Arquivo de noticias do CCG

Non son nin compositores nin músicos son galegos, con todo teñen unha fonda relación co pais. Esta é unha das características comúns dalgunhas das gravacións que poñemos na rede nunha nova entrega da proxecto Lousas. Esta proposta do Consello da Cultura Galega fai público o patrimonio sonoro rexistrado en pedra que custodia o Arquivo Sonoro de Galicia.

Os sectores das artes escénicas e audiovisuais en Galicia está masculinizado. Só o 42% do persoal traballador son mulleres, que contan con dificultades de acceso ao mercado de traballo, aféctalles máis a temporalidade, cústalles conciliar e cobran menos. Ademais, tamén hai casos de acoso laboral e sexual, aínda que se percibe un cambio de actitude. Son as principais conclusións do informe “A situación das traballadoras dos sectores audiovisual e das artes escénicas en Galicia” que hoxe presentaron no Consello da Cultura Galega (CCG) os responsables de todas as entidades implicadas: Rosario Álvarez, presidenta do CCG; Anxo Lorenzo, director xeral de Cultura; Susana López Abella, secretaria xeral de Igualdade, e Jacobo Sutil, director de Agadic. Canda eles estaba Håkan Casares Berg, responsable do Observatorio da Cultura Galega e autor do informe; a coordinadora da Sección de Artes Escénicas, Musicais e Audiovisuais, Dolores Vilavedra, e mais os representantes de entidades gremiais dos sectores analizados, que foron os promotores da súa elaboración.

Tomás Batuecas non era galego pero todas as súas investigacións e achegas á ciencia no campo das masas atómicas fíxoas desde Galicia. Por iso, este ano é o homenaxeado co Día da Ciencia en Galicia. Os detalles da súa investigación, xunto cos datos biográficos desde un punto de vista didáctico, figuran na publicación “O químico e a medida. Tomás Batuecas Marugán. Creador da química física en Galicia” que hoxe presentaron os responsables desta iniciativa no Consello da Cultura Galega: Rosario Álvarez, presidenta do CCG; Juan Manuel Lema, presidente da Real Academia Galega de Ciencias (RACG); e Valentín García, secretario xeral de Política Lingüística, mais os coautores da publicación: Manuel Bermejo e Ramón Cid.

Por moi afastadas que parezan, as matemáticas e a arte teñen enfoques similares e unha longa historia entrelazada. Requiren creatividade na resolución das súa tarefa e están presentes en numerosas obras artísticas de figuras clásicas como Leonardo da Vinci ou en figuras máis contemporáneas como as de Esther Ferrer. Sobre esta conexión falarase na xornada “Entre as matemáticas e arte” que se celebra mañá, 8 de outubro, no Consello da Cultura Galega (CCG). A presidenta da institución, Rosario Álvarez, inaugurará ás 10:30 horas esta cita está coordinada por Miguel Fernández-Cid, Asunta Rodríguez e Jesús Pastor Bravo. As intervencións poderán seguirse en directo desde o web da institución.

O vicepresidente do Consello da Cultura Galega, Xosé Manoel Núñez Seixas, e a alcaldesa de Redondela, Digna Rivas, inauguran mañá en Redondela a mostra “Luces de alén mar”, unha exposición que recolle o legado educativo da emigración galega. A exposición poderase ver na sala de exposicións do Multiusos da Xunqueira ata o día 31 de outubro.

A vixésimo novena xuntanza anual da Asociación Europea de Institucións Migratorias (AEMI), que reúne institucións relacionadas con temática migratoria, arrinca mañá no Red Star Line de Antwerpen (Bélxica). O Consello da Cultura Galega (CCG) participa nesta cita a través do Arquivo da Emigración Galega, cun relatorio no que abordará as singularidades da nosa emigración. A cita deste ano, que durará ata o sábado, está centrada en coñecer como se documenta a memoria dos movementos migratorios.

Hoxe comeza en Santiago a edición de outono do programa “Dramaturgias itinerantes/Dramaturxias itinerantes” cunha sesión que permitirá coñecer o traballo dunha das figuras de referencia da dramaturxia portuguesa actual: Joana Craveiro. Canda ela estará a contacontos e actriz galega Ana Carreira. Son as voces encargadas deste programa que se repetirá o mércores en Vigo e o xoves en Monção. Este proxecto xorde da colaboración entre o Consello da Cultura Galega, o Camões, Centro Cultural Portugués en Vigo, a Escola Superior de Arte Dramática de Galicia e, desde esta edición, a rede Comédias do Minho.

