Arquivo de noticias do CCG

A Sección de Arquitectura do Consello da Cultura Galega (CCG) celebra hoxe a segunda e última sesión das xornadas "A arquitectura desde Cataluña". O deseño dos edificios para que consigan superar os cambios vertixinosos da sociedade, a necesidade dunha normativa que unifique criterios para os chamados "tipos edificatorios", como escolas e hospitais, e a "debilidade" da reflexión crítica coa arquitectura e a elite da profesión foron algúns dos temas abordados.

A Sección de Arquitectura do Consello da Cultura Galega (CCG) celebra hoxe e mañá as xornadas "A Arquitectura desde Cataluña", na que participan relevantes profesionais e profesores desa Comunidade. Na sesión inaugural, os coordinadores do encontro, Iago Seara e Antonio Armesto, destacaron a necesidade de entender a arquitectura como unha conformación máis da cultura e de crear canles de diálogo entre os profesionais da Península para unha mellor formación dos arquitectos. Con este obxectivo, as Xornadas, sinalan, contan coa participación dalgúns dos máis representativos profesionais das xeracións de arquitectos cataláns das últimas décadas, dende Federico Correa ós máis recentes valores.

A Sección de Arquitectura do Consello da Cultura Galega (CCG) organiza este xoves e venres as "Xornadas A Arquitectura desde Cataluña". Con esta iniciativa, a entidade pretende abordar da man dalgúns dos mellores profesionais cataláns unha análise da arquitectura recente nesa Comunidade, así como abrir canles de reflexión e intercambio de coñecementos entre arquitectos galegos e cataláns.

O Consello da Cultura Galega (CCG) presentará mañá, martes, día 25, ás 12´30 horas, en rolda de prensa, as xornadas A ARQUITECTURA DESDE CATALUÑA.

Os dereitos de autor e os dereitos dos cidadáns a acceder á cultura centraron esta mañá o III Encontro O Son da Memoria, que organiza o Arquivo Sonoro de Galicia, do Consello da Cultura Galega (CCG). Membros da Sociedade General de Autores e Editores (SGAE) e representantes de posturas críticas coa actual xestión dos dereitos de autor expuxeron os seus argumentos e debateron sobre a polémica descarga de música por Internet e a copia de CD´s para uso persoal.

O Arquivo Sonoro de Galicia, do Consello da Cultura Galega (CCG), celebra este venres, día 21, o III Encontro O Son da Memoria baixo o título "De quen é a palabra. Arquivos sonoros e propiedade intelectual". A xornada abordará a polémica en torno á xestión dos dereitos de autor e a propiedade intelectual ante as posibilides de difusión que ofrecen as novas tecnoloxías.

O presidente do Consello da Cultura Galega (CCG), Alfonso Zulueta de Haz, o coodinador da Sección de Comunicación do CCG, Xosé López, e o director da Editorial Galaxia, Víctor Freixanes, presentaron esta mañá en rolda de prensa a reedición da obra de Eduardo Blanco Amor "Chile a la vista". Trátase dunha serie de pezas xornalísticas, reportaxes e crónicas, que o escritor galego fixo durante dúas viaxes a través Chile, en 1949 e 1950, e que publicou no diario chileno "La Hora", xa desaparecido.

O Arquivo Sonoro de Galicia, do Consello da Cultura Galega (CCG) celebra este venres, día 21, o III Encontro O Son da Memoria baixo o título "De quen é a palabra. Arquivos sonoros e propiedade intelectual". O coordinador do Arquivo, Rodrigo Romaní, destacou esta mañá en rolda de prensa a importancia destas xornadas para abordar un tema de polémica actualidade, os dereitos de autor e a propiedade intelectual, debido ás posibilidades de difusión de datos ofrecidas polas novas tecnoloxías.

O Consello da Cultura Galega (CCG) presentará mañá, martes, día 18 de novembro, ás 12´00 horas, en rolda de prensa, a reedición do libro CHILE A LA VISTA, de Eduardo Blanco Amor.O libro, de algo máis de 400 páxinas, recolle unha parte importante da obra xornalística de Blanco Amor. Neste caso, os artigos escritos polo autor de "Xente ao lonxe", entre 1949 e 1950 e publicados no xornal chileno "La Hora". Trátase dun relato lúcido, vivo e apaixonado logo de "andar e ver" o país andino.

O Consello da Cultura Galega (CCG) presentará o luns, dìa 17, ás 12´00 horas, en rolda de prensa o III ENCONTRO "O SON DA MEMORIA"-ARQUIVOS SONOROS E PROPIEDADE INTELECTUAL, que coordinará Rodrigo Romaní. O encontro, organizado polo Arquivo Sonoro de Galicia, pretende, entre outros obxectivos, clarificar a realidade actual da xestión dos recursos xerados en virtude do concepto moderno de propiedade intelectual, tal e como se entende en Europa.

A Sección de Artes Plásticas do Consello da Cultura Galega (CCG) porá en marcha dende o luns, día 17 e ata o 21 de novembro un OBRADOIRO DE CRÍTICA DE ARTE, coordinado por Miguel Cereceda, crítico de arte e comisario independente.

