A aplicación da LOMLOE, a aprendizaxe cooperativa, a carga curricular e burocrática do profesorado, a neutralidade ideolóxica nos centros e a relación entre coñecemento, pensamento crítico e igualdade de oportunidades son algúns dos aspectos que diferentes especialistas en educación abordaron no marco da Xornada “O debate na educación, onde estamos?” que organizou a Sección de Pensamento do Consello da Cultura Galega (CCG) ao longo deste xoves 22 de outubro. A presidenta do CCG, Dolores Vilavedra, reivindicou a importancia de abrir espazos de análise que permitan abordar os problemas educativos desde unha perspectiva ampla e reforzar a comunicación coa comunidade educativa. “Na educación nos acontece un pouco isto: xa non é o momento de cambiar as regras do xogo, senón que é o momento de cambiar de xogo”, afirmou, recuperando unha reflexión da escritora Begoña Caamaño. Canda ela a coordinadora da Sección, Celia Pereira, apuntou á necesidade de ir máis alá das ferramentas e das estratexias concretas para repensar o sentido mesmo de educar e formar. As intervencións da sesión foron gravadas e pódense recuperar desde a canle de YouTube.
23/10/2026
21/10/2026
Cales son as características dun bo sistema educativo? Témolo ou estamos aínda lonxe? De que maneira a liberdade de cátedra contribúe a unha educación rica e plural? Que se pon en perigo cando se pretende guiar esa liberdade por sendas marcadas de “neutralidade”? Por que importa unha educación pública de calidade? Estas son algunhas das cuestións ás que pretende respostar este xoves 22 (a partir das 10:00 horas) a xornada “O debate da Educación: Onde estamos?” que propón a Sección de Pensamento do Consello da Cultura Galega (CCG), que coordina Celia Pereira. Almudena Alonso Ferreiro, Rebeca Baceiredo Pérez, Inger Enkvist, Javier Mestre Marcotegui particinan nesta sesión presencial que se pode seguir en directo desde o web corporativo e a canle de YouTube.
16/10/2026
O ciclo «A cultura como refuxio» inaugúrase cunha xornada sobre cultura e reivindicacións feministas
O Consello da Cultura Galega (CCG) inaugura este luns 19 de outubro (a partir das 16:30 horas) o ciclo de pensamento e cultura “A cultura como refuxio” que pretende abrir un espazo de reflexión compartida arredor do papel que desempeña a cultura nun contexto contemporáneo marcado pola incerteza e as desigualdades, pero tamén pola reivindicación da identidade propia. A primeira sesión, titulada “O papel da cultura na (des)igualdade”, conta coa participación de Nuria Varela, Yolanda Domínguez e María Lapido e reflexiona sobre o papel da creación artística fronte ás desigualdades de xénero. A sesión coordinada por Uxía Caride é presencial e pode seguirse en directo no web do CCG e a canle de YouTube.
23/09/2026
A intelixencia artificial está a transformar a maneira na que traballamos, creamos, nos informamos e nos relacionamos coa tecnoloxía. Sobre as preguntas que suscita sobre nós mesmos e sobre a sociedade que estamos construíndo, dialogarán o xornalista e escritor Pedro Vallín e a especialista en intelixencia artificial Alba Meijide na nova sesión do ciclo “Pensarmos” (xoves, 24 de setembro, ás 18:00 horas) organizada pola Sección de Pensamento do Consello da Cultura Galega (CCG). A sesión presencial, que leva por título “IA: hai alguén ao outro lado?”, poderá seguirse tamén en directo a través do web do CCG e da canle de YouTube.
26/06/2026
“É posíbel un turismo sustentábel?” É o título da xornada coa que a Sección de Pensamento do Consello da Cultura Galega (CCG) xunta este martes (30 de xuño, 9:30 horas) a profesionais do ámbito da economía, a xeografía, o urbanismo, a xestión turística e o desenvolvemento local a reflexionar sobre os posibles modelos turísticos. A cita busca contrastar a análise académica cos casos reais de territorios e comunidades que viven diariamente os efectos do turismo. Dolores Vilavedra, presidenta do CCG, e Celia Pereira, coordinadora da sección e da xornada, abren esta sesión que se pode seguir en directo desde o web e a canle de YouTube do CCG.
