Arquivo de noticias do CCG

En 2013, a coincidir co 150º aniversario da publicación de Cantares gallegos, Luis García Montero pronunciou a conferencia “Rosalía de Castro e a poesía española contemporánea”. Formaba parte de Rosalía de Castro: tradición e modernidade, ciclo que tivo lugar en Madrid en outubro dese ano, coordinado polo crítico Ángel Basanta e organizado polo Consello da Cultura Galega, o Instituto Cervantes e a Xunta de Galicia.

Rosalía de Castro é a gran figura fundacional da cultura galega. Neste especial ofrecemos unha escolma de contidos e recursos elaborados polo Consello da Cultura Galega (CCG) ao redor da escritora e o seu longo ronsel tanto no ámbito da investigación como no da creación. Entre os contidos ofrecidos destaca unha carta inédita a Rosalía descuberta neste 2020. Foi escrita en 1886 e dirixida a José Villaamil. Podes consultala dentro do noso Epistolario Rosalía de Castro, no que recollemos toda a correspondencia mantida pola escritora.

Escritores como Domingo Villar, Manuel Forcadela, Bieito Iglesias, Diego Ameixeiras ou Miguel Anxo Fernández participarán mañá, xoves 6 de febreiro, nunha xornada de debate e análise sobre os 30 anos de novela negra en Galicia. A xornada conmemora o nacemento do xénero en lingua galega coa publicación de Crime en Compostela, de Carlos G. Reigosa, hai tres décadas. A inauguración está prevista para as 09.45 h. deste xoves 6 de febreiro.


Consulte o programa

O Instituto Cervantes, o Consello da Cultura Galega e a Xunta de Galicia organizan os próximos 22, 23 e 24 de outubro na sede central do Instituto Cervantes en Madrid, unha homenaxe á poeta e novelista Rosalía de Castro con motivo dos 150 anos da publicación da súa emblemática obra «Cantares galegos». Conferencias, debates e un concerto a cargo de Amancio Prada son os actos que se realizarán.

Santiago de Compostela, 12 de maio de 2011.- O 12 de maio ás 19 30 horas na Sala Valle Inclán do Círculo de Bellas Artes de Madrid (rúa Alcalá, 42) terá lugar o primeiro dos faladoiros do programa do Centenario  Cunqueiro (1911-2011) organizado polo Consello da Cultura Galega. Tres escritores (César Antonio Molina, Luís Mateo Díez e Vicente Araguas) e un crítico literario (Ángel Basanta), coordinados polo escritor e xornalista Carlos  Reigosa, falarán de “Cunqueiro desde Madrid”. Presentará o acto, como representante do Consello da Cultura, Henrique Monteagudo, coordinador do "Programa Cunqueiro".

A contaminación de intereses na elaboración da información cultural, o cinismo que preside o actual discurso do xornalismo e a necesidade de canalizar a cultura nos medios cara novas propostas foron os eixes que centraron a primeira parte do encontro "A información cultural en Galicia: algunhas ideas para un cambio", unha xornada que acolle durante todo o día o Consello da Cultura Galega e que foi inaugurada esta mañá polo Director Xeral de Comunicación da Xunta, Xosé Ignacio Otero, o decano da Facultade de Ciencias da Comunicación, Xosé López, e o presidente do Consello da Cultura Galega, Alfonso Zulueta de Haz.