Arquivo de noticias do CCG

O poeta Ramón Cabanillas (1987-1959) é o protagonista da terceira edición de “No bico un cantar”, un programa que xunta poesía, música e mocidade. O concerto foi presentado esta mañá na sala Eisenman da Cidade da Cultura de Galicia por Ramón Villares, presidente do Consello da Cultura Galega (CCG), Jesús Vázquez, conselleiro de Cultura, Educación e Ordenación Universitaria, Luis Aragunde, alcalde de Cambados, Rosario Álvarez, vicepresidenta do CCG e Maximino Zumalave, director artístico do concerto. A cita xuntará na praza de Fefiñáns en Cambados, o vindeiro 5 de xuño, un gran coro de cincocentos nenos e nenas chegados dos conservatorios de música profesional de Galicia cantando poemas do poeta Cabanillas. A cita suporá a estrea da versión musicada do poema “Fala unha laverca”, que o CCG lle encargou á compositora Margarita Soto Viso.

Coñecer os sucesos da Galicia medieval, seguir as historias dunha persoa concreta ao longo da súa vida ou descubrir como se chamaban algúns lugares hai uns séculos son algunhas das utilidades prácticas de Gallaeciae Monumenta Historica. O proxecto, presentado esta mañá por Ramón Villares, presidente do Consello da Cultura Galega, Rosario Álvarez, vicepresidenta da institución, e Manuel Gago, coordinador técnico do proxecto, pon na rede o corpus de documentación medieval de Galicia xunto cos textos de ámbito académico relacionados. O valor engadido deste traballo desenvolvido polo Consello da Cultura Galega radica no metaetiquetado da información, que permite a busca cruzada, coa que se pode coñecer a Galicia medieval a través dos seus protagonistas, as temáticas e os lugares aos que aluden.

O Consello da Cultura Galega acolle este serán (19:30 horas) unha sesión plenaria extraordinaria cun único punto na orde do día: balance de actividades de 2014 e avance da programación de 2015. A xuntanza contará coa asistencia do presidente de honra da institución, o presidente da Xunta, Alberto Núñez Feijóo.

“É o momento de dar un paso máis na colaboración que nos permita crear unha acción exterior concertada, coherente e definida no que ten que ver coa difusión da lingua e da cultura galega”. O presidente do Consello da Cultura Galega, Ramón Villares, poñía así o fin ao seminario “Estudos Galegos/estudos ibéricos” que durante tres días xuntou en Santiago a responsables dos institutos de difusión internacional do vasco, catalán, español e portugués, xunto con lectores, profesores de galego de diferentes universidades do mundo.

O estudo das linguas e das culturas vasca e catalá centraron a segunda sesión do seminario internacional Estudos galegos/Estudos ibéricos. Alén das fronteiras, que se desenvolve ata mañá na sede do Consello da Cultura Galega. Unha cita coordinada por Henrique Monteagudo encamiñada a coñecer e mellorar as estratexias de difusión e promoción das distintas linguas ibéricas. Os responsables dos institutos Etxepare e Llull explicaron a situación actual da internacionalización do vasco e catalán, respectivamente, a través dos diferentes programas que desenvolven, así como as súas propostas de futuro.

“Un dos grandes retos do Instituto Cervantes pasa por mellorar as súas relacións coas linguas de España”. Con estas palabras Víctor García de la Concha, responsable do Instituto Cervantes abriu a quenda de relatorios do seminario internacional Estudos galegos/estudos ibéricos. Alén das fronteiras que se desenvolve ata o venres no Consello da Cultura Galega. A inauguración desta cita correu cargo do Presidente da institución, Ramón Villares, quen destacou a importancia do debate acádemico e institucional de poñer sobre a mesa a difusión da lingua e da cultura galega nun momento actual. Canda el, o coordinador do seminario, Henrique Monteagudo, incidiu na inseparabilidade dos estudos galego no marco dos hispánicos pero tamén luso-brasileiros.

