Arquivo de noticias do CCG

O Concerto das Letras Galegas naceu como unha iniciativa do Consello da Cultura Galega (CCG) para celebrar dun xeito festivo o 17 de maio. Nesta ocasión cambia de rexistro para lembrar ao homenaxeado deste 2016: Manuel María. A cita será na Coruña, onde o grupo Milladoiro poñerá a música nun concerto en que cobrará protagonismo os textos do poeta lucense. “É unha homenaxe a Manuel María, ao Día das Letras Galegas pero tamén á importancia que ten a música na cidade da Coruña” destacou Ramón Villares, presidente do Consello da Cultura Galega, esta mañá na presentación do concerto. Canda el estaban o alcalde da Coruña, Xulio Ferreiro; Maximino Zumalave, coordinador da Sección de Música e Artes Escénicas do CCG, e Moncho García, integrante da formación.

No noso territorio aínda sobreviven algunhas pegadas do primeiro grande auxe de construción da Alta Idade Media que están invisibilizadas. Esta é a premisa do proxecto europeo Early Medieval Churches: Archaeology, History and Heritage (EMCHAHE), que dirixe o profesor José Carlos Sánchez Pardo na Universidade de Santiago de Compostela. As características desta proposta centra a terceira edición dos “Encontros monográficos co Patrimonio Cultural” que terá lugar mañá xoves no Consello da Cultura Galega (CCG). A xornada retransmitirase en directo a través do web da institución.

Tres seminarios, dúas exposicións e un proxecto web. Este ó conxunto de actividades coas que o Consello da Cultura Galega participa na programación que celebra o centenario das irmandades da Fala dado a coñecer esta mañá no Museo do Pobo Galego. Ramón Villares, presidente do CCG, detallou a as actividades da institución ao tempo que anunciou que se trata dunha conmemoración “precisa, necesaria e obrigada”. O acto estivo presidido polo Conselleiro de Cultura, Román Rodríguez, e asistiu o presidente da Real Academia Galega, Xesús Alonso Montero, o presidente do Padroado do Museo do Pobo, Xusto Beramendi, e os representantes doutras entidades.

O Consello da Cultura Galega acaba de abrir o prazo de inscrición na xornada “Cultura e comunicación na sociedade en rede”, que analiza novos modelos e novas experiencias no ámbito dixital da man de expertos como Miquel de Moragas ou Emili Prado. A cita terá lugar na sede da institución o vindeiro 26 de abril e está organizada polos profesores Xosé López, Francisco Campos e Manuel Gago. A inscrición pode facerse a través da web, é gratuíta e hai cen prazas.

Documentos que marcaron a vida diaria dos galegos da Idade Media.

“Olladas de mulleres no mundo” é o título dun ciclo de cinema co que o Consello da Cultura Galega(CCG) e o Centro Galego de Artes da Imaxe (CGAI) pretenden amosar o traballo de actrices, directoras ou produtoras de cine. Arrinca o 8 de marzo, o Día da Muller Traballadora, e permite ver a través de proxeccións e coloquios o cinema feito tanto en Galicia coma noutras partes do mundo desde unha perspectiva de xénero. As galegas Diana Toucedo e Xisela Franco xunto coa realizadora belga Chantal Akerman, recentemente falecida, conforman o programa desta edición.

Moitas das conquistas sociais que parecían irreversibles desapareceron nos últimos anos. O estado do benestar atravesa unha crise severa marcada por un individualismo posesivo e unha Europa asocial, tal e como explicará nunha conferencia o sociólogo e politólogo Luis Moreno. A cita terá lugar este xoves 3 de marzo (17:00 horas) e insírese no ciclo O(s) Sentido(s) da(s) Cultura(s), seminario do Consello da Cultura Galega coordinado polo profesor Ramón Máiz. A cita programouse inicialmente en 2015 e tivo que ser adiada por mor da cancelación do voo que impediu a Moreno ofrecer a conferencia.

