Arquivo de noticias do CCG

Este xoves pola tarde terá lugar ás 18:00 horas, en directo, o debate público da xornada “A comunicación da ciencia en tempos de pandemia”. Unha cita organizada pola Sección de Ciencia, Natureza, Tecnoloxía e Sociedade do Consello da Cultura Galega que analiza o exceso e os riscos da comunicación e da información xerada arredor sobre a propagación de virus, a elaboración de vacinas… e todas as novas relacionadas coa COVID-19. A cita está coordinada pola xornalista Iolanda Casal e conta coa participación de figuras como o filósofo e matemático Javier Echeverría, a xornalista Pampa García, a profesora e científica Gema Revuelta, máis a investigadora Sonia Villapol.

Mentiras que se viralizan nas redes sociais, informacións erróneas ou novas nesgadas que responden a distintos intereses, desconfianza do público polo carácter provisional e a incerteza intrínseca da ciencia... a información científica cobrou un grande protagonismo desde que a OMS elevou a situación de emerxencia sanitaria a pandemia internacional por mor da COVID-19. Sobre as luces e sombras da información científica reflexiona a próxima xornada do Consello da Cultura Galega(CCG). Chámase “A comunicación da ciencia en tempos de pandemia” está coordinada por Iolanda Casal e conta coa participación de figuras como o filósofo e matemático Javier Echeverría, a xornalista Pampa García, a profesora e científica Gema Revuelta, máis a investigadora Sonia Villapol. Mañá martes súbense os relatorios gravados dos participantes e o xoves 4 ás 18:00 horas terá lugar o debate en directo.

“O ecofeminismo é a intersección do pensamento ecolóxico e do feminista, dúas grandes teorías que son fundamentais para o século XXI se queremos un futuro”. Así de claro fala Alicia Puleo a filósofa que participa no ciclo “Pensarmos” do Consello da Cultura Galega (CCG). Esta cita, que coordina Carme Adán acaba de adaptar o seu formato por mor da crise sanitaria. A intervención de Puleo foi gravada e xa está disponible na rede para que o público a poida ver antes do debate, que tivo que ser adiada ata o xoves 12 de novembro (18:00 horas) en directo a través da rede.

Algoritmos, indexación, tráfico de datos, gratuidade, humanismo dixital son algunhas das ideas que mañá se abordarán nunha nova sesión do ciclo “Pensarmos“ do Consello da Cultura Galega (CCG). Baixo o título “É posible dar sentido ás máquinas? Cara a un humanismo tecnolóxico" o escritor e profesor José María Lassalle (Santander, 1966) manterá unha conversa co analista especializado en tecnoloxía política Suso Baleto. A presidenta da institución, Rosario Álvarez, e a coordinadora da Sección de Pensamento, Carme Adán, inaugurarán esta sesión que se poderá seguir a través de Internet.

"É posible dar sentido ás máquinas? Cara a un humanismo tecnolóxico" é o título co que José María Lassalle (Santander, 1966) participará o vindeiro xoves 27 (18:00 horas) no ciclo “Pensamos” do Consello da Cultura Galega. A súa intervención contará co retruque do analista especializado en tecnoloxía política Suso Baleato. A inscrición está aberta e pódese facer a través do web da institución.

Co inicio do ano retomamos o ciclo Pensarmos, espazo que convida a reflexionar a actualidade da man de recoñecidas personalidades. Neste inicio de ano, o filósofo Fernando Broncano falará mañá xoves (18:00 horas) das eivas da sociedade, da configuración do individuo dentro da sociedade actual que deixa paso numerosas fracturas como a soidade, o desarraigo, a desvinculación e a violencia. A presidenta da institución, Rosario Álvarez, será a encargada de presentar esta cita xunto coa coordinadora do ciclo, Carme Adán.

Teresa García Montañés é especialista en violencia de xénero pero tamén en delitos de perigo, delincuencia económica, criminalidade empresarial, terrorismo, tortura, aborto, liberdade de expresión e tráfico de seres humanos desde un punto de vista teórico e práctico. E mañá abordará no Consello da Cultura Galega estes asuntos baixo o título "A trata de seres humanos e escravitudes do século XXI". Será a última sesión do ciclo Pensarmos que coordina Carme Adán. A presidenta da institución, Rosario Álvarez, será a encargada de inaugurar esta cita que se poderá seguir en directo a través do web do CCG.

Estamos nunha semana relevante para o futuro do clima por mor do cumio sobre Acción Climática auspiciado pola ONU que pretende acelerar o cumprimento do Acordo de París nos prazos para eliminar as emisións. Unha temática sobre a que xira a conferencia que a profesora de filosofía moral e política da Universidade de Salamanca Carmen Velayos no Consello da Cultura Galega (CCG). Baixo o título “Retos e compromisos morais ante o cambio climático” insírese no ciclo “Pensarmos”, que nesta ocasión contará coa presenza do especialista en dereito ambiental J. José Pernas García. A conversa poderá seguirse en directo a través do web da institución.

