Arquivo de noticias do CCG

A reunión de traballo coa comunidade de Newark abre mañá xoves as actividades da visita institucional que a presidenta do Consello da Cultura Galega (CCG), Rosario Álvarez, inicia esta semana en Nova York. Nela destaca a inauguración da exposición “Os adeuses” nun lugar emblemático para a emigración como é o Museo de Ellis Island (sábado 9 ás 12:00 horas). “É unha axenda ambiciosa que marca un fito na presenza exterior e visibilidade da cultura galega”, en palabras do vicepresidente do CCG, Xosé Manoel Núñez Seixas. A presidenta reunirase coas colectividades presentes en Nova York pero tamén con destacados responsables de centros académicos e de recoñecido prestixio. No marco desta viaxe darase a coñecer o proxecto dunha plataforma virtual para que os integrantes da diáspora galega partillen as súas experiencias de desenvolvemento profesional e creativo. Ademais, haberá mesas redondas en lugares destacados como son a Universidade de Columbia ou o Instituto Cervantes.

A tradución, o xornalismo e o universalismo son os tres eixes que marcaron a vida de Plácido Castro (1902-1967). Sobre estas tres facetas do galeguista discorrerá a xornada “Vocacións e ideais en Plácido Castro” que a Comisión de Acción Exterior do Consello da Cultura Galega (CCG) e o Concello de Cambados, en colaboración coa Fundación Plácido Castro, celebrarán o vindeiro venres 22 de febreiro en Cambados. A cita está coordinada por Xulio Ríos e acaba de abrir o seu prazo de inscrición no web do CCG.

Arte+coleccionismo e Arte+educación son dúas publicacións que achegan novas lecturas sobre o sector da arte e en relación con outras disciplinas. Son dous textos que recollen as intervencións de dous congresos realizados en 2015 e 2016, respectivamente, pero que teñen total vixencia. “Primeiro porque hai temas como o coleccionismo sobre o que non hai case nada publicado, e segundo porque a situación a día de hoxe aínda está bastante peor que daquela” apuntou Marisa Sobrino, editora dun dos textos e responsable da Sección do Consello da Cultura Galega (CCG) que programou aquelas citas. A presidenta da institución, Rosario Álvarez, apuntou a pertinencia de abordar este tipo de reflexións que contribúen a coñecer a situación actual, ao tempo que anunciou que “este ano prestaremos atención ao mecenado artístico, aínda que explorando outro tipo de formatos”. Ambos os dous volumes xa se poden descargar desde o sitio web corporativo.

“Entre cavernas: tecnopersonas e tecnomundos” é o título do relatorio que ofrecerá mañá no Consello da Cultura Galega (CCG) o filósofo e matemático Javier Echeverría (Pamplona, 1948). Con el ábrese o ciclo Pensarmos, coordinado por Carme Adán e que consiste en charlas, debates e intercambio de ideas que pretende abordar problemas actuais. A cita, organizada pola Sección de Pensamento do CCG, poderá seguirse en directo a través do web da institución.

A Sección de Pensamento do Consello da Cultura Galega (CCG) acaba de botar a andar o ciclo ”Pensarmos”, unha proposta de charlas, debates e intercambio de ideas que pretende abordar os problemas da actualidade. Posverdade, fascismos dixitais, tecnopersoas, precarización da vida, perda de liberdades… son algunhas das temáticas que se tratarán no marco deste foro, que comeza o día 24 de xaneiro coa participación do filósofo Javier Echevarría. A cita está coordinada por Carme Adán e celebrarase o cuarto xoves de cada mes. A primeira das citas xa ten aberto o prazo de inscrición no web do CCG.

Rodríguez é o apelido máis común en Galicia con 237.000 usuarios. Hai máis de 21.100 apelidos que teñen un único portador. Láncara, Sanfíns, Miñor, Santradán ou Manselle son algúns apelidos en perigo de extinción. Son cuestións que recolle Antroponimia e lexicografía, a publicación que elaboraron o Consello da Cultura Galega (CCG) e o Instituto da Lingua Galega (ILG) e que se deu a coñecer esta mañá. A presentación contou coa presenza da presidenta do CCG, Rosario Álvarez, quen destacou a calidade das diferentes contribucións. Canda ela estaban o director do ILG, Xosé Luís Regueira, e a editora do texto, Ana Isabel Boullón. Esta monografía, que xa se pode descargar desde o web do CCG, pretende contribuír a afondar no coñecemento dos apelidos en Galicia.