01/06/2026
O Consello da Cultura Galega (CCG), a través da Comisión técnica de xestión e políticas culturais e a Sección de Pensamento, abre este martes (2 de xuño, 16:45 horas) a primeira sesión do ciclo “A cultura como refuxio”, unha iniciativa que nace coa vontade de abrir un espazo de reflexión compartida arredor do papel que desempeña a cultura nun contexto marcado pola aceleración tecnolóxica, a crecente dixitalización da vida cotiá e a sensación de exposición permanente que caracteriza as sociedades contemporáneas. “Sociedades da vixilancia” é o titulo desta xornada inaugural que analiza, da man de especialistas como Marta Peirano, o papel da cultura fronte ás lóxicas de control e monitorización. A sesión pode seguirse en directo desde o web do CCG e a canle de YouTube.
06/05/2026
A nova sesión do ciclo “Pensarmos”, que organiza a Sección de Pensamento do Consello da Cultura Galega (CCG) este xoves 7 de maio (na sede da institución, ás 18:00 horas) convida a unha reflexión sobre as guerras actuais da man do escritor e pensador Carlos Taibo (Madrid, 1956). Baixo o título “A guerra como elección” ofrecerá unha intervención en formato diálogado con Celia Pereira, coordinadora do ciclo e tamén da Sección. A xornada poderá seguirse en directo desde o web institucional e a súa canle de YouTube.
25/03/2026
Víctor Sampedro Blanco (Viveiro, 1965) leva anos analizando a propaganda e a desinformación na democracia. É o protagonista da sesión do ciclo “Pensarmos”, que organiza a Sección de Pensamento do Consello da Cultura Galega (CCG) este xoves 25 de marzo (na sede da institución, ás 18:00 horas). Baixo o título “O poder da mentira: como combater a pseudocracia”, ofrecerá unha intervención en diálogo co xornalista e especialista en comunicación política Marcos S. Pérez Pena. A cita está coordinada por Celia Pereira Porto e poderá seguirse en directo desde o web institucional e a súa canle de YouTube.
21/01/2026
O ciclo “Pensarmos”, que organiza a sección de Pensamento do Consello da Cultura Galega (CCG) ten este xoves (22 de xaneiro, 18:00 horas) unha nova sesión. Baixo o titulo “Derivas totalitarias no século XXI”, Cristina Sánchez Muñoz (Melilla, 1959), filósofa que aborda a violencia contra as mulleres en contextos armados, analizará o contexto actual. A súa intervención terá formato dialogado co profesor de filosofía Antonio Fernández Segade. A cita está coordinada por Celia Pereira Porto e emítese en directo desde o web institucional e a súa canle de YouTube.
03/11/2025
A sección de Pensamento do Consello da Cultura Galega (CCG) organiza este martes (4 de novembro, 10:15 horas), a xornada “Sen Ítaca, con esperanza: O legado de Juan Ramón Capella Hernández. A cita está coordinada por Celia Pereira Porto e busca poñer o foco na dimensión filosófica e o seu compromiso coa transformación social. A xornada desenvólvese en dous espazos: pola mañá na sede do CCG e pola tarde na na Facultade de Filosofía.
25/09/2025
O exfiscal superior de Galicia, Carlos Varela, alertou que a expansión da intelixencia artificial supón riscos serios de vulneración dos dereitos fundamentais, que van desde a privacidade ata a igualdade, e subliñou a necesidade de garantir marcos normativos sólidos que protexan a cidadanía. A súa intervención, en diálogo co avogado Xoán Antón Pérez Lema, fixo unha análise dos riscos que un uso indebido da intelixencia artificial (IA) supón para os dereitos humanos. A sesión insírese no marco do ciclo “Pensarmos”, que organiza a Sección de Pensamento do Consello da Cultura Galega (CCG). O vídeo da sesión está dispoñible para consulta no web e na canle de YouTube da institución.
