A xornada consiste nunha mesa redonda que pretende profundar no vínculo do galeguismo coa emigración e o exilio a partir da figura de Francisco Fernández del Riego, colaborador frecuente na prensa galega e galeguista da emigración e do exilio dende a súa mocidade e, de maneira particular nos anos da posguerra, co pseudónimo Salvador de Lorenzana. Nas súas crónicas informaba aos ausentes da evolución cultural, social e económica de Galicia e, como representante do galeguismo do interior, mantivo un elo estreito cos galeguistas do exilio. Sobre isto falarán Xosé M. Núñez Seixas e Malores Villanueva cos relatorios “Fernández del Riego e o galeguismo do exilio” e “Fernández del Riego: como salvar a inmensidade atlántica” respectivamente.


A xornada serve tamén de homenaxe a unha bisbarra con alta emigración a América que deu fillas ilustres ás letras uruguaias como Juana de Ibarbourou, sobre a que falará Pilar Cagiao na súa intervención “Juana de Ibarbourou: gallega, oriental y criolla”. Tamén participa o historiador Prudencio Viveiro Mogo cun relatorio titulado “As sociedades de instrución da Mariña: “Hijos de Lorenzana”

O CCG e Fernández del Riego
A programación deseñada pola institución para esta edición do Día das Letras Galegas buscaba recoñecer tanto a faceta poliédrica de Francisco Fernández del Riego como o seu inesgotable traballo en prol da cultura do país. Arrincou en xaneiro, coincidindo co aniversario do nacemento de Del Riego, cun espazo web que concentra todos os materiais e recursos desenvolvidos ou promovidos pola institución arredor da figura de Francisco Fernández del Riego. Inclúe información biográfica, audios, audiovisuais e outros materiais, entre os que destacan os fondos epistolarios de Fernández del Riego que se conservan no Consello da Cultura e o “Cartafol de prensa”, coa publicación das súas colaboracións xornalísticas na prensa da emigración en América.

En maio, ao fío do Día das Letras, publicou a edición facsimilar con estudo crítico de “Na espera do amigo”, unha rareza na produción de Fernández del Riego; tamén celebrou o Concerto das Letras Galegas no que se estreou unha peza composta polo pianista e compositor vigués Brais González Pérez a partir de dous poemas escritos en homenaxe a don Paco e mais da súa cantiga tradicional A miña burriña, que Del Riego entoaba acotío nalgunhas celebracións. A peza constaba de tres movementos: «Cabeleira de néboas», baseado no poema do recentemente finado Salvador García-Bodaño; «A miña burriña», composta a partir da cantiga popular, e «Corazón do país», baseado nun texto de Xaime Isla Couto, con quen compartiu unha fonda amizade