Arquivo de noticias do CCG

“O Consello de Galicia foi a alternativa dun grupo pequeno de exiliados galeguistas e republicanos necesaria para poder actuar na recuperación da democracia en España”. Así perfilou Ramón Villares esta entidade presidida por Castelao cando se cumpren 70 anos da súa creación. Esta efeméride dalle sentido a un seminario do Consello da Cultura Galega (CCG), Os exilios ibéricos en clave comparada, que remata mañá sábado coa análise doutros exilios coetáneos, os de Cataluña, País Vasco e Portugal.

Os exilios ibéricos en clave comparada é un seminario que analiza o fenómeno do exilio en clave contemporánea e, por primeira vez, pon en diálogo os casos catalán, vasco, galego e portugués. O seminario ten ademais outra finalidade, que é a de homenaxear o Consello de Galiza, cando se cumpren setenta anos da súa constitución. A cita arrinca mañá na sede do Consello da Cultura Galega cunha palestra a cargo do seu presidente, Ramón Villares.O seminario poderase seguir en directo a través do sitio web da institución.

O 15 de novembro de 1944, Alfonso Rodríguez Castelao, Elpidio Villaverde Rey, Ramón Suárez Picallo e Alonso ríos crearon en Montevideo o Consello de Galiza para “gardar, manter e defender a vontade do pobo galego”, tal e como figura na súa acta de constitución. Setenta anos despois, o Consello da Cultura Galega organiza o seminario Os exilios ibéricos en clave comparada que aproveita esta efeméride para analizar o fenómeno do exilio en clave contemporánea. A cita, cun marcado carácter internacional, terá lugar os días 14 e 15 de novembro na sede da institución. O seminario é de balde (hai 100 prazas) e ten aberto o seu prazo de inscrición, que se pode facer a través do web.