Arquivo de noticias do CCG

Dos alalás e da lírica medieval ata a actual escena musical en galego, a nova entrega de “Proxector”, iniciativa de divulgación en galego promovida polo Centro de Documentación Sociolingüística de Galicia (CDSG) do Consello da Cultura Galega (CCG) e pola Universidade de Santiago de Compostela (USC), conmemora o Día Europeo da Música (21 de xuño) cunha ducia de vídeos. Baixo o título Lingua e música en sintonía, abórdanse temas como os seráns, as regueifas, as músicas urbanas e outros estilos musicais.

Dos alalás e da lírica medieval ata a actual escena musical en galego, a nova entrega de “Proxector”, iniciativa de divulgación en galego promovida polo Centro de Documentación Sociolingüística de Galicia (CDSG) do Consello da Cultura Galega (CCG) e pola Universidade de Santiago de Compostela (USC), conmemora o Día Europeo da Música (21 de xuño) cunha ducia de vídeos. Baixo o título Lingua e música en sintonía, abórdanse temas como os seráns, as regueifas, as músicas urbanas e outros estilos musicais.

O patrimonio cultural galego enfróntase con frecuencia a situacións de risco derivadas de fenómenos naturais e de emerxencias ambientais. O tren de borrascas do inicio de ano provocou o derrubamento parcial da Muralla de Lugo, mentres que os incendios forestais do pasado verán afectaron numerosos bens patrimoniais. Son algúns exemplos da vulnerabilidade do patrimonio ante eventos extremos e da necesidade de desenvolver estratexias de prevención, protección e resposta. Cuestións que aborda a xornada “A xestión de riscos e a resposta ás emerxencias no patrimonio cultural”, coa que se pecha o ciclo “Encontros Temáticos Transversais dende o Patrimonio Cultural” (ETTPC). Un espazo de debate organizado pola Sección de Patrimonio e Bens Culturais do Consello da Cultura Galega, que leva dous anos promovendo unha análise interdisciplinar do territorio e dos seus valores patrimoniais. Os encontros ábrense mañá (17:00 horas) cunha intervención de Arsenio Sánchez Henampérez, cocoordinador do Plan Nacional de Xestión do Risco e Emerxencias en Patrimonio Cultural. Seguirán o xoves 11 (17:00 horas) cun debate a cargo de profesionais que traballan no ámbito galego sobre este asunto. A cita, coordinada por Teresa Nieto, Rebeca Blanco-Rotea e Carlos Amoedo, é presencial e pode seguirse en directo a través do web do CCG e a súa canle de YouTube.

Un gran coro formado por 400 nenas e nenos chegados de toda Galicia cantou esta tarde en Vilalba as verbas dos poetas da Terra Chá no concerto “No bico un cantar”. “Esta é unha actividade pensada para a rapazada, auténticos protagonistas, nunha experiencia que esperemos sexa inesquecible”, apuntou a presidenta do Consello da Cultura Galega (CCG), Rosario Álvarez, no inicio desta actividade esta institución organiza xunto coas consellerías de Educación, Ciencia, Universidades e Formación Profesional e de Cultura, Lingua e Xuventude da Xunta de Galicia máis a colaboración do Concello de Vilalba. O director xeral de Cultura, Anxo Lorenzo, destacou a iniciativa “na que cada ano se implican centos de persoas dando mostra dun importante traballo colectivo a prol da nosa cultura que é especialmente relevante pola implicación das xeracións máis novas”. Unha idea na que incidiron a alcaldesa de Vilalba e a directora xeral de Educación Profesional, Eugenia Pérez, nas súas intervencións. Maximino Zumalave dirixiu este gran coro acompañado da formación de metais Hércules Brass, con Rosa Aneiros como mantedora. Ademais, anunciouse que a vindeira edición homenaxeará a Xosé Neira Vilas.

