Arquivo de noticias do CCG

A tradución da Biblia dos idiomas orixinais ao galego, galardoada no seu momento co Premio Nacional de Tradución, foi un acontecemento destacado no que tivo moito que ver o empeño de Alfonso Zulueta de Haz, expresidente do Consello da Cultura Galega (CCG) e naquel momento presidente da Sociedade de Estudos, Publicacións e Traballos (SEPT). No ano en que se cumpre o centenario do nacemento de Zulueta, diferentes especialistas e teólogos lembraron a historia dos movementos sociais que impulsaron a galeguización da Igrexa e a figura de Zulueta. A presidenta do CCG, Rosario Álvarez, destacou na inauguración da xornada Igrexa e lingua na Transición “aqueles movementos illados e esperanzadores por unha liturxia en galego que foron paralelos á esperanza da recuperación dos dereitos lingüísticos tralo franquismo” ao tempo de lembrar a importancia que desenvolveu Zulueta neste contexto. Pola súa parte, Silvestre Gómez Xurxo, coordinador da cita, destacou que se quixo poñer o foco “en movementos destacados que van desde a tradución da Biblia ata as romaxes pasando pola revista Encrucillada”.

Igrexa e lingua na Transición é o título da xornada coa que o Consello da Cultura Galega (CCG) analizará, o vindeiro 23 de abril, os movementos e iniciativas a prol da galeguización da Igrexa neste período. A xornada é tamén unha homenaxe a figuras como Alfonso Zulueta de Haz, cando se fan cen anos do seu nacemento, quen tivo un papel destacado na tradución da Biblia ao galego. A cita, coordinada por Silvestre Gómez Xurxo, ten aberta a súa inscrición.

Neste Domingo de Ramos recuperamos este estudo do ano 1987 sobre o uso e actitude da igrexa católica diante do galego. Xesús Ferro Ruibal fai unha análise sociolingüística sobre a progresiva castelanización da Igrexa, o que a motivou, e as diferentes actitudes do clero en canto lingua vehicular. Incide na comparación do caso galego co doutras linguas minorizadas principalmente tras o Concilio de Trento, no que a Igrexa animou aos párrocos a utilizaren as linguas vernáculas para evanxelizar.

"Os estudios terminolóxicos deben ter unha especial relevancia nas linguas en proceso de normalización", afirmou Manuel González, coordinador do Servicio de Terminoloxía Galega (TERMIGAL) no acto inaugural do I Simposio Galego de Terminoloxía, celebrado esta tarde no Centro "Ramón Piñeiro", en Santiago. As sesións de traballo, ás que asisten un cento de investigadores e estudiosos, continuarán o venres e o sábado no salón de actos do Consello da Cultura Galega (CCG) e inclúen, en horario de tarde, o desenvolvemento do programa das IV Xornadas de Traballo da Asociación Española de Terminoloxía (AETER).