“Galicia imaxinada” é unha mostra organizada polo Consello da Cultura Galega (CCG) que permite visualizar a influencia da emigración na creación da imaxe da Galicia a través da análise de varias publicacións. A presidenta do CCG, Rosario Álvarez, inaugurará mañá esta exposición na Sala de exposicións do Shopping Boqueirao. Con ela estará Eduardo Alves, presidente do Centro Español de Santos. A inauguración é unha das actividades previstas no marco dunha viaxe institucional encamiñada a reforzar as relacións institucionais e os lazos coa colectividade galega no Brasil.

Hoxe é o Día Europeo das Linguas, unha cita que o Consello da Cultura Galega (CCG) celebra con dous recitais poéticos organizados en colaboración con outras entidades. En Santiago, o vicepresidente Xosé Manoel Núñez Seixas, participou nun recital poético no Museo das Peregrinacións organizdo conxuntamente coa Secretaría Xeral de Política Lingüistica. Foi un acto no que estudantes Erasmus e peregrinos chegados de toda Europa leron no seu idioma textos de Rosalía de Castro escritos orixinariamente en galego. En París, o CCG participou noutro recital poético no marco da colaboración co Instituto Cervantes, o Instituto Ramón Llul e o Instituto Etxepare. Alí, o presidente do Cervantes, Luis García Montero, presentou o un recital poético no que oito poetas españoles e franceses leron versos en castelán, catalán, euskera, galego, asturiano, francés, occitano e corso. Pola banda galega o participou María Reimóndez.

Estamos nunha semana relevante para o futuro do clima por mor do cumio sobre Acción Climática auspiciado pola ONU que pretende acelerar o cumprimento do Acordo de París nos prazos para eliminar as emisións. Unha temática sobre a que xira a conferencia que a profesora de filosofía moral e política da Universidade de Salamanca Carmen Velayos no Consello da Cultura Galega (CCG). Baixo o título “Retos e compromisos morais ante o cambio climático” insírese no ciclo “Pensarmos”, que nesta ocasión contará coa presenza do especialista en dereito ambiental J. José Pernas García. A conversa poderá seguirse en directo a través do web da institución.

A relación das mulleres co seu contexto centran o ciclo de cine “Mulleres, patrimonios, sociedade”, que comeza mañá en Vigo (Multicines Norte). Serán tres xornadas que seguirán sempre o mesmo esquema: a proxección dunha curtametraxe, dunha longametraxe e mais un debate-coloquio. Esta proposta, que completa unha primeira edición que tivo lugar en Braga no 2018, é o resultado da colaboración entre o Consello da Cultura Galega (CCG); o Camões-Instituto da Cooperação e da Lingua, I. P.; a Universidade do Minho (UMinho) e a Vigo Film Office. A cita arrincará coa proxección do premiado filme de Xiana do Teixeiro titulado “Tódalas mulleres que coñezo”.ºº

“As mulleres co mundo na cabeza” é o título do documental, dirixido por Encarna Otero, no que se quere homenaxear a mulleres anónimas que non deixaron ningunha pegada nos rexistros oficiais e que sustentaron as súas familias cos materiais que transportaban na súa cabeza. Forma parte dun traballo de documentación dunha das áreas de traballo da Comisión de Igualdade do Consello da Cultura Galega (CCG) que pretende fixar o testemuño de traballadoras anónimas na creación dun arquivo de imaxe. Este documental, que se estreou en xullo en Carnota, preséntase mañá martes en Santiago ás 19:00 horas. O acto contará coa presenza de Encarna Otero e dunha das protagonistas do documental (Marisa Vázquez Oreiro), e será presentado por María Xosé Porteiro, responsable da citada Comisión. Tamén haberá unha actuación da cantora Alba María.

Reforzar as relacións institucionais e os lazos coa colectividade son as dúas liñas de traballo que marcan a viaxe que a presidenta do Consello da Cultura Galega (CCG), Rosario Álvarez, inicia mañá a Brasil. A axenda da presidenta inclúe reunións destacadas como as que manterá co Presidente da Assemblea Legislativa da Bahía ou co director do Instituto Cervantes de Sao Paulo, xunto con numerosas xuntanzas cos colectivos de emigrantes das cidades de Salvador, Santos e Sao Paulo. Ademais, o sábado 28 terá lugar a inauguración na cidade de Santos da exposición “Galicia Imaxinada”, que recolle a influencia da emigración na configuración da identidade galega.

