Arquivo de noticias do CCG

Foi a primeira alumna da Universidade de Santiago de Compostela (USC). A biografía de Manuela Barreiro Pico (Viveiro, 1877 - Madrid, 1953) está chea de pequenos fitos. Foi a primeira bacharel en Ciencias en Lugo, a primeira universitaria galega e a primeira licenciada en Farmacia en Galicia. A súa entrada, asinada por María Isabel Fernández García, acaba de incorporarse ao Álbum de Galicia.

Hai moitas formas de ver o mar e todas elas teñen presenza na literatura galega aínda que con desigual intensidade. Esta é unha das ideas que se abordaron no Parladoiro “Galicia navegante no imaxinario literario” que se desenvolveu esta tarde en Tui da man dos escritores Víctor Freixanes e Pemón Bouzas, con Ramón Nicolás como moderador. A cita era unha da actividades complementarias da exposición “Inventio mundi” que se pode ver nesta mesma localidade ata o 9 de xuño e que documenta unha parte descoñecida da historia da navegación galega.

“É un libro importante para coñecer a Galicia do Século XX pero tamen é un libro destacado para coñecer mellor o que é o Consello da Cultura Galega” asegurou Rosario Álvarez, presidenta do Consello da Cultura Galega (CCG) na presentación de “Cultura e política na Galicia do século XX”, o último libro do historiador e expresidente da institución, Ramón Villares. O texto, que ve a luz da man da Editorial Galaxia, analiza as relación entre cultura e política na construcción de Galicia como nación cultural no século XX. A presentación contou tamén coa asistencia do editor Francisco Castro e do politólogo Ramón Máiz.

A cultura popular galega está poboada de heroes lendarios e seres mitolóxicos que chegaron ou saíron do mar. Neste imaxinario ambientaron algunhas das súas novelas Víctor Freixanes, Pemón Bouzas e Ramón Nicolás entre moitos outros. E precisamente estres tres autores participaran esta semana en Tui (2 de xuño, sala de exposicioóns do concello, 20:00 horas) no parladoiro “A Galicia navegante no imaxinario literario” organizado polo Consello da Cultura Galega (CCG). A cita pretende reflexionar sobre a importancia do mar e das navegacións na literatura ao fío da exposición “Inventio mundi” (que se pode ver no mesmo espazo ata o 9 de xuño) coa que o CCG pretende dar a coñecer as repercusións que tivo para Galicia a primeira circunnavegación da Terra, a expedición de Magalhães-Elcano.

Preto de 6 millóns de mulleres habitan en zonas rurais en España, mentres que en América latina a cifra de mulleres que viven no campo rolda os 58 millóns. Malia a distancia e as diferenzas territoriais existentes pódense trazar características comúns a todas elas como un progresivo proceso de avellentamento, desigualdades de xénero e de carácter económico. Coa finalidade de profundar no coñecemento desta realidade, o Consello da Cultura Galega (CCG) e a Valedora do Pobo organizan a Xornada “Mulleres rurais. Unha ollada desde Galicia e América Latina”. Nela participan seis persoas expertas de ambas as beiras do Atlántico que ofrecerán un intercambio de coñecementos, boas prácticas, ideas e propostas. A cita, que é virtual, comeza mañá coa publicación dos relatorios no web do CCG e as súas redes sociais. O vindeiro 30 de xuño publicaranse, nestas mesmas canles, as conclusións desta cita.

“Nós e o turismo cultural” é o título da xornada que o Consello da Cultura Galega (CCG) e a Fundación Vicente Risco (FVR) organizan mañá, sábado 29, en Allariz. Unha cita presencial que pretende ser un punto de encontro entre o sector turístico e o sector cultural. A actividade, que require inscrición, conta coa presenza de relatores como o antropólogo Rafael Quintía, o xornalista e profesor Manuel Gago ou o especialista Carlos Rodríguez, así como cos responsables de tres empresas galegas que funden as experiencias culturais e turísticas.

A presidenta do Consello da Cultura Galega, Rosario Álvarez destacou esta mañá no parlamento a singularidade da institución desde a súa xenese. “É un órgano asesor e consultivo, ten unha función protectora da cultura galega e ten capacidade de iniciativa para ofrecer propostas e non ten dependencia orgánica do poder executivo” sintetizou. A súa intervención tiña lugar no marco dunha xornada convocada polo Parlamento de Galicia para lembrar os retos das tres institucións xurdidas ao abeiro do Estatuto de Autonomía (CCG, Valedor do Pobo e Consello de Contas) cando se cumpren corenta anos da súa aprobación.