25/09/2025
Conferencias, recitais e espectáculos poñen o foco na relación entre sexo e filosofía, eixes sobre os que pivota a terceira edición do Festival de Filosofía de Galicia que organiza a Sección de Pensamento do Consello da Cultura Galega (CCG). O filósofo e ensaísta Carlos Fernández Liria, xunto coa xornalista e investigadora Elena Lázaro Real participan neste certame que entrecruza palabra con manifestacións artísticas e que nos fai pensar da relación entre corpo e pensamento, pracer e palabra, ética e erotismo. As actividades, que se desenvolven venres e sábado no Centro sociocultural Maruxa e Coralia e no CGAC en Santiago de Compostela, non se emiten en directo.
21/05/2025
A antropóloga María Dolors Comas d’Argemir (Barcelona, 1951) defenderá este xoves (18:00 horas) no Consello da Cultura Galega (CCG) unha visión crítica e transformadora dos coidados, especialmente no contexto actual no que se produce un avellentamento progresivo da poboación. A súa intervención, que terá carácter dialogado con Ana Isabel García Arias (Lugo, 1968), profesora de economía aplicada da Universidade de Santiago de Compostela (USC), forma parte do ciclo Pensarmos co que a Sección de Pensamento do CCG propón reflexionar sobre cuestións de actualidade. A cita, coordinada por Celia Pereira Porto, emítese en directo desde o web institucional e a súa canle de YouTube.
26/03/2025
A arquitecta Teresa Táboas (Ciudad de México, 1961) reflexionará este xoves 27 de marzo (18:00 horas) no Consello da Cultura Galega (CCG) sobre os límites do territorio. A súa intervención forma parte do ciclo Pensarmos co que a Sección de Pensamento do CCG propón reflexionar sobre cuestións de actualidade. A cita, coordinada por Celia Pereira Porto, emítese en directo desde o web e a canle de Youtube da institución.
04/10/2024
O psicólogo clínico Xosé Ramón García Soto foi o encargado de abrir as “Xornadas Eloy Luis André” coas que o Consello da Cultura Galega (CCG) e o concello de Verín, se achegan á figura deste pioneiro da psicoloxía en España. A coordinadora da Sección de Pensamento do CCG, Celia Pereira, e a concelleira de cultura de Verín, Samanta Barreira, inauguraron este ciclo que programa todos os xoves de outubro unha sesión para profundar na vixencia do legado deste pensador.
26/09/2024
A Sección de Pensamento do Consello da Cultura Galega (CCG) retoma este xoves 26 de setembro (18:00 horas) o seu ciclo Pensarmos. Esta sección, coordinada por Celia Pereira Porto, porá o foco no actual conflito entre Israel e Palestina baixo a pregunta “é posible a paz?”. Contará cun coloquio entre o xornalista Josep Gisbert e o investigador e profesor universitario Juan Manuel Trillo, ambos moderados polo analista político e avogado Xoan Antón Pérez Lema. A sesión é presencial na sede da institución, pero tamén se pode seguir en directo a través do sitio web e as redes sociais do CCG.
06/06/2024
“Estamos en crise enerxética, que se debe á non-adaptación do sistema enerxético aos límites da biosfera. E esta crise provoca pobreza nas economías domésticas e no ámbito empresarial”, apuntaba a profesora e investigadora Rosa Regueiro no relatorio que abriu a xornada “A cuestión enerxética en Galicia: entre economía, territorio e sociedade”, organizada polo Consello da Cultura Galega (CCG). Durante dous días especialistas e investigadores, xunto con representantes de colectivos cidadáns implicados en procesos de implantación de enerxías renovables, defenderon a necesidade de definir un modelo de transición enerxética que respecte as comunidades locais, o territorio, a paisaxe, a biodiversidade e o patrimonio. A creación dunha zona franca para atraer a cadea de valor da enerxía, un sistema de tributación especial, a constitución dunha empresa pública de enerxía ou unha mellor planificación da ordenación do territorio son algunhas das medidas que se puxeron sobre a mesa. A presidenta do CCG, Rosario Álvarez, incidiu na inauguración en que esta xornada se insire nunha liña de traballo continuada da institución, “preocupada pola perda da diversidade, a situación real do clima e as consecuencias que pode ter o modelo enerxético sobre o patrimonio e os valores culturais do pobo galego”.
