 7 de xullo de 2026
Difusión

Traballadoras

  1. Inicio
  2. Eventos
  3. Sextina
  4. Difusión

Sextina Difusión

Traballadoras

Martes, 7 de xullo de 2026
consellodacultura.gal
Difusión
Sextina

Traballadoras

consellodacultura.gal

O Centro de Documentación en Igualdade e Feminismos (CDIF) do Consello da Cultura Galega (CCG) incorpora ao proxecto “Sextina”, que inclúe rarezas e documentos pouco coñecidos do seu fondo, o catálogo Traballadoras. Trátase dunha publicación da Secretaría da Muller da Confederación Xeral de Traballadores Galegos (CXTG) de 1990 que permite recuperar un testemuño fundamental sobre o traballo das mulleres en Galicia ao longo do século XX.
En 1990, con motivo da conmemoración do Día da Muller Traballadora, a Secretaría da Muller da CXTG editou o catálogo que recolle as pezas que integraron a exposición fotográfica do mesmo título, celebrada en Vigo arredor do 8 de Marzo de 1989. Un libro que ofrece un percorrido visual e literario pola presenza das mulleres no mundo laboral nas oito primeiras décadas do século XX. As súas páxinas amosan os lugares ocupados por elas no agro, no mar, na gandería e na industria, así como a súa participación na defensa e na loita pola terra, traendo para a memoria colectiva aspectos da vida das mulleres que durante moito tempo permanceron invisibilizados. Un documento que contribúe ao estudo da historia das mulleres, do movemento sindical e da fotografía documental en Galicia.

O valor documental da publicación reside tamén na diversidade e relevancia das voces e miradas que a conforman. As fotografías históricas máis antigas proceden do Arquivo de Pontevedra e levan a sinatura de Pedro Ferrer, José Pardo Reguera, Otto Wunderlich, Joaquín Pintos, José Suárez, Llanos, Julio F. de los Ríos e Enrique Saravia, autores que documentaron a transformación da sociedade galega durante as primeiras décadas do século XX.

As imaxes correspondentes aos anos setenta e oitenta son obra dalgúns dos fotógrafos e fotógrafas máis destacados da fotografía documental e do fotoxornalismo, como Xurxo Lobato, Raquel, Xulio Gil, Demi Álvarez, Sebastião Salgado, Josep Gol, Manuel Sendón, Anna Turbau e Chus García. As súas fotografías achegan unha mirada comprometida coa realidade social e laboral das mulleres galegas nun período de importantes transformacións.

O catálogo complétase cunha escolma de textos literarios e ensaísticos asinados por figuras destacadas da cultura galega, entre elas Moncha Fuentes e Margarita Ledo, xunto con poemas de Rosalía Castro, María Mariño, Luz Pozo Garza, Xohana Torres, María do Carme Krukenberg e Xela Arias. A combinación de imaxes e palabras contribúe a construír un relato plural sobre o traballo feminino, a identidade e a memoria.

“Sextina”
“Sextina” é un proxecto do Centro de Documentación en Igualdade e Feminismos (CDIF). Ten como obxectivo dar visibilidade a aqueles libros, folletos ou documentos que compoñen os fondos do CDIF e que se consideran de especial interese, ben pola súa rareza, ben por seren pouco coñecidos debido á súa antigüidade, tipoloxía, forma de produción, procedencia ou xeito de difusión. Cada seis meses, e dende novembro de 2020, a "Sextina" incorpora unha nova publicación. A mulher hoje (1983), considerado como un dos primeiros documentos sobre educación non sexista publicados en Galicia; a Carta dos dereitos da muller traballadora (1983), folleto para reclamar a eliminación das discriminacións legais e a igualdade de oportunidades entre sexos, ou As mulleres tamén temos algo que decir sobre as eleccións (1982), no que se recollen unha serie de esixencias destinadas a erradicar a discriminación das mulleres, son algunhas das obras que conforman o proxecto. Entre os máis recentes destaca Las familias de la provincia de Pontevedra en 1974 unha publicación que recolle unha investigación promovida polo Instituto de Ciencias da Familia (INCIFA) e a Universidade de Notre Dame (Indiana) que fala sobre os usos lingüísticos das familias pontevedresas, nomeadamente das nais. Publicouse tamén un número de As follas de Sísifo, revista literaria promovida polo Café Uff de Vigo na primeira metade da década dos oitenta, que falaba, entre moitos temas do sexismo, patriarcado ou franquismo nos anos oitenta. A publicación daba voz ao activismo de colectivos minoritarios vencellados á cultura alternativa da cidade de Vigo.
Ligazóns
Prensa
07-07-2026

O CDIF pon na rede Traballadoras, catálogo que visibiliza a presenza das mulleres no mundo laboral

Temáticas
Igualdade
 
Difusión
Sextina
Traballadoras
Data de publicación
Martes, 7 de xullo de 2026
Onde
consellodacultura.gal
Autoría
Centro de Documentación en Igualdade e Feminismos (CCG)
Centro de Documentación en Igualdade e Feminismos (CCG)