A presidenta electa do Consello da Cultura Galega (CCG), Dolores Vilavedra (Vigo, 1963), compareceu na tarde deste venres na Comisión 4ª de Educación e Cultura do Parlamento de Galicia, no paso previo ao seu nomeamento oficial. Alí perfilou as liñas xerais do seu mandato que se caracterizan por reforzar o Observatorio da Cultura Galega, avanzar nos dereitos culturais, chegar a novos públicos e adaptar a institución aos retos de futuro. Entre as primeiras medidas anunciou un informe sobre a lectura e un plan cuatrienal de dixitalización. O seguinte trámite será o nomeamento polo Consello da Xunta de Galicia e, posteriormente, a súa publicación no Diario Oficial de Galicia.

“A lectura é a práctica cultural máis sólida da sociedade galega e a que presenta unha evolución máis favorable”, afirma o informe Hábitos e prácticas culturais en Galicia. Tendencias e determinantes da participación cultural, elaborado polo Observatorio da Cultura Galega do Consello da Cultura Galega (CCG). Os datos revelan que na última década medrou 6,4 puntos a porcentaxe de persoas que leron un libro e que se reduciu á metade a porcentaxe de persoas que non len nunca. O informe constata tamén unha transformación dos hábitos culturais en Galicia, cada vez máis dixitais e vinculados ao fogar. O informe xa se pode descargar desde o web do CCG.

O Centro de Documentación en Igualdade e Feminismos (CDIF) do Consello da Cultura Galega (CCG) vén de incorporar novos materiais ao fondo Movemento Feminista Organizado en Galicia (MFOG). A iniciativa pioneira que arrincou no mes de abril, ofrece unha segunda entrega documental composta por máis de 800 novos rexistros procedentes de dez organizacións e colectivos que desempeñaron un papel fundamental na historia recente dos feminismos en Galicia. Esta nova achega permite ampliar o coñecemento sobre as loitas, debates, campañas e formas de organización desenvolvidas por diferentes xeracións de mulleres desde a década de 1970 ata os primeiros anos do século XXI.

A Terra Chá protagoniza a décima edición de No bico un cantar, actividade organizada polo Consello da Cultura Galega (CCG), a Consellería de Educación, Ciencia, Universidades e Formación Profesional e a Consellería de Cultura, Lingua e Xuventude da Xunta de Galicia, coa colaboración do Concello de Vilalba. “Unha actividade que percorre todo o país e que pon música á tradición literaria galega para divulgala entre o alumnado dos conservatorios e centros de ensino musical”, apuntou a presidenta do CCG, Rosario Álvarez, na presentación desta edición. O director xeral de Cultura, Anxo Lorenzo, destacou que se trata “dun proxecto moi querido que resulta dun esforzo colectivo que ten por detrás moitas entidades”. Unha idea na que incidiu o subdirector xeral de Aprendizaxe Permanente, Ensinanzas Artísticas, Idiomas e Deportivas, Rubén Vázquez, ao destacar “a colaboración como un piar fundamental para achegar a cultura galega á cativada de toda Galicia”. A alcaldesa de Vilalba, Marta Rouco, salientou a implicación do Concello, que xuntará este venres (5 de xuño, ás 17:30 horas) 400 nenas e nenos chegados de toda Galicia. O director do concerto, Maximino Zumalave, apuntou que se “trata dunha xornada especial que permite facer música con xente moi nova”. Por último, Alejo Amoedo, membro da Comisión Executiva, destacou a excelencia musical que caracteriza o programa, “desde a dirección do concerto polo mestre Zumalave ata os arranxos realizados por Juan Durán”.

O 5 de xuño celébrase o Día Mundial do Medio Ambiente. Con motivo desta efeméride, o Consello da Cultura Galega (CCG), en colaboración coa Asociación Ecoloxista Galega (ADEGA), celebra este luns, ás 16:40 horas, na sede do CCG, unha sesión na que se presentará un novo módulo de historia desta asociación ecoloxista. A continuación, terá lugar un debate arredor do movemento ecoloxista e dos novos e complexos problemas ambientais. O debate poderá seguirse en directo a través da web do CCG e da súa canle de YouTube.

