Arquivo de noticias do CCG

O Consello da Cultura Galega desenvolveu unha sesión plenaria no serán deste xoves na que aprobou o plan de actividades para 2023. A celebración do corenta aniversario, a internacionalización da cultura galega e a acción exterior centrarán un ano en que a institución continuará coa súa actividade habitual de investigación, documentación, arquivo e asesoría. Entre as actividades previstas para o vindeiro ano destaca o foro Pensar o mundo desde Galicia, no que destacadas personalidades reflexionarán sobre sete temas, entre eles a intelixencia artificial, as sociedades multiculturais ou unha revisión dos modelos para unha economía de cultura. Ademais, incorporouse ao pleno Xesús Palmou, en representación da Real Academia Galega de Xurisprudencia.

Todas as persoas que casen en Galicia hoxe en día contan, salvo que se diga o contrario, cun réxime de gananciais. Con todo, hai voces que recollen a necesidade dun cambio de lexislación que actualice o acordo económico que se fixa, por defecto, desa unión matrimonial. Da pertinencia dese modelo fala a xornada “O réxime económico do matrimonio no dereito civil de Galicia: unha posible reforma”. A cita está organizada polo Consello da Cultura Galega e a Fundación Castelao, coa colaboración da Academia Galega de Xurisprudencia e Lexislación.

O Consello da Cultura Galega, en colaboración coa Universidade de Santiago de Compostela, conmemorou hoxe con dúas conferencias o 50 aniversario da compilación do Dereito Civil de Galicia (1963), un patrimonio xurídico -conxunto de ordenamentos de Dereito Privado- que permite que o Parlamento de Galicia teña competencias en materia de Dereito Civil Os relatorios foron impartidos pola maxistrada do Tribunal Constitucional, Encarna Roca Trías, e polo catedrático da Universitat de Barcelona, Aquilino Iglesia Ferreirós.

"O futuro do idioma galego xogarase nos espazos urbanos e a garantía do seu uso está moi relacionada coa concienciación das familias, que foi perdendo peso fronte á escola e a outros axentes máis ben castelanizadores", afirmou Gabriel Rei-Doval, da Universidade de Oxford, na conferencia inaugural dos VII Encontros para a Normalización Lingüística que hoxe e mañá teñen lugar en Santiago de Compostela organizados polo Centro de Documentación Sociolingüística (CDSG) do Consello da Cultura Galega (CCG).

A elaboración dun Plan Xeral de Normalización da lingua galega aberto, que busque o consenso de tódalas forzas políticas e a participación da sociedade. Esta foi a premisa fundamental na que fixo un maior fincapé o Director Xeral de Política Lingüística da Xunta, Xesús Pablo González Moreiras durante a súa intervención, que abriu os VI Encontros para a Normalización Lingüística, unhas xornadas que a sede do Consello da Cultura Galega acolle hoxe e mañá.

O concelleiro de Normalización Lingüística de Santiago sinalou no primeiro relatorio desta tarde a necesidade dun compromiso por parte de toda a cidadadanía compostelá para que o Consello Municipal de Normalización Lingüística acade unha efectiva difusión da lingua en tódolos niveis sociais e empresariais.

A quinta edición dos Encontros para a Normalización Lingüística inaugúrase mañá coa presencia do director xeral de Política Lingüística, Xesús P. González Moreiras, o director da Escola Galega de Administración Pública, Domingo Bello Janeiro, o presidente do Consello da Cultura Galega, Carlos Casares, e o director do Arquivo de Planificación e Normalización Lingüística, Henrique Monteagudo.