A xornada reunirá catro voces procedentes dos ámbitos da pedagoxía, a filosofía, a investigación educativa e a creación ensaística para reflexionar sobre os retos actuais do ensino, os modelos pedagóxicos e o papel da educación na sociedade contemporánea.

A sesión da mañá abrirase coa intervención de Almudena Alonso, que abordará Aprendizaxe cooperativa: Como soporta a LOMLOE unha didáctica avanzada?. Licenciada en Psicopedagoxía pola Universidade de Santiago de Compostela e doutora en Deseño e Innovación na Formación pola mesma universidade, é profesora na Facultade de Ciencias da Educación da Universidade de Vigo. A súa intervención centrarase na aprendizaxe cooperativa e na súa relación co marco educativo actual.

Rebeca Baceiredo achegará a conferencia A ideoloxía da neutralidade. Licenciada en Ciencias da Comunicación pola Universidade de Santiago de Compostela e doutora en Filosofía, foi distinguida co Premio de Ensaio Ramón Piñeiro e propón abrir unha reflexión sobre a idea de neutralidade e as implicacións ideolóxicas que atravesan o pensamento e as prácticas educativas.

Inger Enkvist, licenciada en Filoloxía Francesa e doutora en Letras pola Universidade de Gotemburgo, é catedrática emérita de Filoloxía Española na Universidade de Lund e unha recoñecida hispanista especializada en pedagoxía e educación. A súa conferencia, titulada Que é unha boa Educación e por que non a temos?, formulará unha reflexión sobre os criterios que definen unha educación de calidade e os desafíos que afrontan os sistemas educativos para alcanzala.
O programa pecharase coa intervención de Javier Mestre, Por que defender o sistema público de ensino?. Licenciado en Xornalismo pola Universidade Complutense de Madrid, é catedrático de ensino secundario na especialidade de Lingua e Literatura Castelá. Ademais da súa actividade docente, é autor de varias novelas e do ensaio Escuela y libertad, escrito en colaboración con Carlos Fernández Liria. A súa participación abordará a importancia do ensino público e a súa función na sociedade.