O Consello da Cultura Galega (CCG) celebrou no serán deste xoves unha sesión plenaria ordinaria na que se aprobou o programa de actividades para 2019. Entre elas figura o Concerto das Letras Galegas, que este ano correrá a cargo da orquestra SondeSeu; a colaboración institucional para a recuperación da figura de Antón Fraguas; unha maior innovación nos formatos de actividades así como o reforzo das actuacións en acción exterior e emigración. Nesta última liña, sitúase a exposición “Os adeuses”, en Ellis Island (Nova York), que se inaugura o vindeiro de 9 de febreiro e irá acompañada dun variado programa cultural. A sesión contou coa presenza do Presidente de Honra da institución, o presidente da Xunta de Galicia, Alberto Núñez Feijóo, quen destacou na súa intervención a relevancia do papel asesor do CCG.

O 7 de xaneiro de 1950 morría en Bos Aires, Alfonso R. Castelao. Unha efeméride que o Consello da Cultura Galega (CCG) conmemora cunha visita institucional á exposición “Alba de Gloria. Unha experiencia” que recrea o último gran discurso que pronunciou Castelao. Alí, ademais de poñer un ramo perante a tumba do intelectual rianxeiro, a presidenta do CCG, Rosario Álvarez, informou que ante a demanda da cidadanía a exposición amplía o seu prazo de apertura ata o 3 de marzo. Ademais, anunciou que se está a traballar nas itinerancias desta mostra que comezarán no segundo trimestre do ano.

Boa parte da obra de José Baldomir non está localizada e a que está figura dispersa en copias manuscritas ou en edicións de difícil acceso. Por iso, a publicación Melodías galegas de José Baldomir que o Consello da Cultura Galega presenta esta tarde é de gran relevancia na recuperación do patrimonio musical galego. A presentación terá lugar no salón de actos da Real Academia Galega de Belas Artes e contará coa participación da presidenta do CCG, Rosario Álvarez, a autora da publicación, Margarita Viso Soto, e do pianista e director Maximino Zumalave. Entre todos eles darán conta da relevancia da recuperación desta figura cimeira do rexurdimento musical galego.

María Rosa Lojo (Bos Aires, 1954) é arxentina de nacemento pero galega de pensamento. É unha das voces máis notables do ámbito hispanoamericano e na súa ampla e variada obra goza de numerosos recoñecementos, como o Prix International de Poésie Antonio Viccaro 2017, o Premio Konex ás letras, a Medalla da Hispanidade ou o Premio Saúl Taborda en Letras. A eles hai que lle engadir o “Gran Premio de Honor” da Sociedad Argentina de Escritores (SADE), distinción creada en 1945 que antes recibiron creadores como Jorge Luis Borges, Olga Orozco, Antonio Di Benedetto ou M. Elena Walsh. Lojo recollía o premio este martes 11 de decembro en Bos Aires.

Son de Galicia non é só unha exposición sobre catro formacións musicais que aínda permanecen activas; é unha mostra que recolle o espírito dunha época que sentou a través da música e do baile a nosa identidade. Está organizada polo Consello da Cultura Galega (CCG) e peneira nos arquivos dos catro coros históricos (Toxos e Froles, Cántigas da Terra, Coral De Ruada e mais Cantigas e Agarimos) para reconstruír a historia de Galicia. A exposición, presentada en rolda de prensa esta mañá, inaugúrase no serán (19:00 horas) pola presidenta do CCG, Rosario Álvarez; o director-xerente de Afundación, Pedro Otero; o comisario, Miguel Anxo Seixas; e os representantes dos catro coros. A mostra poderase ver na sede de Afundación da Coruña ata o 26 de xaneiro, desde onde itinerará por outras cidades galegas.

“Os espazos culturais da arte en Galicia: estado da cuestión” é o título da xornada que mañá celebra o Consello da Cultura Galega (CCG) e na que pretende saber cal é a situación e cales son as estratexias de futuro para espazos artísticos no noso país. A cita, que se poderá seguir en directo desde o web da institución, será inaugurada pola presidenta do CCG, Rosario Álvarez.

