Arquivo de noticias do CCG

“Que significa para vós celebrar o Orgullo?” Con esta pregunta comeza o coloquio “Diversidade afectivo sexual en tempos de pandemia”, organizado pola Sección de Pensamento do Consello da Cultura Galega (CCG) e conducido pola súa coordinadora, Carme Adán. Canda ela están Eva Mejuto, divulgadora, activista e organizadora do festival Pinto ou Maragota no concello de Pontevedra, e Enrique Latorre, investigador na Facultade de Ciencias da Educación da USC. O coloquio pon o ramo ás actividades coas que o CCG conmemora o Día do Orgullo LGTBIQ+, que se celebra cada 28 de xuño.

Marcela Gracia Ibeas e Elisa Sánchez Loriga casaron o 8 de xuño de 1901. Adiantáronse máis dun século á legalización do matrimonio homosexual en España. A súa historia foi investigada e dada a coñecer por, entre outros, Narciso de Gabriel e desde entón inspirou películas, exposicións, obras de teatro e un regueiro de publicacións. E desde hoxe tamén un cómic. O Consello da Cultura Galega(CCG) presenta “Elisa e Marcela”, unha banda deseñada guionizada e debuxada por Xulia Vicente. Ademais da publicación, que xa se pode descargar desde o web institucional, hai un making of a cargo da propia autora no que dá as claves deste traballo. Esta iniciativa súmase ás propostas coas que a institución conmemora, a través da súa Sección de Pensamento, o Día do Orgullo LGTBI+, que se celebra cada 28 de xuño.

“O aturuxo” é a primeira publicación periódica de gais e lesbianas de Galicia. Foi elaborada pola Coordinadora de Colectivos Gais de Galicia (CCGG) e desde hoxe está dispoñible en “A Saia”, a hemeroteca feminista galega que mantén o Centro de Documentación e Igualdade e Feminismos (CEDIF) do Consello da Cultura Galega (CCG). É unha das actividades que a institución ten previstas para celebrar o 28 de xuño, Día do Orgullo, e que se estenderán ao longo desta semana con múltiples formatos.

Quen somos nós neste século? Como chegamos a imaxinar a nosa sexualidade a través de conceptos como “macho”, “femia”, “home”, “muller”, “heterosexual”, “homosexual”, “transexual”, “DSD”? Cal é a relación entre a política e a sexualidade? Son os nosos corpos espazos de inscrición de xéneros mutantes? Cales son as propostas de futuro? Estas son algunhas das incógnitas que a Sección de Pensamento do Consello da Cultura Galega (CCG) propón mañá no marco da súa xornada “Pensar con orgullo”. Unha nova cita coa reflexión, desta volta centrada en cuestionar conceptos e descubrir novos aspectos. Será inaugurada pola secretaria da institución, Dolores Vilavedra, e polas coordinadoras, Carme Adán e Celia Pereira. A xornada poderá seguirse en directo desde o web da institución.