Arquivo de noticias do CCG

Tras analizar os populimos en Europa, América Latina chega o momento de centrar o debate no caso español. O catedrático emérito de Historia do Pensamento e dos Movementos Políticos e Sociais na Universidad Complutense de Madrid, José Álvarez Junco, será o encargado de facer esa reflexión cun relatorio titulado “Populismos na España”. A súa intervención pecha este mércores 11 (17:00 horas) no Consello da Cultura Galega o ciclo coordinado polo profesor Ramón Máiz que dedicou catro sesións a analizar este concepto político tan común.

Carlos de la Torre é profesor de Socioloxía da Universidade de Kentucky e un experto en populismos. A súa intervención protagoniza a terceira sesión do ciclo “O populismo hoxe, Europa e América Latina”, que terá lugar o martes ás 17.00 horas na sede do Consello da Cultura Galega. O ciclo, coordinado polo profesor Ramón Máiz, pretende examinar este termo político desde múltiples perspectivas e conclúe este mércores coa intervención de José Álvarez Junco, catedrático emérito de Historia do Pensamento e dos Movementos Políticos e Sociais na Universidad Complutense de Madrid.

“Más populista será tu abuela!”. Esta frase pronunciada por José “Pepe” Mújica no marco da campaña electoral que o converteu en presidente de Uruguai é parte do título da conferencia que Francisco Panizza pronunciará este venres (17.00 horas) no Consello da Cultura. Nela analizará os discursos, as representacións e as actitudes de determinados políticos para responder a pregunta “De que falamos cando falamos de populismo?”. A súa conferencia insírese no ciclo “O populismo hoxe, Europa e América Latina”, coordinado polo profesor Ramón Máiz, e que pretende examinar este termo político desde múltiples perspectivas. A conferencia pode seguirse en directo desde o sitio web da institución.

Como xorden os novos populismos en Europa e cales son os seus argumentarios? Estas dúas preguntas centran a conferencia coa que o profesor da Universidade de Salamanca Iván Llamazares abre mañá mércores o ciclo “O populismo hoxe, Europa e América Latina”. Este programa, coordinado polo profesor Ramón Máiz, pretende achegar este termo político do que se fala tanto nos últimos tempos desde múltiples perspectivas. Son catro relatorios sobre o tema que se estenden ata 11 de novembro.

Alberto Fujimori, Hugo Chávez, Sarah Palin, Pablo Iglesias e os partidos Vlaams Belang ou o Front Nacional comparten o denominador común de ser etiquetados comunmente como populismo. O uso e abuso deste termo político centra o vindeiro ciclo do Consello da Cultura Galega. Baixo o título “O populismo hoxe, Europa e América Latina”, está coordinado polo profesor Ramón Máiz e consta de catro sesións. Entre todas elas preténdese reflexionar sobre o concepto con enfoques diferentes. A cita ábrese o vindeiro mércores 28 de outubro cunha conferencia de Iván Llamazares sobre os populismos en Europa.