O fútbol galego débelle moito a Manolo de Castro “Handicap” (Vigo, 1885-1944). Foi un dos promotores do Celta de Vigo e da primeira selección galega que debutou o 19 de novembro de 1922 en Coia fronte á selección de Castela. Foi tamén deportista e como xornalista asinou numerosas crónicas en numerosas publicacións, entre elas “Nós” ou “Faro de Vigo”. A súa biografía, escrita por Adrián Estévez, acaba de incorporarse ao Álbum de Galicia.

“O que o Dereito afirma como certo en función da súa autoridade non sempre se corresponde coa verdade, nin tampouco necesariamente coa realidade” así o asegura a xuíza Garbiñe Biurrum, que mañá participa nunha nova cita do ciclo “Pensarmos”, organizado pola Sección de Pensamento do Consello da Cultura Galega (CCG). A súa intervención, que leva por título “A verdade xudicial: necesariamente lonxe da verdadeira verdade? Mentira aceptable?”, xa está dispoñible no web da institución. Mañá terá lugar, a través do web e da canle de Youtube do CCG, o debate en directo (18:00 horas) entre a propia Biurrum; a coordinadora do ciclo, Carme Adán, e a avogada Celia Pereira.

Nunha contorna virtual e co obradoiro de Afonso X como un dos escenarios tivo lugar o acto de entrega do premio da Game Jame sobre "Afonso X e Galicia" convocada polo Consello da Cultura Galega (CCG) e a Asociación Galega do Videoxogo. A presidenta do CCG, Rosario Álvarez; a secretaria, Dolores Vilavedra; e a representante do xurado e da asociación Videoxogo.gal, Luz Castro, participaron no acto de entrega do galardón, dotado con 250 euros, aos premiados. Carlos Balado e Pablo García de los Salmones foron os gañadores deste certame con “O mester”, un videoxogo que parte da tradición musical das “Cantigas de Santa Maria”, e propón duelos musicais cos personaxes das ilustracións do Códice.

O Consello da Cultura Galega (CCG) é, xunto co Valedor do Pobo e o Consello de Contas, unha das tres institución xurdidas ao abeiro do Estatuto de Autonomía aprobado no ano 1981. As tres entidades protagonizan este venres 28 un acto organizado polo Parlamento de Galicia para abordar os retos e oportunidades das institucións estatutarias con motivo do 40 aniversario do Estatuto. O acto pode seguirse en directo desde o web do Parlamento. Ao fío desta actividade, o Consello da Cultura Galega visibiliza unha serie de entrevistas con diferentes personalidades que axudaron a configurar a historia da institución, así como algúns dos actos máis destacados da súa traxectoria.

“O galego non só sobrevive na Internet senón que goza dunha vida excelente” así de claro é Carlos Pereiro, membro da Sección de Comunicación, Literatura e Sociedade do Consello da Cultura Galega (CCG) e coordinador da xornada “O galego vive nas redes“. A cita terá lugar mañá martes 25 de maio (19:00 horas) a través da web e redes sociais da institución e pretende analizar o presente e o futuro da nosa lingua nas plataformas de comunicación convidando a recoñecidas figuras das redes como Esther Estévez, Agos Reigosa, John Amil e María Saborís.

Unha das obras esenciais do rexurdimento galego, “Follas novas” de Rosalía de Castro, publicouse na Habana en 1880. Nesa illa xestáronse a nosa bandeira e o noso himno. Son só algúns exemplos da importancia que para os nosos emigrantes tivo a difusión e defensa da cultura galega. A oitava entrega do especial “Historias de ida e volta”, un proxecto web realizado polo Consello da Cultura Galega en colaboración coa Secretaría Xeral da Emigración, ofrece fotografías e documentos que poñen de manifesto as importantes iniciativas culturais que se desenvolveron a raíz do fenómeno migratorio tanto nos países de destino como en Galicia.