Linguaxe multisensorial, renovación dos procesos editoriais e novas formas de contar a realidade amparadas nas posibilidades que ofrece a tecnoloxía son algunhas das claves de futuro para a cultura galega. Así o trasladaron expertos como Ramón Salaverría ou Mario Tascón no marco da xornada “Desafíos para a cultura galega no escenario interactivo da sociedade en rede”, que se desenvolveu ao longo do día de hoxe no Consello da Cultura galega. A proposta estivo coordinada por Xosé López, Francisco Campos e Manuel Gago.

Nos últimos tempos Galicia deu pasos para que a súa cultura e a súa identidade estean de xeito activo e visible na rede pero quedan aínda hai moitos retos por cumprir. Sobre eles reflexionará a xornada “Desafíos para a cultura galega no escenario interactivo da sociedade en rede”, que terá lugar mañá no Consello da Cultura galega. A proposta está coordinada por Xosé López, Francisco Campos e Manuel Gago, e contará coa presenza de expertos recoñecidos como Mario Tascón ou Rosa Franquet para falar de novas dinámicas que inciden nos usos e consumos de produtos culturais. A xornada ten o seu aforo completo, con todo, os relatorios pódense seguir en directo a través do web da institución.

O presidente do Consello da Cultura Galega, Ramón Villares, e o Secretario Xeral de Emigración, Antonio Rodríguez Miranda, presentaron esta mañá dúas accións encamiñadas a recuperar o legado da emigración. Dunha banda, deron a coñecer un libro que revisa a figura de Eliseo Pulpeiro fundador de Céltiga, cabeceira que xogou un papel crucial no proceso de afirmación e desenvolvemento do galeguismo entre as comunidades galegas de América. Da outra, ofreceron unha visita por Galicia Imaxinada, a exposición que visualiza de xeito gráfico a influencia da emigración na creación dos símbolos de Galicia e que se inaugura pola tarde (20:00 horas). A presentación contou coa presenza da filla de Eliseo Pulpeiro, Sylvia Pulpeiro e o investigador Pablo Rodríguez.

“Non podemos achegar conclusións categóricas pero sí aproximacións reais de que empeza a construírse unha cultura do Camiño” afirma Roberto Samartim membro do grupo de Estudos da Cultura Galabra quen, xunto con Elías J. Torres, presentaron os primeiros resultados dun proxecto titulado “Discursos, imaxes e percepción dos visitantes en relación co Camiño de Santiago”. As primeiras constatacións dese estudo centraron a segunda sesión dos “Encontros monográficos co Patrimonio Cultural”. Unha cita que se insire nunha liña de traballo da Sección de Patrimonio e Bens Culturais do Consello da Cultura Galega, que busca xerar debate e difusión entre a cidadanía, as administracións e os profesionais arredor de bens patrimoniais sobre os que se estean a desenvolver actuacións.

Cal é a pegada do Camiño de Santiago nos peregrinos? E destes sobre os habitantes de Compostela? Estas son algunhas das premisas de partida dun proxecto do grupo de Estudos da Cultura Galabra que presenta os seus primeiros resultados no marco dos “Encontros monográficos co Patrimonio Cultural”. Esta sesión, que terá lugar mañá á tarde no Consello da Cultura Galega (CCG), insírese nunha liña de traballo da Sección de Patrimonio e Bens Culturais da institución, que busca xerar debate e difusión entre a cidadanía, as administracións e os profesionais arredor de bens patrimoniais sobre os que se estean a desenvolver actuacións. A xornada retransmitirase en directo a través do web da institución.

Existe unha relación directa entre o grao de urbanización do lugar onde se vive e dos hábitos familiares coa participación cultural. Así o deduce o Observatorio da Cultura Galega, servizo dependente do Consello da Cultura Galega, na segunda parte do Documento de Traballo (DT-OCG) titulado Ocio e hábitos culturais (II), que mide as prácticas culturais e o noso tempo libre. As cidades e as vilas presentan mellores indicadores que a contorna rural no que ten que ver coa asistencia e a frecuencia de actividades de carácter cultural. Ademais, as cifras son máis positivas na mocidade cuxos pais teñen hábitos culturais frecuentes.

