“Ante a dificultade de recompilar toda a información posible sobre a violencia de xénero e a violencia sexual, así como os recursos e os programas existentes, optouse por elaborar un manual”, explica Carme Adán no texto de presentación da actividade. O manual que se presenta o luns está dividido en tres apartados fundamentais: un primeiro dirixido a recoñecer as diferentes formas de violencia, un segundo centrado nos percorridos xurídicos, co obxectivo de orientar as mulleres e mozas que dan o paso de presentar unha denuncia, e por último un terceiro apartado en que se recollen programas, recursos e axudas aos que se pode acceder hoxe en Galicia.

Este documento está dirixido a todas as mulleres e mozas que poidan atoparse nunha situación de violencia machista, mais tamén ás profesionais que todos os días traballan na prevención ou erradicación da violencia. O documento foi elaborado por unha comisión que coordinou Carme Adán e na que participaron Victoria Rey Mariño, Belén Puñal Rama e Cristina Martínez Fernández, que asistirán á presentación.


A presentación do manual é o peche dunha xornada en que se abordará a situación actual das violencias machistas. A actividade comeza ás 17:00 horas cunha mesa redonda coordinada por Belén Puñal, na que participarán Concha Fernández, psicóloga e coordinadora da Comisión Interseccional Feminista do Colexio Oficial de Psicoloxía de Galicia; Ana G. Liste, xornalista de Praza Pública e vogal da Xunta de Goberno do Colexio Profesional de Xornalistas de Galicia; Cristina Martínez Fernández, avogada e asesora xurídica do Centro de Información á Muller de Arteixo, e Laura Seara, consultora e exsecretaria de Estado de Igualdade.