“A verdade xudicial: necesariamente lonxe da verdadeira verdade? Mentira aceptable?” é o título da intervención que a xuíza e presidenta da Sala do Penal do Tribunal Superior de Xustiza do País Vasco, Garbiñe Biurrum, ofrecerá no ciclo “Pensarmos”, organizado pola Sección de Pensamento do Consello da Cultura Galega (CCG) e que este ano se centra no concepto de verdade. A súa intervención será gravada e emitida no web do CCG o vindeiro martes 25 de maio. Dous días despois, o xoves 27, pola mesma canle emitirase o debate en directo (18:00horas) entre a propia Biurrum; a coordinadora do ciclo, Carme Adán, e a avogada Celia Pereira.

Antón García Zapata (Laxe, 1886 - Bos Aires, 1953) foi un nacionalista Galego e independentista. Viviu a maior parte do seu tempo na emigración, onde desenvolveu carreira como poeta. A súa biografía, escrita por Miro Villar, acaba de incorporarse ao Álbum de Galicia.

Tui tivo un papel relevante na historia da navegación marítima. Concentraba o poder civil e eclesiástico deste territorio fronteirizo que tivo en Baiona un dos seus portos importantes. Ademais, foi o lugar de orixe dalgunhas figuras destacadas como Sebastián de Ocampo, que descubriu que Cuba era unha illa. Esta é unha parte do relato que se pode ver en “Inventio Mundi”, a mostra organizada polo Consello da Cultura Galega (CCG) e pola Secretaría Xeral de Emigración. A presidenta do CCG, Rosario Álvarez, e o secretario xeral, Antonio Rodríguez Miranda, participarán este xoves (19:00 horas) xunto co alcalde de Tui, Enrique Cabaleiro, na inauguración desta mostra que se poderá visitar no Centro de Exposicións do concello ata o 9 de xuño.

O auxe dos podcast, a explosión do streaming a través de Twitch, o foro moderno de Discord, a capacidade humorística dos memes... A lingua galega está presente en todas as plataformas de comunicación. Sobre a situación actual pero tamén dos retos de futuro falarán o martes 25 de maio (19:00 horas) algúns dos protagonistas desa comunidade galega que habita en Internet como son Esther Estévez, Agos Reigosa, John Amil e María Saborís. A cita titúlase “Novas plataformas de comunicación. O galego vive nas Redes” está coordinada polo xornalista Carlos Pereira, e poderá seguirse en directo desde a web e as redes sociais do Consello da Cultura Galega (CCG).

Ao ritmo das “Ondas do Mar de Vigo” comezou a undécima edición do Concerto das Letras Galegas, iniciativa organizada polo Consello da Cultura Galega (CCG). LauraLaMontagne e PicoAmperio partiron do seu repertorio habitual, adaptación da lírica medieval a ritmo de hip hop, para dar paso a unha fusión poético musical cos textos da protagonista do Día das Letras Galegas: Xela Arias. O concerto esgotou as súas entradas e contou coa presenza de numerosas autoridades como a presidenta do CCG, Rosario Álvarez; o Alcalde de Vigo, Abel Caballero e outras figuras do mundo da sociedade e da cultura. O concerto retransmitiuse en directo desde o web do CCG e o da CRTVG, e poderá verse na G2 no propio Día das Letras Galegas.

O Pazo de Congresos Mar de Vigo acolle mañá domingo (20:00 horas) a undécima edición do Concerto das Letras Galegas, proposta musical que o Consello da Cultura Galega (CCG) celebra cada 16 de maio. O concerto chega coas súas entradas esgotadas e xuntará a experimentación musical de LauraLaMontagne e PicoAmperio coa obra poética de Xela Arias (1962-2003), figura á que se lle dedica nesta ocasión o Día das Letras Galegas. A apertura de portas do recinto terá lugar ás 19:00 horas. O concerto pode seguirse en directo desde o web do CCG e o da CRTVG, e no propio 17 de maio na segunda canle da TVG.

Carmen Díez Martín tocaba o piano todos os día da súa vida ás sete da tarde. Un día antes de morrer, con 103 anos, visitárona unhas antigas alumnas que cando lle dixeron que eran as sete, Carmen anunciou que era a hora de tocar e volveu pechar os ollos. O piano foi a súa paixón, que lle inculcaron na súa casa e á que lle dedicou a súa vida. Alejo Amoedo asina a biografía que acaba de incorporarse ao Álbum de Galicia.