Comprender o Camiño de Santiago na súa totalidade, onde importan tanto peregrinos como habitantes de Compostela, é unha das orientacións do proxecto que o grupo de Estudos da Cultura Galabra presenta no marco dos “Encontros monográficos co Patrimonio Cultural”. Esta iniciativa da Sección de Patrimonio e Bens Culturais do Consello da Cultura Galega busca xerar debate e difusión entre a cidadanía, as administracións e os profesionais arredor de bens patrimoniais sobre os que se estean a desenvolver actuacións. A cita deste novo encontro terá lugar o vindeiro venres 19 de febreiro na sede da institución.

O doutor en Filosofía Javier Moscoso ofrecerá mañá (xoves 11, ás 17:00 horas) no Consello da Cultura Galega un relatorio que aborda a construción cultural da ambición, así como as súas repercusións en ámbitos como o da saúde ou o da historia. A cita titúlase "Promesas incumplidas. Una historia cultural de la ambición" e forma parte do marco do ciclo O(s) Sentido(s) da(s) Cultura(s) que coordina o profesor Ramón Máiz.

A ambición e os seus males centran a vindeira cita do ciclo O(s) Sentido(s) da(s) Cultura(s), seminario coordinado polo profesor Ramón Máiz. Nesta ocasión, o doutor en Filosofía Javier Moscoso ofrecerá no Consello da Cultura Galega un relatorio que aborda a construción cultural deste concepto así como as súas repercusións, que chegan a moitos ámbitos, como pode ser o da saúde. A cita, que terá lugar o xoves 11 de febreiro (17:00 horas), titúlase "Promesas incumpridas. Una historia cultural de la ambición" e xa ten aberto o prazo de inscrición.

Unha investigación sobre a orixe do sistema bancario e a débeda pública actual e o deseño da escenografía dunha montaxe teatral son os proxectos resultantes das primeiras bolsas convocadas polo Consello da Cultura Galega e a Casa de Velázquez. Unha iniciativa que xorde coa finalidade de contribuír á proxección da cultura galega no exterior e cuxos resultados se deron a coñecer esta mañá nunha rolda de prensa. O presidente do Consello da Cultura Galega, Ramón Villares, destacou a relevancia desta liña de traballo e anunciou unha nova convocatoria destas bolsas para o mes de abril.

“Non son un especialista no exilio, pero vivilo permíteche apreciar outra realidade e entender por qué o goberno e o pobo de México se volcaron cos refuxiados españois”. Así comezou Luciano Concheiro a conferencia no Consello da Cultura Galega na que fixo un repaso polo que achegaron as últimas investigacións ao coñecemento dun fenómeno que afectou a máis de 40.000 españois entre 1939 e 1942. Ramón Villares, presidente do Consello da Cultura Galega, presentou ao conferenciante nunha biblioteca que tiña o seu aforo completo.

A divulgación da figura de Rosendo Salvado conta cunha nova achega. Trátase da publicación Rosendo Salvado e o mundo aborixe de Australia, que recolle as actas do Congreso realizado polo Consello da Cultura Galega en 2014 coa edición de Ramón Máiz e Thifany Shellan. A publicación, que xa se pode descargar desde o web do CCG, dá conta da relevancia do frade, quen desenvolveu en Australia un asentamento misioneiro desde un revolucionario punto de vista en época colonial, baseado na defensa dos dereitos dos aborixes. A presentación completouse coa conferencia da profesora australiana Anna Haebich sobre o legado musical de Salvado na educación dos aborixes.

O Observatorio da Cultura Galega, servizo dependente do Consello da Cultura Galega, acaba de facer pública a primeira parte dun Documento de Traballo (DT-OCG) titulado Hábitos e prácticas culturais (I), centrado nos indicadores de participación cultural en Galicia. Un documento que analiza o que lemos, escoitamos, vemos e facemos do ámbito cultural noso tempo libre. Como norma xeral, a asistencia a museos, galerías, bibliotecas, concertos, cine e teatro está por debaixo da media española. Como dato positivo, a cidadanía galega é das que máis libros le e dedica máis tempo a facelo. Alén da lectura, entre as nosas preferencias tamén está ler prensa e escoitar música.