O Consello da Cultura Galega (CCG), a través da Comisión técnica de xestión e políticas culturais e a Sección de Pensamento, abre este martes (2 de xuño, 16:45 horas) a primeira sesión do ciclo “A cultura como refuxio”, unha iniciativa que nace coa vontade de abrir un espazo de reflexión compartida arredor do papel que desempeña a cultura nun contexto marcado pola aceleración tecnolóxica, a crecente dixitalización da vida cotiá e a sensación de exposición permanente que caracteriza as sociedades contemporáneas. “Sociedades da vixilancia” é o titulo desta xornada inaugural que analiza, da man de especialistas como Marta Peirano, o papel da cultura fronte ás lóxicas de control e monitorización. A sesión pode seguirse en directo desde o web do CCG e a canle de YouTube.

O Álbum de Galicia, colección de biografías do Consello da Cultura Galega (CCG) dedicada á divulgación das figuras máis destacadas da historia e da cultura do país, incorpora desde hoxe —coincidindo coa data do seu nacemento— a entrada de Agustín Fernández Paz (Vilalba, 1947 – Vigo, 2016), unha das voces fundamentais da literatura galega contemporánea e referencia imprescindible da literatura infantil e xuvenil. Manuel Bragado e Isabel Soto asinan a biografía do autor vilalbés e defíneno como “escritor, mestre, activista, piar da literatura infantil e xuvenil galega”.

Pancartas, fotografías, publicacións, cartaces, obxectos, accións simbólicas e materiais documentais permiten reconstruír as principais loitas feministas desenvolvidas en Galicia desde os anos setenta ata a actualidade. Conforman o relato discursivo de Eu tamén navegar. As ondas do feminismo galego, o novo proxecto expositivo do Consello da Cultura Galega (CCG). A mostra conmemora medio século de feminismo organizado en Galicia e propón unha reflexión sobre a fonda pegada social, política e cultural do movemento feminista no país. A presidenta do CCG, Rosario Álvarez; a vicerreitora de Cultura, Lingua e Patrimonio da USC, Ana Cabana; máis Montse Fajardo e Carme Adán, comisarias da mostra, inauguraron na tarde deste venres a mostra, que se poderá visitar no Claustro Alto do Colexio de Fonseca en Santiago ata o vindeiro 9 de xullo.

Entre outubro do 1921 e xaneiro de 1922, un grupo de emigrantes naturais do concello lugués de Abadín decidiron crear na Habana unha asociación, seguindo o modelo de moitos emigrantes que foron creando sociedades alén mar nas primeiras décadas do século XX. Chamáronse “Hijos del ayuntamiento de Abadín” e máis dun século despois continúa activa. Material desa sociedade sóbese hoxe á rede no marco do proxecto “Memoria documental das sociedades da emigración galega” que mantén o Arquivo da Emigración Galega do Consello da Cultura Galega (CCG). Un material para por en valor estes fondos documentais e ofrecer un mellor coñecemento e comprensión da traxectoria da emigración galega.

“Eu tamén navegar” é o lema co que o Centro de Documentación en Igualdade e Feminismo (CDIF) do Consello da Cultura Galega (CCG) conmemora medio século de feminismo organizado en Galicia e reflexiona sobre a súa pegada social, política e cultural. Faino a través de dúas actividades que arrincan este venres en Santiago de Compostela. Pola mañá ábrese o congreso “Eu tamén navegar. Cincuenta anos de feminismo galego” que reunirá en varios espazos da cidade a investigadoras, escritoras, docentes, activistas, xornalistas e representantes do movemento feminista galego para analizar as distintas etapas, debates e transformacións producidas desde os anos setenta ata a actualidade. O congreso, que inaugura a presidenta do CCG, Rosario Álvarez, xunto con María Xosé Agra e Carme Adán, pode seguirse en directo desde o web e as redes sociais da institución. Pola tarde terá lugar a inauguración da exposición “Eu tamén navegar. As ondas do feminismo galego” que visibiliza materiais de diferente tipo producidos e xerados por este movemento ao longo da súa traxectoria.

