María Luisa Pérez-Soba

Primeira Doutora en Enxeñería Agrónoma en GaliciaAínda que naceu en Burgos o 29 de xuño 1930, desde que tiña meses viviu na Coruña, cidade na que falecería o 8 de febreiro de 2021. O seu pai, o comandante do exército español Antonio Pérez-Soba, nacera en Madrid pero estivo destinado na Coruña a cargo da Brigada Obreira e Topográfica do Estado Maior, na Comisión Xeográfica de Galicia, polo que "Marisina", como a chamaban familiarmente, tivo contacto desde moi cativa co agro galego o que, sen dúbida, influíu na súa vocación agronómica desde moi cativa tivo contacto co agro galego o que probablemente influiría na súa vocación agronómica, xunto coa figura do seu avó materno Fernando Baró Zorrilla, un prestixioso Enxeñeiro de Montes. A súa nai, María Luisa Baró Morón, tiña o título de mestra e o seu exemplo alentaría a paixón da nena polos estudos.
Comezou os estudos de primaria no colexio San Xosé Madres Xosefinas da Coruña e fixo o bacharelato e o preuniversitario no Colexio do Sagrado Corazón de Placeres (Pontevedra), onde fora matriculada cando, con doce anos, perdeu á súa nai.
Rematado o ensino primario e secundario trasladouse a Madrid para realizar os estudos universitarios, decidida a facer Enxeñería Agrónoma na Escuela Especial de Ingenieros Agrónomos, que despois se chamou Escuela Técnica Superior de Ingenieros Agrónomos. O plan de estudos desta escola establecía que o curso selectivo e mais o de iniciación debían realizarse nas mesmas instalacións, onde despois estudará toda a carreira, desde 1954 ata 1959, obtendo o noveno mellor expediente da súa promoción. En 1960 defendeu o seu proxecto de fin de carreira e obtivo o título de Enxeñeira Agrónoma o 11 de xullo de 1960, converténdose na primeira enxeñeira agrónoma galega e a quinta enxeñeira en España en titularse na Escuela de Ingenieros Agrónomos de Madrid.
Posteriormente, obtería o título de Doutora Enxeñeira por Orde ministerial do 15 de xullo de 1963.
Na súa promoción, a número 99, só se licenciaron dúas mulleres entre sesenta e oito alumnos: Mercedes Soler Sanz e María Luisa Pérez-Soba y Baró. Cando Soler Sanz e Pérez-Soba obtiveron o título había xa vinte anos que se licenciara, en 1929, Pilar Careaga Basabe, a primeira enxeñeira industrial en España; e pasaran dez desde que o fixera Isabel Torán Carré, a primeira enxeñeira agrónoma, que obtivera o título en 1939.
Mercedes Soler foi funcionaria do Cuerpo Especial de Ingenieros Agrónomos e xefa do servizo de Análisis de Consumo Alimentario. Luisa Péres-Soba traballou en Industrias e Comercialización Agraria (ICA) na oficina da Delegación da Consellaría de Agricultura na Avenida de Monelos da Coruña e foi xefa provincial de Industrias e Comercialización Agraria tamén da Coruña, dependente entón da Consellería de Agricultura. Tamén foi e Delegada Provincial en funcións de Industrias e Comercialización Agraria da Coruña da Consellería de Agricultura da Xunta.
Participou na creación do Colexio Oficial de Enxeñeiros Agrónomos de Galicia coa súas delegacións na Coruña, Lugo, Ourense e Pontevedra e foi a primeira Secretaria do Colexio Oficial de Enxeñeiros Agrónomos da Coruña desde xuño de 1962 ata decembro de 1976.
Polo seu traballo participou e asistiu a numerosos congresos e xornadas técnicas de Industrias Agrarias e Comercialización, destacando polo seu dinamismo e afabilidade. Como anécdota, nun congreso en Nova York coincidiu coa prestixiosa economista Paulina Beato á que lle agradeceu, tanto que a animase a estudar, como tamén a influencia que exerceu nos seus pais, dos que era amiga, para que lle permitisen estudar a carreira universitaria que a levou a ser unha destacada profesional da economía.
María Luisa Pérez-Soba casou en Madrid o 10 de novembro de 1961, xa coa carreira rematada, con Pedro Fernández Rico, doutor e enxeñeiro agrónomo do YRIDA destinado na Coruña. O matrimonio tivo tres fillos: Pedro, técnico comercial; Álvaro, enxeñeiro agrónomo e profesor de ensino secundario; e Gonzalo, xornalista.

Fontes documentais Fernández, Gonzalo (2021): «Adeus á primeira agrónoma de Galicia», Eco: revista do Eixo Atlántico, 358 (marzo), 46-48. Fernández García, María Isabel (2021): «Relatorio do V Concurso Fin de Grao sobre Enxeñaría e Muller Rural». Entrega de premios. EPSE de Lugo (12 de marzo). Accesible en: https://www.youtube.com/watch?v=V8lIMonNMW0&t=849s [Consulta: 2022-07-22] Fernández García, María Isabel e Gómez Fórneas, Esther (2021): «A primeira enxeñeira agrónoma en Galiza». Accesible en: http://ciencianosa.blogspot.com/2021/03/do-dia-internacional-da-muller-no-marco.html [Consulta: 2022-07-21] Palacios, Xosé María: «Somos agro: ¿Quién fue Luisa Pérez-Soba y Baró, la primera ingeniera agrónoma de Galicia?», La Voz de Galicia, (11 de marzo). Accesible en: https://www.lavozdegalicia.es/noticia/somosagro/forestal/2021/03/10/luisa-perez-soba-baro-primera-ingeniera-agronoma-galicia/00031615397344074307518.htm [Consulta: 2022-07-22] Redacción (2021): «Lugo lembra a Luisa Pérez, a primeira enxeñeira agrónoma de Galicia», www.gciencia.com, (11 de marzo). Accesible en: https://www.gciencia.com/universidade/lugo-lembra-a-luisa-a-primeira-enxeneira-agronoma-de-galicia/ [Consulta: 2022-07-22] USC. Campus de Lugo (2021): «A memoria da primeira enxeñeira agrónoma de Galicia revive no Campus de Lugo», Accesible en: https://www.usc.gal/gl/xornal/novas/memoria-primeira-enxeneira-agronoma-galicia-revive-campus-lugo, (11 de marzo) [Consulta: 2022-07-22]