As protestas, iniciadas en marzo de 2011 en Siria, ao abeiro da chamada “primavera árabe”, “deixaron ao descuberto unha fenda na sociedade, que se abría de maneira ostensible entre adiñeirados e desposuídos, pero que tamén viña a darlle máis complexidade a unha imaxe meramente económica do que constituía a boa vida”. Lisa Wedeen, profesora de Ciencia Política na Universidade de Chicago (EE.UU.) e especialista en Oriente Próximo, e Allais Hajou, director sirio de series televisivas de humor, protagonizaron unha nova sesión do seminario interdisciplinar O(s) Sentido(s) da(s) Cultura(s). As intervencións sobre o tema “Ideoloxía e humor en tempos escuros. Notas desde Siria”, tiveron lugar esta tarde na Biblioteca do Consello da Cultura Galega. A politóloga analizou, da man das series de Allais Hajou, as influencias da risa “na era autocrática e de mercado en que viven uns cidadáns que saben moito da televisión de Bachar Al Asad”. “A comedia e a risa que esta provoca, afirmou, serven para levar a cabo un importante labor ideolóxico, unhas veces reforzando as convencións políticas e outras presentándolles grandes desafíos”.
Ler máis
Resultados da busca para: 'Allais Hajou'
Amosando noticias 1 a 1 de 1