Arquivo de noticias do CCG

O Obradoiro de Crítica de Arquitectura Contemporánea que celebra desde este mércores e ata o venres a Sección de Arquitectura do Consello da Cultura Galega continúa esta tarde en Santiago coa intervención de Llàtzer Moix, director da Sección de Cultura do xornal "La Vanguardia". O xornalista catalán falará a partir das 16:30 sobre a divulgación da arquitectura nos medios de comunicación, tendo en conta a súa experiencia profesional nun dos xornais de referenza en España.

Maurici Pla, profesor de Teoría e Historia de la Arquitectura da Universidade Politécnica de Cataluña, é o encargado de inaugurar esta tarde, ás 16:30, o Obradoiro de Crítica de Arquitectura Contemporánea que ata este venres celebra o Consello da Cultura Galega (CCG). Pla ofrecerá unha visión global da arquitectura contemporánea, perfilando as súas características máis salientables, as obras máis significativas e os creadores máis recoñecidos.

A Sección de Arquitectura do Consello da Cultura Galega (CCG) celebrará este mércores, xoves e venres, días 6, 7 e 8 de xullo, un obradoiro sobre crítica de arquitectura contemporánea. Este taller, coordinado por Maurici Pla, abordará a posibilidade de crear unha crítica da arquitectura contemporánea que reconsidere os métodos e os instrumentos empregados na súa realización, que esclareza as relacións entre a arquitectura e a sociedade na que xorde, e que inscriba os acontecementos contemporáneos no marco dun progreso máis xeral da historia da arquitectura.