Sociedades da vixilancia

Xornada

Sociedades da vixilancia

A cultura como refuxio

2 de xuño de 2026
Santiago de Compostela

Xornada

Sociedades da vixilancia

A cultura como refuxio

2 de xuño de 2026 Santiago de Compostela

O ciclo de pensamento e cultura “A cultura como refuxio” nace coa vontade de abrir un espazo de reflexión compartida arredor do papel que desempeña a cultura nun contexto contemporáneo marcado pola incerteza, a aceleración tecnolóxica e a crecente sensación de exposición permanente.

Nun mundo atravesado por dinámicas de control, monitorización e extracción de datos, a cultura emerxe non só como lugar de creación e encontro, senón tamén como un territorio de resistencia, abrigo e pensamento crítico.

Esta xornada propón afondar nas transformacións sociais derivadas da implantación masiva de tecnoloxías de control e na súa incidencia sobre a vida cotiá, a liberdade individual e as prácticas culturais. A través do diálogo coa xornalista e investigadora Marta Peirano —referente na análise das relacións entre tecnoloxía, poder e sociedade—, abrirase unha conversa que nos convida a cuestionar os límites entre seguridade e vixilancia, entre innovación e dominación.

A sesión complétase cun conxunto de relatorios que exploran, desde distintas disciplinas, como a palabra, as artes e o pensamento poden actuar a modo de refuxio fronte ás lóxicas de control. A intervención de Roberto Pascual propón unha ollada sobre o teatro como espazo de resistencia e de construción de alternativas simbólicas e no caso de Marina García Canedo sobre Body monitoring: panóptico e corpo feminino.

Nun tempo de exposición constante, pensar en conxunto convértese, máis que nunca, nun acto de coidado e de liberdade.