Dolores Vilavedra (Vigo, 1963), catedrática de Literatura Galega da Universidade de Santiago de Compostela (USC), foi elixida esta tarde presidenta do Consello da Cultura Galega (CCG) por unanimidade. Vilavedra formaba parte do Plenario como representante do Instituto da Lingua Galega e releva a Rosario Álvarez tras a fin do seu mandato. Na sesión tomaron posesión os novos membros: Eduardo Corbelle, Ramón Nicolás, Susana Reboreda e a nova reitora da USC, Rosa Crujeiras.

O Consello da Cultura Galega (CCG) acolleu a presentación da edición facsimilar do libro Árbol de Julio José Casal (Montevideo, 1889 -1954). A presidenta do CCG, Rosario Álvarez, destacou no acto a figura de Julio José “que chega a Galicia como cónsul e desenvolve un labor extrarodinario como promotor da revista Alfar que é unha xoia mire por onde se mire”. Unha idea na que tamén afondou Ramiro Rodríguez Bausero, cónsul xeral do Uruguai. Pablo Eguren, neto do poeta, leu varios dos poemas da obra, que vén de cumprir 100 anos da súa saída ao prelo; Pilar Cagiao, historiadora e profesora da Universidade de Santiago de Compostela (USC), situou a acción de Casal no marco da actividade cultural desenvolvida desde os equipos consulares e, nomeadamente, nos vínculos entre Galicia e Uruguai.

A presidenta do Consello da Cultura Galega (CCG), Rosario Álvarez, e o conselleiro de Emprego, Comercio e Emigración, José González, mantiveron un encontro onde ambos os dous puxeron en valor a colaboración interinstitucional á hora de promover actividades relacionadas coa promoción, conservación e recuperación do patrimonio cultural da emigración galega. Ademais, asinaron un acordo, cunha achega económica de 50.000 euros, que permitirá a elaboración de exposicións ou publicacións de temática migratoria, ademais de garantir o traballo de conservación de material documental.

O Arquivo da Emigración Galega do Consello da Cultura Galega (CCG) vén de incorporar no marco do proxecto “Repertorio da prensa da emigración galega”, unha selección de exemplares da revista Vida Gallega, publicación editada na Habana entre 1938 e 1954 pola Sociedade de Beneficencia de Naturais de Galicia de Cuba.

“A pandeireta galega. Actualización dun instrumento ancestral” é o título da exposición coa que o Consello da Cultura Galega (CCG) pretende poñer en valor o labor de mestres artesáns, músicos e estudosos da pandeireta. O proxecto continúa a súa itinerancia este venres, 22 de maio, no Edificio Multiusos de Rois. A mostra ábrese cunha sesión de relatorios (18:00horas) arredor dos usos e das técnicas deste instrumento e a transmisión usando como exemplo as pandeireteiras de Rois. Despois, Rosario Álvarez, presidenta do CCG; o alcalde de Rois, Ramón Tojo; máis os comisarios da exposición, Luciano Pérez Díaz e Suso Vaamonde Manteiga, inaugurarán a mostra que se pode visitar ata o 11 de xuño.

Jesús Vázquez Gayoso (A Pontenova, 1909 – México, 1970) foi escritor, avogado e político, e unha das figuras máis destacadas do exilio republicano galego en América, cunha intensa traxectoria política, académica e humanitaria vinculada á defensa da Segunda República. A súa familia cedeu hoxe ao Consello da Cultura Galega (CCG) o seu legado documental para a súa conservación e estudo. A presidenta do CCG, Rosario Álvarez; dous dos fillos de Vázquez Gayoso, Jesús e Juan Vázquez; e os historiadores Emilio Grandío e Xurxo Martiz Crespo contextualizaron a súa figura e salientaron o valor deste fondo documental para o estudo do exilio republicano e da memoria democrática galega.