Estas gravacións, nas que se conserva unicamente a voz do propio Otero Pedrayo, constitúen un testemuño sonoro da súa oratoria, do seu pensamento e do seu compromiso coa cultura galega no exterior. Son conferencia que se producen no contexto das Xornadas Patrióticas Galegas organizadas pola colectividade emigrante que xurdiron como resposta á necesidade de dotar o 25 de xullo dun contido que excedese o mero feito relixioso, e foron medrando en prestixio ata converterse nun acontecemento sen parangón entre as colectividades estranxeiras radicadas no país, tanto pola súa periodicidade como pola súa amplitude. O Centro Galego era unha das principais institucióna que desenvolvían actividade cultural arredor desta data. Entre os materiais publicados inclúese a conferencia "Cinco noites en Compostela. Clausura das Xornadas Patrióticas Galegas", gravada no Centro Galego de Bos Aires o 31 de xullo de 1959, na que o autor ofrece un percorrido evocador polas rúas de Compostela e pola súa historia, cunha prosa suxestiva que invita a ser escoitada mentres se percorre a cidade, especialmente en días de chuvia. Tamén forma parte desta selección a súa intervención na homenaxe ao mestre José Pazos, celebrada no Centro Lucense o 19 de xullo dese mesmo ano, onde louba a figura do músico nunha breve mais intensa peza de carácter patriótico.
Así mesmo, recóllese a súa participación na inauguración das Xornadas Patrióticas Galegas no Teatro Avenida, o 19 de xullo de 1959, onde, como convidado de honra, agradece as palabras de presentación e exalta a lingua e a paisaxe galegas como sinais identitarios do pobo galego. Complétase a selección coa conferencia La Universidad de Santiago de Compostela, pronunciada no Ateneo Ibero-Americano o 18 de agosto de 1959, na que realiza un amplo percorrido pola historia da Universidade de Santiago de Compostela desde a súa fundación en 1495, evocando figuras ilustres e espazos de grande valor histórico e artístico.
Por último, inclúese tamén a intervención na inauguración do curso de AGUEA, celebrada no Centro Galego o 19 de agosto de 1959, na que Otero Pedrayo desenvolve unha reflexión profunda sobre o espírito galego, amosando a súa ampla erudición e deténdose especialmente en aspectos da historia da arte, nomeadamente nas etapas románica e barroca.
A publicación destes audios permite recuperar e difundir unha parte esencial do legado oral de Otero Pedrayo, ao tempo que contribúe a poñer en valor a intensa actividade cultural desenvolvida pola emigración galega en Bos Aires a mediados do século XX. Trátase, en definitiva, dunha oportunidade única para escoitar directamente a voz dunha das figuras máis senlleiras da cultura galega contemporánea.
Unha páxina en permanente actualización
En xaneiro deste 2026, no marco do “Ano Oteriano” que celebra o 50 cabodano, o CCG abriu na rede un espazo que concentra todos os recursos elaborados pola institución ao fío do patriarca das letras galegas. Discursos, epístolas, publicacións, gravacións sonoras, especiais, a entrada biográfica e outros fondos documentais (artigos, manuscritos, etc.) compoñen este espazo que estará en permanente actualización.