04/06/2024
A enerxía solar, a eólica…, en resumidas contas, as enerxías renovables son o futuro ante a crise do actual sistema enerxético. Sobre o seu modo de implantación e as diferenzas entre o que acontece en España e no resto de Europa, así como sobre a necesidade de conciliar o impacto a nivel económico, social, patrimonial e ambiental, falarán desde mañá no Consello da Cultura Galega (CCG) unha ducia de expertos e expertas. A xornada titulada “A cuestión enerxética en Galicia: entre economía, territorio e sociedade” está organizada polas seccións de Pensamento, de Patrimonio e Bens Culturais e de Ciencia, Tecnoloxía, Natureza e Sociedade do CCG. A presidenta do CCG, Rosario Álvarez, inaugurará esta cita presencial, que poderá seguirse en directo desde o web e as redes sociais da institución.
13/03/2024
A Sección de Pensamento do Consello da Cultura Galega (CCG) organiza mañá, 14 de marzo (18:00 horas), unha nova sesión do ciclo Pensarmos. A antropóloga e profesora Victoria Quintero é a convidada nesta ocasión para reflexionar arredor das desigualdades de xénero que existen na esfera patrimonial. A cita, coordinada por Celia Pereira Porto, desenvolverase de xeito presencial na sede da institución, pero tamén se poderá seguir en directo a través do sitio web e as redes sociais corporativas.
24/01/2024
O ciclo de reflexión e debate Pensarmos, promovido pola Sección de Pensamento do Consello da Cultura Galega (CCG), organiza mañá, 25 de xaneiro (18:00 horas), unha nova sesión. Desta volta, a convidada é a editora, escritora e exdeputada Mar García Puig, quen achegará a súa propia experiencia persoal para falar de saúde mental e do poder que ten a cultura como terapia. A cita está coordinada por Celia Pereira Porto e desenvolverase de xeito presencial na sede do CCG, aínda que tamén se poderá seguir en directo a través do sitio web e as redes sociais corporativas.
22/11/2023
A Sección de Pensamento do Consello da Cultura Galega (CCG) organiza mañá, 23 de novembro (18:00 horas), unha nova sesión do ciclo Pensarmos. Nesta ocasión, a convidada é a xornalista Sarah Babiker, quen falará dos fundamentos materiais que son necesarios para garantir a existencia dunha democracia efectiva e real. A cita é presencial, pero poderá seguirse en directo a través do sitio web e das redes sociais da institución.
31/10/2023
A obra literaria, cinematográfica, poética e xornalística de Pier Paolo Pasolini atende a conceptos como a liberdade, a violencia, a memoria, a xustiza, a felicidade ou o poder. Estas cuestións, que están de vixente actualidade, analizaraas o Consello da Cultura Galega (CCG) na xornada “O pobo canta: o pensamento político de Pier Paolo Pasolini”, cita coordinada por Simone G. Saibene e Celia Pereira Porto que terá lugar o vindeiro 7 de novembro no Centro Cultural Marcos Valcárcel de Ourense. A inscrición está aberta e pode facerse no web do CCG.
27/09/2023
O ciclo Pensarmos, organizado pola Sección de Pensamento do Consello da Cultura Galega (CCG) que coordina Celia Pereira Porto, regresa este xoves (18:00 horas) cunha nova cita sobre a calidade da democracia. Nesta ocasión, Xosé Ramón Veiga reflexiona sobre o tema a partir da análise dun período concreto da historia. A xornada leva por título “O máis difícil é aceptar a derrota: Pluralismo político, participación e democracia no século XIX”. A sesión é presencial e pode seguirse en directo desde o sitio web e as redes sociais da institución.
11/09/2023
“Trata, escravitude e prostitución non son a mesma cousa e é moi importante distinguilos para poder xerar políticas públicas nesta materia” explicaba a xurista Teresa García Montañés no Consello da Cultura Galega en 2019, quen tamén destacou que é un xigantesco negocio. “É o segundo negocio ilegal máis lucrativo do comercio internacional e move 150 billóns de dólares ao ano” afirmou no marco da súa conferencia titulada “A trata de seres humanos e escravitude contemporánea”. É unha das intervencións que destacamos no marco do proxecto que visibiliza 12 intervencións destes 40 anos do Consello da Cultura Galega (CCG).