Sobre o "problema de España" reflexionaron aberta e críticamente Xavier Rubert de Ventós e Fermín Bouza nos relatorios que cerraron asXornadas "GALICIA, ESTRATEXIAS DE FUTURO: NOVOS ESPAZOS NA SOCIEDADE GLOBAL", que tiveron lugar desde o día 12 de novembro no Consello da Cultura Galega (CCG) e coas que a institución quixo subliñar tamén os seus primeiros vinte anos.

A Sección de Artes Plásticas do Consello da Cultura Galega (CCG) considera necesaria a creación de profesionais especializados da crítica de arte. Con este obxectivo, nunha dirección pedagóxica e paralela á acción promocional doutros proxectos, o CCG prantexa a realización deste Obradoiro de crítica de arte, que terá lugar a próxima semana (do 17 ó 21), fusionando as áreas teóricas e prácticas desta disciplina. A necesidade de relación e comunicación entre o feito artístico e a sociedade fixo precisa a creación dunha serie de interlocutores da mensaxe estética. O crítico de arte, axente activo deste intercambio, actúa de espectador intencionado na engrenaxe da industria cultural.

O arquitecto Juan Luís Dalda Escudero reivindicou o principio da "planificación espacial máis alá da ordenación do territorio" na súa intervención nas xornadas "Galicia, estratexias de futuro. Novos espazos na sociedade global", que están a celebrarse no Consello da Cultura Galega (CCG), en Santiago, coa participación de filósofos, sociólogos, arquitectos e urbanistas e que rematarán hoxe, venres. Dalda, profesor titular de Planeamento Urbanístico da Escola Técnica Superior de Arquitectura de A Coruña, reflexionou sobre "a cidade difusa no noroeste peninsular", insistiu na necesidade de "adecuar a planificación terrtorial ó complexo espazo urbano do século XXI" e lembrou que o que definiu como "fracaso do feísmo é o fracaso de vinte anos de política urbanística con protagonismo especial da Xunta, do Parlamento de Galicia e tamén dos concellos".

O filósofo francés Gilles Lipovetsky pronunciará hoxe, mércores, 12 de novembro, ás 19´00 horas, a conferencia inaugural das Xornadas GALICIA, ESTRATEXIAS DE FUTURO: NOVOS ESPAZOS NA SOCIEDADE GLOBAL, organizadas polo Consello da Cultura Galega (CCG), dentro dos actos conmemorativos do vinte aniversario da institución. No acto inaugural intervirán tamén o Presidente do CCG, Alfonso Zulueta de Haz, e o coordinador das xornadas, Antón Baamonde.

O idioma galego dispón xa de ferramentas e productos terminolóxicos numerosos e sistematizados e conta asemade cunha "Metodoloxía do traballo terminográfico puntual en lingua galega", presentada no curso da derradeira sesión de traballo do I Simposio Galego de Terminoloxía, celebrado nas dependencias do Consello da Cultura Galega (CCG). Ás sesións asistiron máis de cen investigadores, lingüistas e traductores. Os traballos completáronse coas IV Xornadas da Asociación Española de Terminoloxía (Aeter). O Simposio, terá continuidade e carácter bianual e abriu xa a consulta para unha consulta sobre a posible creación da Asociación Galega de Terminoloxía.

A segunda xornada do I Simposio Galego de Terminoloxía abordou esta mañá as técnicas e criterios que os especialistas e os filólogos e traductores aplican á hora de crear palabras en galego para designar novas realidades (como na informática) ou realidades moi específicas, como nomes científicos. Este congreso, organizado pola Sección de Lingua do Consello da Cultura Galega e o Servicio de Terminoloxía Galega (Termigal), conta coa participación de preto de cen investigadores e profesionais.

"Os estudios terminolóxicos deben ter unha especial relevancia nas linguas en proceso de normalización", afirmou Manuel González, coordinador do Servicio de Terminoloxía Galega (TERMIGAL) no acto inaugural do I Simposio Galego de Terminoloxía, celebrado esta tarde no Centro "Ramón Piñeiro", en Santiago. As sesións de traballo, ás que asisten un cento de investigadores e estudiosos, continuarán o venres e o sábado no salón de actos do Consello da Cultura Galega (CCG) e inclúen, en horario de tarde, o desenvolvemento do programa das IV Xornadas de Traballo da Asociación Española de Terminoloxía (AETER).

A Sección de Lingua do Consello da Cultura Galega (CCG) e o Servicio de Terminoloxía Galega (Termigal) promoveron o I Simposio Galego de Terminoloxía "Terminoloxía e planificación lingüística", que hoxe, xoves, ás 16´30 horas, vai ser inaugurado no salón de actos do Centro Ramón Piñeiro para a Investigación en Humanidades, en Santiago.

O Consello da Cultura Galega (CCG) editou dez mil exemplares do cómic PARANDO A MAREA NEGRA, que distribuirá entre os centros de ensino de Galicia. A publicación recolle a esforzada e solidaria reacción posta en marcha en Galicia, e fóra de Galicia, para neutralizar o impacto da catástrofe do "Prestige" e subliña "unha idea de esperanza e de concienciación na defensa da natureza e do medio ambiente; todos podemos facer algo e todas as contribucións son necesarias", en palabras da autora do guión, a escritora María Pilar Jiménez Aleixandre.