A eutanasia cobra protagonismo no marco do ciclo “Pensarmos”, que organiza a Sección de Pensamento do Consello da Cultura Galega (CCG). Margarita Boladeras (Antequera, 1945), catedrática de Filosofía Moral e Política da Universitat de Barcelona e unha das voces máis coñecidas na defensa da legalización da eutanasia, propón mañá (18:00 horas) unha nova cita coa reflexión. Dialogará sobre este asunto con Ascensión Cambrón, presidenta da Asociación polo Dereito a unha Morte Digna de Galicia. Canda elas estará a coordinadora do ciclo, Carme Adán. A conversa poderase seguir en directo desde o web da institución.

O ciclo Pensarmos, que organiza a Sección de Pensamento do Consello da Cultura Galega (CCG), propón mañá (18:00 horas) unha nova cita coa reflexión. Desta volta estará centrado na tecnoloxía, na investigación e como orientar a mocidade cara a ese ámbito. Será da man do enxeñeiro António Cunha, que dialogará con Juan Casares Long tras a presentación da presidenta do CCG, Rosario Álvarez, e a coordinadora do ciclo, Carme Adán. A conversa poderase seguir en directo desde o web da institución.

É unha escritora e tamén pensadora que orientou o seu traballo a facer un estudo crítico da cultura contemporánea, do feminismo, da creación e das políticas da identidade nas redes. A súa obra literaria está relacionada co ensaio e comprometida coa igualdade e coa crítica social. Remedios Zafra (Zuheros, 1973) estará mañá no Consello da Cultura Galega para falar da precariedade dos traballos creativos, que se converte nunha nova forma de domesticación. A súa intervención titúlase “Despois do entusiasmo. Creatividade e traballo creativo na Cultura-Rede” e forma parte do ciclo Pensarmos que coordina Carme Adán. A cita poderase seguir en directo desde o web institucional e están cubertas todas as prazas.

O 12 de outubro de 2018 un grupo de hondureños iniciou en San Pedro Sula (Honduras) a “Camiñata do Migrante” coa intención de pedir asilo nos Estados Unidos. Polo camiño fóronse sumando migrantes de Salvador e de Guatemala e chegaron a ser preto de seis mil. Mes e medio despois alcanzaron Tijuana (Baixa California, México), onde foron perdendo forza. Non foi a única mobilización social de denuncia da situación actual en Honduras pero si unha das máis multitudinarias e efectistas. Sobre este feito e sobre as correntes fundamentais do pensamento teórico arredor de América Latina falarán Gareth Williams e Jorge Álvarez Yágüez mañá no Consello da Cultura Galega. A conversa Forma parte do ciclo “Pensarmos”, que coordina Carme Adán. A cita poderase seguir en directo desde o web do Consello da Cultura Galega.

Lluis Bassets (Barcelona, 1950) é un coñecido xornalista pero tamén un destacado pensador. Mañá estará no Consello da Cultura Galega (CCG) para falar de fascismos dixitais. Insírese no ciclo “Pensarmos”, unha proposta da Sección de Pensamento que pretende reflexionar sobre temas de actualidade nun formato dialogado. Nesta ocasión, o interlocutor do convidado será o editor Francisco Castro. A presidenta do CCG, Rosario Álvarez, e a coordinadora do ciclo, Carme Adán, inaugurarán esta cita que se poderá seguir en directo a través do sitio web da institución.

Lluis Bassets é un coñecido xornalista pero tamén un destacado pensador. É o próximo convidado do ciclo “Pensarmos”, unha proposta da Sección de Pensamento do Consello da Cultura Galega (CCG), que coordina Carme Adán. A inscrición a esta conferencia, que terá lugar o vindeiro 28 de febreiro, pódese facer a través do sitio web da institución.

“Entre cavernas: tecnopersonas e tecnomundos” é o título do relatorio que ofrecerá mañá no Consello da Cultura Galega (CCG) o filósofo e matemático Javier Echeverría (Pamplona, 1948). Con el ábrese o ciclo Pensarmos, coordinado por Carme Adán e que consiste en charlas, debates e intercambio de ideas que pretende abordar problemas actuais. A cita, organizada pola Sección de Pensamento do CCG, poderá seguirse en directo a través do web da institución.

A Sección de Pensamento do Consello da Cultura Galega (CCG) acaba de botar a andar o ciclo ”Pensarmos”, unha proposta de charlas, debates e intercambio de ideas que pretende abordar os problemas da actualidade. Posverdade, fascismos dixitais, tecnopersoas, precarización da vida, perda de liberdades… son algunhas das temáticas que se tratarán no marco deste foro, que comeza o día 24 de xaneiro coa participación do filósofo Javier Echevarría. A cita está coordinada por Carme Adán e celebrarase o cuarto xoves de cada mes. A primeira das citas xa ten aberto o prazo de inscrición no web do CCG.