Hoxe, 5 de decembro, é o Día Mundial do Solo, que este ano se celebra baixo o lema “Sé a solución á contaminación do solo”. Con esta data, o Consello da Cultura Galega, o Consejo Superior de Investigaciones Científicas (CSIC) e a Xunta de Galicia colaboraron xuntos para presentar a reedición e as unidades didácticas da banda deseñada Vivir no solo. A presentación contou coa presenza da presidenta do CCG, Rosario Álvarez; da responsable da Unidade de Cultura Científica, Luísa Martínez; da investigadora científica do Instituto de Investigaciones Agrobiológicas de Galicia (IIAG), Montserrat Díaz Raviña, e do director xeral de Educación, Formación Profesional e Innovación Educativa, Manuel Corredoira López. Canda eles estaba Francisco Díaz-Fierros, promotor inicial deste título de banda deseñada que cumpre 18 anos.

O 35% dos directivos de centros culturais de Galicia escóllense por libre designación; o 29% por concurso público, un 9% por outros mecanismos regulados e no 23% dos casos restantes descoñecemos a fórmula empregada. Son algunhas das cifras do “Informe sobre a provisión de postos directivos no ámbito cultural” que acaba de facer público o Consello da Cultura Galega. O documento establece unha serie de recomendacións para este tipo de postos, como a necesidade de que a Administración impulse principios xerais que regulen a contratación de directivos da esfera pública, que se fomente replicar iniciativas como os “códigos de boas prácticas” e que se teña en conta nun proceso de selección un proxecto de xestión que actúe como guía ou programa de actuación.

Todos os países europeos realizan dous cambios horarios ao ano en virtude dunha directiva europea. A principios deste 2018 o goberno de Finlandia solicitou formalmente a súa supresión e puxo sobre a mesa as vantaxes e os inconvintes desa medida. A apertura deste debate suscitou grandes críticas e polémicas no que a ciencia ten moito que dicir. Esta é a tese que defende Jorge Mira, coordinador da xornada “É racional o cambio estacional de hora?” que organiza o Consello da Cultura Galega e que terá lugar mañá. A cita estará inaugurada pola presidenta da institución, Rosario Álvarez e poderá seguirse en directo desde o web e desde a nosa canle de Youtube.

Todos os países europeos realizan dous cambios horarios ao ano en virtude dunha directiva europea. A principios deste 2018 o goberno de Finlandia solicitou formalmente a súa supresión e puxo sobre a mesa as vantaxes e os inconvintes desa medida. A apertura deste debate suscitou grandes críticas e polémicas no que a ciencia ten moito que dicir. Esta é a tese que defende Jorge Mira, coordinador da xornada “É racional o cambio estacional de hora?” que organiza o Consello da Cultura Galega. A cita terá lugar en Santiago o vindeiro día 4 de decembro e xa abriu o prazo de inscrición a través do web da institución.

O centro José Ángel Valente (rúa do Paseo, 20. Ourense) acolle mañá a terceira das citas do programa IN SITU, que analiza a situación dos cascos históricos. Nesta ocasión búscase coñecer a evolución dos núcleos de Ourense e Ribadavia que contan con dúas décadas de experiencia na xestión patrimonial. A presidenta do Consello da Cultura Galega (CCG) Rosario Álvarez, será a encargada de inaugurar esta xornada coordinada por Rebeca Blanco e Teresa Nieto.

A situación da arte en Galicia así como as estratexias de futuro para espazos artísticos son os eixes sobre os que pivota a xornada “Os espazos culturais da arte en Galicia: estado da cuestión” que organiza o Consello da Cultura Galega (CCG). A cita, que terá lugar o vindeiro 11 de decembro, ten aberto o seu prazo de inscrición a través do sitio web do CCG.

Varios membros da Comisión Executiva do Consello da Cultura Galega realizaron esta semana unha visita ao Museo de Pontevedra. O equipo conformado pola presidenta, Rosario Álvarez; a secretaria, Dolores Vilavedra; a vogal, María Xosé Porteiro; e o xerente, Marcelino Fernández; mantiveron un encontro co director do Museo, Carlos Valle. A visita inscríbese nunha das liñas de traballo da nova Executiva, que ten previsto desenvolver un intenso programa de visitas e contactos coas principais institucións e axentes culturais de Galicia.