Arquivo de noticias do CCG

O Consello da Cultura Galega realizou no serán deste xoves unha sesión plenaria extraordinaria na que deu conta do balance de actividades de 2015 e fixo un avance da programación de 2016. A xuntanza contou coa asistencia do presidente de honra da institución, o presidente da Xunta, Alberto Núñez Feijoo.

O Consello da Cultura Galega celebra este serán (20:00 horas) unha sesión plenaria extraordinaria cun único punto na orde do día: balance de actividades de 2015 e avance da programación de 2016. A xuntanza contará coa asistencia do presidente de honra da institución, o presidente da Xunta, Alberto Núñez Feijoo.

Nos últimos tempos Galicia deu pasos para que a súa cultura forme parte da rede pero quedan aínda hai moitos retos por cumprir. Sobre eles reflexionará a xornada “Desafíos para a cultura galega no escenario interactivo da sociedade en rede”, que terá lugar no Consello da Cultura galega o vindeiro 24 de febreiro e que xa ten aberto o seu prazo de inscrición. A proposta está coordinada por Xosé López, Francisco Campos e Manuel Gago, e contará coa presenza de expertos como Mario Tascón ou Rosa Franquet para falar de novas dinámicas de socialización que inciden nos usos e consumos de produtos culturais.

Accede á correspondencia de destacadas figuras de Galicia como Luís Seoane e Rosalía de Castro.

Este 2016 cúmprense 150 anos do nacemento de Ramón María del Valle-Inclán (1866-1936). Unha efeméride que o Consello da Cultura Galega celebra con novos destinos para a exposición “Outros verbos, novas lecturas: Valle-Inclán traducido [1930-1936]”, que dá conta da dimensión internacional deste escritor a través das traducións das súas obras a outras linguas. O primeiro destino deste ano é a Pobra do Caramiñal, no museo que leva o nome do escritor e que hoxe inauguran o presidente do Consello da Cultura Galega, Ramón Villares, a comisaria desta mostra, Rosario Mascato e o alcalde desta localidade, Xosé Lois Piñeiro.

O 17 de decembro, a coincidir co nacemento de Ánxel Casal, celébrase o Día da Edición en Galicia. Recuperamos esta publicación que dá conta do seu labor.

Os Adeuses é a exposición que amosa, a través da ollada do fotógrafo Alberto Martí, os últimos momentos da emigración galega cara a América dos anos cincuenta do século pasado que tivo en Brasil e Uruguai os principais destinos. A mostra chega agora a Belo Horizonte (Brasil), onde se pode ver ata o día 27 de febreiro de 2016. Estará aberta no O CâmeraSete–Casa da Fotografia de Minas Gerais, un espazo dedicado ás artes visuais da Fundação Clóvis Salgado, resultado dunha colaboración entre a Secretaria de Estado de Cultura de Minas Gerais e o Instituto Moreira Salles.

Co gallo do centenario de Ramón Piñeiro (1915-1990) ofrecemos as cartas que intercambiou con Luís Seoane

O primeiro día das xornadas Ramón Piñeiro Koldo Mitxelena no seu centenario serviu para construír o relato dunha amizade pero tamén para dar a coñecer a excepcionalidade de dúas figuras fundamentais na cultura e na política galega e vasca. “É a historia de vidas paralelas con camiños diverxentes e un exemplo de posición persoal, política e cultural” afirmou Ramón Villares, presidente do Consello da Cultura Galega (CCG) nunha sesión na que tamén se presentou a primeira fotobiografía como unha mostra da colaboración institucional. As xornadas trasládanse mañá venres ao Centro de Investigación Ramón Piñeiro onde conclúen cunha sesión dedicada a dar a coñecer novos epistolarios.

Ramón Piñeiro e Koldo Mitxelena comparten o feito de ser dúas figuras fundamentais nas súas respectivas culturas, a galega e a vasca, e unha traxectoria vital antifranquista que os levou a encontrarse nunha cadea madrileña nos anos corenta, onde forxaron unha amizade que mantiveron durante décadas. Ambos cumprirían neste 2015 cen anos. Unha efeméride que aproveita o Consello da Cultura Galega (CCG) e o Centro Ramón Piñeiro para lembrar a súa relevancia, a súa relación e a situación das linguas minoritarias no marco da España actual. A cita ten lugar os días 10 e 11 de decembro en Santiago.

Contribuír á proxección exterior da cultura galega; atender a un sentido amplo da cultura que inclúe desde ciencia ata cinema, música ou patrimonio; reflexionar sobre as identidades e os movementos migratorios sen descoidar a recuperación e posta en valor da cultura galega son as liñas de traballo do Consello da Cultura Galega (CCG) para 2016. Así o acordou o Plenario da institución no marco dunha xuntanza ordinaria celebrada no serán deste xoves. Isto concrétase nun congreso sobre as Irmandades da Fala, unha exposición que constrúe o relato histórico de Galicia en cen obxectos, a recuperación da figura de Manuel María e un seminario sobre fronteiras, soberanías e migracións. En total están programadas máis de cincuenta actividades cun orzamento que se sitúa preto dos dous millóns e medio de euros.