A universidades de Kiev (Alemaña), Zadar (Croacia), Cork (Irlanda), Nova York (Estados Unidos), Bos Aires (Arxentina)… son algunhas das trinta e sete de todo o mundo nas que se estuda a lingua e a cultura de Galicia. Este tipo de prácticas comezaron hai unhas tres décadas e agora cómpre revisar cales son os atractivos e o interese que estes estudos teñen no contexto actual. Este é un dos cometidos do seminario internacional “Estudos Galegos/Estudos Ibéricos. Alén das fronteiras”, que se desenvolve ata o venres 19 na sede do Consello da Cultura Galega. A cita tamén serve para por sobre a mesa as modalidades de promoción, difusión e articulación das linguas ibéricas (galego, portugués, catalán e vasco) nos ámbitos académicos internacionais. O presidente da institución, Ramón Villares, e o coordinador do seminario, Henrique Monteagudo, son os encargados da inauguración que terá lugar mañá mércores ás 16:30 horas.

Neste 2014 cúmprense cen anos do inicio da Primeira Guerra Mundial, tamén coñecida como a “Gran Guerra”. Unha cita que lle serve de pretexto á Comisión de Igualdade do Consello da Cultura Galega (CCG) para lembrar a figura de Sofía Casanova. Faino coa proxección e coloquio do documental que recupera a historia desta reporteira de guerra que terá lugar en dúas cidades: o luns 14 no Centro Galego de Artes da Imaxe (A Coruña) e o martes 15 na sede do CCG (Santiago).

Ramón Villares, presidente do Consello da Cultura Galega, Alberto Núñez Feijoo, presidente da Xunta de Galicia e Pilar Rojo, presidenta do Parlamento de Galicia presentaron esta mañá no Parlamento a publicación Memorias históricas sobre a Australia de Rosendo Salvado. “Non son o balance vital ou o testamento, senón máis ben o proxecto de toda unha vida” explicou Ramón Villares sobre o libro que ve agora a luz tras das súas edicións en italiano, francés, español e inglés. A publicación, que xa se pode descargar desde o web do CCG, documenta a traxectoria de Rosendo Salvado en Australia, onde desenvolveu un asentamento misioneiro desde un revolucionario punto de vista en época colonial, baseado na defensa dos dereitos dos aborixes.

O vindeiro venres 12 de decembro, Ramón Villares, presidente do Consello da Cultura Galega, Alberto Núñez Feijoo, presidente da Xunta de Galicia e Pilar Rojo, presidenta do Parlamento de Galicia, presentarán (11:00 horas) no Parlamento a publicación Memorias históricas sobre a Australia. Trátase da edición en galego da publicación homónima escrita por Rosendo Salvado, na que recolle as súas vivencias en Australia, onde desenvolveu un asentamento misioneiro desde un revolucionario punto de vista en época colonial, baseado na educación e na defensa dos dereitos das comunidades aborixes.

Coñecer cales son os atractivos e interese que pode ter o galego no panorama académico de fóra de Galicia. Este é o principal obxectivo do seminario internacional “Estudos Galegos/Estudos Ibéricos. Alén das fronteiras”, que se desenvolverá na sede do Consello da Cultura Galega entre os días 17 e 19 de decembro. A cita ten outro valor engadido, que é o de xuntar por primeira vez na mesma mesa os responsables dos institutos encargados da difusión da cultura e o idioma das diferentes linguas ibéricas, como son o Instituto Cervantes, Camões, Llull e Etxepare. O seminario conta con trinta prazas, nas que terán preferencia as persoas relacionadas coa proxección internacional da lingua e da cultura galegas.

“Outros verbos, novas lecturas: Valle-Inclán traducido (1906-1936)” é o título da exposición que pretende dar conta dimensión internacional deste escritor. E faino a través das traducións das súas obras a outras linguas. A mostra inaugúrase este mércores 10 de decembro na Residencia de Estudiantes de Madrid coa presenza do presidente do Consello da Cultura Galega, Ramón Villares, e a comisaria da mostra, Rosario Mascato. Trala inauguración, catedrático de Teoría da literatura e literatura comparada da Universidade de Santiago de Compostela e Secretario da Real Academia Española, ofrecerá unha conferencia que leva por título "Valle-Inclán, escritor modernist(a)".

O seu carácter poliédrico, a actualidade da súa obra pero sobre todo do seu pensamento, así como a escasa influencia que tivo na cultura galega, a excepción de Carlos Casares, foron as principais ideas que se abordaron no congreso sobre Albert Camus realizado ata hoxe no Consello da Cultura Galega (CCG). “Foi un seminario en que se analizaron os seus pensamentos desde moi diferentes puntos de vista e permitiunos ver a vixencia absoluta dos seus valores, como a relación ética en política, a violencia, o papel do intelectual ou o problema do individuo ante o suxeito colectivo” apuntou Jorge Álvarez, coordinador desta cita que xuntou expertos chegados de diferentes países para falar desta figura clave do existencialismo.

