Arquivo de noticias do CCG

O 16 de novembro celébrase o Día do Patrimonio, día instaurado pola UNESCO para chamar a atención sobre o seu coidado, protección e preservación. Co gallo da efeméride, o Consello da Cultura Galega (CCG) presentará mañá de maneira simultánea (as 19:30 horas) en Lugo, Ourense, A Coruña e Pontevedra a Guía práctica do Foro Patrimonio e Sociedade. Trátase dun documento fundamental para a xestión do patrimonio en Galicia e que é resultado de tres anos de traballo por parte dunha trintena de especialistas coordinados pola investigadora Rebeca Blanco-Rotea. Ademais, este martes remata en Santiago de Compostela a xornada “Novas perspectivas para o futuro do patrimonio” coordinada por María Isabel Novo cunha sesión que analiza aspectos novidosos na lei, como a consideración da lingua e a toponimia como patrimonio inmaterial e o impacto da contaminación ambiental e lumínica sobre os bens. A cita ten as prazas cubertas pero pode seguirse en directo a través do web do CCG.

O Consello da Cultura Galega (CCG) realizou en 2021 28 Informes de Impacto Ambiental, 3 informes en materia de patrimonio e outros 5 para a declaración de Ben de Interese Cultural. Ademais, neste período detectouse un incremento de solicitudes de informes sobre afeccións ao patrimonio desde diferentes partes de Galicia. “Levamos anos detectando a necesidade da cidadanía de información, amparo e asesoramento sobre actuacións que afectan ao noso patrimonio” recoñece Rebeca Blanco-Rotea, responsable da Sección de Patrimonio e Bens Culturais do Consello da Cultura Galega. Por ese motivo, o CCG celebra o Día de Patrimonio con dúas accións encamiñadas a mellorar a xestión patrimonial e ofrecer á cidadanía recursos para poder atender as súas necesidades nesta materia. A primeira delas é a xornada “Novas perspectivas para o futuro do Patrimonio Cultural en Galicia” (Santiago, 15 e 16 de novembro) e a segunda é a presentación simultánea en Lugo, Ourense, Pontevedra e A Coruña da Guía Práctica Foro Patrimonio e Sociedade.

Cova dos Mouros (Baleira, Lugo), Penedo Gordo (Vilardevós, Ourense), Casaio (Valdeorras, Ourense) e a Ceadá das Laxes das Chás/Castelo de Lobarzán (Monterrei e Oímbra, Ourense) son catro núcleos nos que apareceron diferentes mostras de pintura rupestre esquemática. E os catro espazos serán declarados Ben de Interese Cultural. Así o anunciou Beatriz Comendador, unha das coordinadoras da xornada “Paisaxes tatuadas” coa que o Consello da Cultura Galega pretendía analizar de xeito integrado este tipo de manifestacións artísticas. A presidenta da institución, Rosario Álvarez, destacou na inauguración a pertinencia deste tipo de encontros que conectan a sociedade coa investigación. Pola súa parte, a coordinadora da Sección de Patrimonio, Rebeca Blanco-Rotea, lembrou que esta xornada suma o número 29 dos Encontros Monográficos co Patrimonio Cultural que cumpren cinco anos fomentando a comunicación e o debate arredor de espazos singulares.

Representan esquemáticas figuras humanas acompañadas de motivos xeométricos, dunha soa cor que foi aplicada coa xema do dedo ou con pinceis. As pinturas rupestres esquemáticas, tamén chamada arte esquemática pintada, apareceron recentemente en espazos como a Cova dos Mouros (Baleira, Lugo), Penedo Gordo (Vilardevós, Ourense), Casaio (Valdeorras, Ourense) ou a Cerca das Laxes das Chás/Castelo de Lobarzán (Monterrei e Oímbra, Ourense). A descuberta, o estudo e a significación destes achados nunha visión de conxunto centran a xornada “Paisaxes tatuadas” que terá lugar mañá no Consello da Cultura Galega. A presidenta da institución, Rosario Álvarez, xunto con Rebeca Blanco-Rotea, coordinadora da Sección de Patrimonio e Bens Culturais, serán as encargadas de abrir esta cita (16:15 horas), que fai a número 29 dos Encontros Monográficos co Patrimonio Cultural. A sesión poderá seguirse en directo na rede.

Para unha parte da poboación a arqueoloxía é esa profesión que paraliza e atrasa as obras, para outra é unha paixón e para algúns unha auténtica descoñecida. Todos os axentes implicados na actividade arqueolóxica: profesionais, investigadores, docentes ou técnicos participarán nunhas xornadas do Consello da Cultura Galega que pretenden trazar un estado da cuestión da arqueoloxía en Galicia. A cita, que se desenvolverá ata o xoves 15, conta cunha enquisa anónima e voluntaria na rede para coñecer a opinión da cidadanía sobre este sector. As xornadas poderanse seguir en directo desde o web da institución.

O Consello da Cultura Galega acollerá mañá xoves as “III xornadas sobre boas prácticas na conservación do patrimonio cultural. (O patrimonio inmoble: interaccións holísticas e calidade)”. Organizadas en colaboración coa Escola Superior de Conservación e Restauración de Bens Culturais de Galicia e tres asociacións profesionais do sector, as xornadas contarán coa asistencia de máis de cen expertos e estudiosos. Os debates poderán ser seguidos tamén vía streaming a través de www.consellodacultura.org