A mostra “Outros verbos, novas leituras: Valle-Inclán traduzido”(1930-136)” ofrece unha lectura diferente do coñecido escritor, ao se centrar no éxito que tivo en vida a través da tradución das súas obras. O Consello da Cultura Galega, en colaboración co Departamento de Letras Universidade Beira interior, leva esta exposición a Covilha. A inauguración terá lugar mañá mércores ás 17:30 (hora local), e nela participan a presidenta do CCG, Rosario Álvarez; o decano da Faculdade de Letras e Artes, José María da Silva Rosa; o director do Departamento de Letras, José Ignacio Vázquez Diéguez; e a comisaria, Rosario Mascato. A exposición poderase ver ata o día 4 de outubro no Corredor das Fornalhas do núcleo da Real Fábrica de Panos do Museo de Lanifícios.

“Arte, acción, activismo, feminismo. A arte contemporánea como ferramenta de denuncia social en prol da igualdade” é o título dunha nova xornada do ciclo “En modo conversa” unha proposta que xunta o vindeiro mércores 18 de setembro a dous coñecidos creadores e activistas: Alicia Framis e e Félix Fernández. A comisaria Paula Cabaleiro, será a encargada de conducir un debate que se poderá seguir en directo a través do web da institución.

Detrás de “Mosteiro de Montederramo. Colección documental e índices” hai 1880 documentos de tipoloxía variada, que datan entre 1124 e 1560 e que suman máis de trinta anos de traballo de documentación e de compilación; e mais un nome propio, o de Ramón Lorenzo, que foi o incansable traballador deste proxecto fundamental para o coñecemento do galego medieval e da primeira metade do século XVI. O traballo preséntase este martes en Montederramo nun acto en que participan os responsables de que esta iniciativa vise a luz: Rosario Álvarez, presidenta do Consello da Cultura Galega (CCG); Valentín García, secretario xeral de Política Lingüística; Xosé Luís Regueira, director do ILG, e mais o autor Ramón Lorenzo. Canda eles estarán presentes o presidente da Deputación de Ourense, Manuel Baltar, e Antonio Rodríguez, alcalde do Concello. Ao remate haberá un acto musical a cargo do grupo Manseliña. A publicación pódese descargar desde o web do CCG.

Toxos e Froles, Cántigas da Terra, De Ruada e mais Cantigas e Agarimos son os catro coros históricos que permanecen activos hoxe en día. Dos seus arquivos constrúese o relato narrativo da exposición Son de Galicia, que recolle o espírito dunha época que sentou a través da música e do baile a nosa identidade. A mostra, organizada polo Consello da Cultura Galega (CCG) coa colaboración de Afundación-Obra Social ABANCA e mais as catro sociedades corais históricas, chega agora a Vigo. Este martes inaugúrase ás 19:30 horas coa presenza da presidenta do CCG, Rosario Álvarez; Paloma Vela, coordinadora adxunta da Área de Cultura de Afundación, e o comisario, Miguel Anxo Seixas. A exposición poderase ver na sede Afundación Vigo ata o 28 de setembro.

Convocatoria de bolsas na Casa Velázquez. 2019

Hoxe, 3 de setembro, subimos á rede cen novos números da publicación “A Nosa Terra”. Esta nova entrega abre co número 305 no que se informa, entre outras noticias, dun proxecto urbanístico que pretende construír unha gran praza e edificio de vivendas na rúa Hortas en Santiago de Compostela. Entre os temas dese ano destacamos a denuncia deste xornal de que un armador holandés despide a oitocentos mariñeiros galegos amparándose na lexislación panameña. O conflicto sobre a galeguidade da obra de Cela trala concesión do Premio Nóbel, a Iniciativa popular por unha lei forestal son algunhas das novas que se publicaron no período desta nova entrega. Pecha co número 405 no que este xornal fai unha reflexión sobre a política forestal. Ese exemplar denuncia que o Buró Europeo de Méio Ambiente inicia unha campaña contra a celulosa do grupo Flick proxectada nas Pontes, e que hai un informe das comunidade europeas que recomenda reducir a extensión do eucalipto na Galiza.

O 3 de setembro 1950 comezou a emitirse en Montevideo "Sempre en Galicia", o programa de radio máis antigo de emisión totalmente en galego que aínda pervive. Aproveitamos esta efeméride para dar a coñecer “Radiodifusión galega na emigración”, un repertorio histórico das actividades radiofónicas realizadas e protagonizadas polos emigrantes galegos fundamentalmente en América e Europa, pero tamén noutros destinos menos frecuentes con presenza galega.