“Foi un autor que se debateu entre o compromiso e a liberdade, entre o individuo e o suxeito colectivo”. Ramón Villares, presidente do Consello da Cultura Galega abría con estas palabras as xornadas sobre Albert Camus, que rematan mañá na sede da institución. O coordinador da cita, o profesor Jorge Álvarez, destacou a actualidade do ideario e da obra desta figura clave do existencialismo, pero tamén a relevancia da pegada que deixou na cultura galega. Unha idea que se completará na sesión do xoves, nas que tamén se abordará a polémica relación que Camus mantivo con Sartre.

“Albert Camus é un dos homes que mellor pensou o século XX e cómpre facer balance do impacto vital que a súa obra deixou, e que permite coñecer tamén un século en que houbo dúas guerras mundiais, unha posguerra…”, Jorge Álvarez Yágüe traza así o perfil desta figura do existencialismo que dá título a unhas xornadas da Sección de Pensamento e Sociedade do Consello da Cultura Galega (CCG) que comezan mañá. A cita, da que Álvarez é coordinador, analizará a vixencia do ideario e a obra desta figura clave do existencialismo, pero tamén a pegada que deixou na cultura galega. Non quedan prazas pero pódese seguir en directo a través do web da institución.

A Saia, Andaina e Festa da Palabra Silenciada son algunhas das revistas publicadas nos oitenta que permiten coñecer a traxectoria dos feminismos e das feministas en Galicia. Estas tres publicacións son as que inauguran o proxecto “Hemeroteca Feminista Galega A Saia”. Unha iniciativa que xorde da colaboración do Consello da Cultura Galega, a través da Comisión de Igualdade, e o Centre Dona i Literatura da Universitat de Barcelona. Arredor desta presentación terá lugar a xornada “Xénero e Documentación III”, que se desenvolve nese mesmo serán no Consello da Cultura Galega. Ademais, unha pequena exposición na sede da institución permitirá ver os exemplares destas publicacións.

O Consello da Cultura Galega acolleu esta mañá unha presentación do programa Mateus DOC, iniciativa do Instituto Internacional Casa Mateus dirixida a investigadores de todas as áreas científicas, coa intención de adaptar esta proposta para Galicia. Na cita estiveron presentes representantes do Instituto Internacional Casa de Mateus, a Universidade do Minho, as universidades galegas, a Fundación Barrié e o Instituto de Ciencias do Patrimonio, así como investigadores galegos que participaron en edicións anteriores do programa Mateus DOC.

Unha xornada sobre os desafíos da cultura galega no marco da Axenda 2020, unha exposición que sintetiza a nosa cultura en cen obxectos e outra sobre a imaxe de Galicia a través das revistas da emigración son algunhas das actividades centrais do Consello da Cultura Galega (CCG) para o vindeiro ano 2015. Así o acordou o plenario nunha xuntanza ordinaria celebrada este serán (19:00 horas) na sede da institución. Canda a un total de 25 actividades entre xornadas, simposios e seminarios, aprobouse o proxecto de orzamentos e debateuse o establecemento de dous protocolos (“foros de conciliación” e “conferencias de consenso”) para mediar en conflitos de índole cultural e patrimonial.

Un 23,6 por cento dos galegos participan ou colaboran nalgún tipo de asociación ou organización, unha porcentaxe que está por riba da media estatal e europea. As cifras do documento de traballo “A cultura e as entidades sen ánimo de lucro”, que elabora o Observatorio da Cultura Galega, servizo do Consello da Cultura Galega, desvelan un sector vizoso e moi activo.

Os preto de 1500 quilómetros de costa que hai en Galicia evidencian a importancia que o mar ten no noso país. Conscientes desa relación, o Consello da Cultura Galega e a Universidade de Vigo, a través do Campus do Mar, organizan unha xornada que pretende darlles ferramentas teóricas e prácticas aos futuros docentes para que ensinen sobre a necesidade dunha relación sustentable cos océanos. A cita chámase “Bo uso e mal uso do mar” e terá lugar mañá martes na Facultade de Ciencias da Educación e do Deporte.