Compilamos unha escolma de material que José Neira Vilas entregou ao CCG así como actividades nas que participou.

“Encontros monográficos co Patrimonio Cultural” é o título dunha iniciativa nova da Sección de Patrimonio e Bens Culturais que busca xerar debate e difusión entre a cidadanía, as administracións e os profesionais arredor de bens patrimoniais sobre os que se estean a desenvolver actuacións. A proposta iníciase este venres 27 de novembro cunha xornada monográfica sobre Guidoiro Areoso, na que se exporá a vivencia da cidadanía, os resultados das intervencións patrimoniais e a experiencia xestora.

O Seminario de Estudos Galegos, o Instituto Padre Sarmiento ou o propio Consello da Cultura Galega (CCG). Son tres entidades de ámbito cultural nas que Filgueira Valverde participou activamente na súa construción ou recuperación. Sobre esta relación, no contexto da creación autonómica, falarase esta tarde no Consello da Cultura Galega no marco dun programa de actividades que organiza a Real Academia Galega e que comezaron hai tres semanas en Pontevedra baixo o título “Filgueira Valverde na cultura galega do século XX”. O presidente do CCG, Ramón Villares, estará tamén presente na xornada de clausura que terá lugar o venres 27 na Fundación Barrié.

Existe unha relación directa entre o consumo de carne procesada e carne roxa e o risco de cancro. Unha evidencia que chega da man de numerosos estudos realizados por diferentes entidades a nivel internacional que tamén indican que se trata dun risco baixo. O consumo moderado de carne, no marco dunha cultura alimenticia saudable e exercicio físico son algunhas das claves da prevención. Esta é a mensaxe que se repetiu ao longo da tarde no marco da xornada “Os pecados da carne?” coordinada por Anxo Carracedo e Rafael Tojo. “O problema da dieta cárnica é un asunto científico pero tamén ten que ver coa cultura alimentaria e cómpre unha reflexión sobre a realidade” apuntou Ramón Villares na inauguración dunha xornada que se abordou o tema desde a necesidade dunha difusión rigorosa ata a dieta actual.

“A música para banda forma parte imprescindible da nosa paisaxe sonora”, afirma Maximino Zumalave, coordinador da Sección de Música e Artes Escénicas do Consello da Cultura Galega (CCG), na presentación do libro Follas novas, unha rapsodia galega para banda sinfónica composta por Luis Brage. Unha publicación que se presenta mañá en Ribadavia nun acto en que haberá unha actuación a cargo da banda de música La Lira, unha agrupación que foi un auténtico mito musical e na que Luis Brage foi moi decisivo. A cita terá lugar o sábado 21 ás 16.30 horas no auditorio municipal da vila e contará coa presenza de David Ferreiro Carballo, que fixo o estudo crítico da obra, de Lluís Ballester Brage, neto do compositor de María López Touza, concelleira de Cultura.

Poderás escoitar a súa propia voz, descubrir novas imaxes e ver todos os contidos que o CCG fará ao longo do ano.

Filgueira Valverde participou activamente na construción e recuperación dunha serie de entidades de ámbito cultural no xermolo da autonomía galega. Esa dimensión analízase na segunda das sesións que integran o programa “Filgueira Valverde na Cultura Galega”, que se desenvolverá o vindeiro martes no Consello da Cultura Galega (CCG). O presidente, Ramón Villares, estará presente nesta cita así como na xornada de clausura, que terá lugar o venres 27 na Fundación Barrié.

O pasado mes de outubro un panel de expertos da Organización Mundial da Saúde afirmou, baseándose en estudos científicos publicados, que o consumo de carnes procesadas (embutidos, salchichas ou hamburguesas) aumenta o risco de sufrir cancro e que a carne vermella (porco, vacún…) é probablemente carcinóxena. Ante este anuncio, a Sección de Ciencia, Natureza e Sociedade do Consello da Cultura Galega (CCG) organiza unha xornada para falar das vantaxes e problemas da dieta cárnica. Anxo Carracedo e Rafael Tojo son os coordinadores desta cita que ten como título “Os pecados da carne?” e que se desenvolverá en Santiago o vindeiro luns 23 de novembro. A inscrición pode facerse a través do sitio web do CCG é libre e hai cen prazas.

“A xornada pretende botar unha ollada a un campo que está na base da música tradicional como é o da artesanía que constrúe os instrumentos e ao que se lle presta pouca atención” explica Xosé Vicente Ferreirós, coordinador da xornada “Os instrumentos tradicionais baixo a perspectiva dos artesáns”. O encontro, que terá lugar mañá á tarde no Consello da Cultura Galega, dálle voz a Álvaro Seivane, Xaneco Tubío, Oli Xiráldez e César Loureiro que falarán de recuperar a tradición pero tamén de innovación.