05/06/2023
“Alimentos sen remordementos. Alternativas para unha cesta da compra sustentable” é o título da xornada que terá lugar este martes, 6 de xuño, no Vello Cárcere de Lugo. Organizada polas seccións de Pensamento e de Ciencia, Tecnoloxía, Natureza e Sociedade do Consello da Cultura Galega (CCG) co apoio do Concello de Lugo, a actividade ten como obxectivo analizar os diferentes modelos de produción e consumo alimentarios. A presidenta do CCG, Rosario Álvarez, inaugurará ás 10:00 horas esta cita, que coordinan María Teresa Barral, Iolanda Casal, Ana Isabel García Arias e David Soto. A sesión é presencial e non se poderá seguir en directo, pero será gravada e subida con posterioridade á hemeroteca do CCG.
24/05/2023
“O 15-M doce anos despois: crise do Réxime ou Restauración?” é o título da nova sesión do ciclo Pensarmos, que terá lugar o 25 de maio (18:00 horas), na sede de Portas Ártabras - Amigos dos Museos de Galicia da Coruña. Nela, Cristina Fallarás e David Rodríguez conversarán con Xoán Antón Pérez Lema arredor do movemento do 15-M e o que supuxo para España e para Galicia. A actividade está organizada pola Sección de Pensamento do Consello da Cultura Galega (CCG) e coordinada por Celia Pereira Porto. A xornada é presencial e non se poderá seguir en directo, pero será gravada e estará proximamente dispoñible na hemeroteca do CCG.
23/03/2023
A escritora, xornalista e expolítica María Xosé Porteiro (Madrid, 1952) participou esta tarde nunha nova xornada do ciclo Pensarmos, que organiza a Sección de Pensamento do Consello da Cultura Galega. Baixo o título de “A perplexidade democrática”, ofreceu un relatorio no que apuntou que estamos nun cambio de época que afecta á calidade da democracia, apuntou ás causas do seu desgaste e apuntou aos principais desafíos aos que se enfronta no século XXI. Na súa opinión cómpre “máis feminismo para máis democracia” e destacou que só unha cuarta parte da poboación vive nunha democracia plena. Luisa Martínez, membro da sección, ofreceu a réplica nunha sesión que inauguraron o vicepresidente, Xosé Manoel Núñez Seixas, e a coordinadora da Sección Celia Pereira.
22/03/2023
“A perplexidade democrática” é o título da nova sesión do ciclo Pensarmos, na que a escritora e xornalista María Xosé Porteiro falará de contradicións que se producen na democracia, da situación das mulleres en diferentes partes do mundo e de como a tecnoloxía mudou as relacións entre a cidadanía e os gobernos. Na sesión contará coa réplica de Luisa Martínez, responsable da Unidade de Cultura Científica do CSIC en Galicia. A sesión, organizada pola Sección de Pensamento do Consello da Cultura Galega (CCG), que coordina Celia Pereira, é presencial (xoves 23, 18:00 horas), pero poderá seguirse en directo a través do sitio web e das redes sociais da institución.
10/02/2023
“A filósofa do sacho” e “Cigarrón Butler” son dous dos capítulos do proxecto Sophias, co que o Consello da Cultura Galega (CCG) contribúe a divulgar o pensamento de mulleres destacadas da historia. Os dous proxectaranse este sábado en Allariz (Fundación Vicente Risco, 12:30 horas) nunha actividade na que participan Carme Adán, responsable do proxecto e directora do Centro de Documentación en Igualdade e Feminismos (CDIF), e Celia Pereira, presidenta da Fundación Risco e coordinadora da Sección de Pensamento do CCG. Tras a proxección haberá un coloquio co público.
24/01/2023
Sophias é a serie web de ficción coa que o Consello da Cultura Galega (CCG) e a Consellería de Promoción do Emprego e Igualdade, contribúen a divulgar o pensamento de mulleres destacadas da historia do pensamento. A responsable do proxecto, Carme Adán; a realizadora, Cristina de La Torre; máis o docente Manolo Torres presentan este mércores na Coruña (Instituto Eusebio Guarda, 12:00 horas) esta iniciativa que está formada por sete episodios que se achegan ás ideas de figuras coma Simone Weil, Simone de Beauvoir, Hannah Arendt, Judith Butler ou María Xosé Agra.