Arquivo de noticias do CCG

Ignoradas e sen ningún tipo de recoñecemento. Así se atopan moitas linguas minoritarias en Europa segundo puxo de manifesto Henrique Costas, profesor de Lingua Galega na Universidade de Vigo, durante a mesa de traballo que se desenvolveu esta mañá no marco dos VI Encontros de Normalización Lingüística na sede do Consello da Cultura Galega.

O Consello da Cultura Galega acolle os días 14 e 15 de outubro os Encontros para a Normalización Lingüística, que na sexta edición presentan os planos de normalización das universidades de Santiago e Vigo. E se o futuro do idioma depende da planificación institucional a curto e medio prazo, a supervivencia das linguas a nivel europeo tamén toma un camiño determinado segundo o amparo que lles proporciona a lexislación vixente. Esta necesidade de campañas de difusión e o pulo que supón a oficialización dunha lingua son dúas axudas a ter en conta en casos concretos coma o do galego estremeiro e dos esforzos dos case 78 000 falantes a favor da dignificación da súa fala.

A sexta edición dos Encontros para a Normalización Lingüística analizará o 14 e o 15 de outubro, na sede do Consello da Cultura Galega, a necesidade de indagar en novas fórmulas para a difusión da lingua, que xa se materializa nos deseños dos planos que están a realizar a Dirección Xeral de Política Lingüística da Xunta de Galicia e outras institucións, como as Universidades de Santiago e de Vigo ou o Concello de Santiago de Compostela. Estes catro proxectos abren novas vías no campo da dinamización, partindo de estudios previos sobre a situación do idioma, e nos que se reflicte o apoio dos cidadáns ó incremento da presencia pública do galego pero tamén a caída contínua de falantes entre as xeracións máis novas.