Arquivo de noticias do CCG

O Consello da Cultura Galega (CCG) presenta este mércores (18:30 horas) O equilibrio dos extremos, a publicación que pon en diálogo a obra poética de Xela Arias (Sarria,1962-Vigo, 2003), homenaxeada este ano co Día das Letras Galegas, coa das novas xeracións de poetas. Nel doce escritores e escritoras escollen un poema da autora de Intempériome que fixeron dialogar con outro que elaboraron expresamente para a ocasión. A publicación preséntase mañá cun recital poético no que participan boa parte dos autores participantes. O acto é presencial, precisa inscrición e pódese seguir en directo desde o web e as redes da institución.

O Consello da Cultura Galega (CCG) organizou e acolleu esta mañá a primeira das sesións das xornadas tituladas “O museo Carlos Maside: un patrimonio cidadán” . “Esta é unha sesión de traballo que esperamos teña os seus froitos para o sistema cultural galego” explicou Rosario Álvarez, presidenta do CCG, na inauguración. E na mesa houbo propostas concretas, como a da avogada especialista en dereito da cultura, Patricia Gabeiras, que apuntou á figura da fundación para a súa futura xestión. Con todo, os participantes coincidiron en que o máis importante e urxente é a súa protección a través da declaración de Ben de Interese Cultural. Algo está “moi próximo” tal e como apuntou o secretario xeral de Cultural, Anxo Lorenzo, que detallou a “folla da ruta” da Xunta para este centro.

O Museo Carlos Maside foi o centro que supuxo a recuperación da arte galega da vangarda. Iniciativa de Isaac Díaz Pardo, Luis Seoane e un grupo de intelectuais do exilio republicano, foi un destacado proxecto artístico tanto polo espazo deseñado por Fernández Albalat como polo conxunto de obras que o conforman. O centro pechou ao público en 2016 e está nun serio risco de deterioro. O Consello da Cultura Galega (CCG), o concello de Sada e a Universidade de Santiago organizan unhas xornadas tituladas “O museo Carlos Maside: un patrimonio cidadán” encamiñadas a revisar a súa historia e reivindicar a súa protección. A primeira destas sesións está organizada polo CCG, desenvólvese mañá na súa sede é pretende situar o centro no seu contexto. Esta sesión rentransmitirase en directo desde o web do CCG e as súas redes sociais.

Consulta a base de datos

O 26 de setembro é o Día Europeo das Linguas. Unha efeméride instaurada polo Consello de Europa para recoñecer a diversidade lingüística como unha ferramenta clave para lograr unha maior comprensión intercultural e un elemento clave no rico herdo cultural do noso continente. O Consello da Cultura Galega (CCG) súmase á celebración en colaboración con outras entidades. A presidenta da institución, Rosario Álvarez, asiste este venres en Nápoles (Italia) aos actos convocados polo Instituto Cervantes. Ademais, o domingo, que coincide co propio día da celebración, participará no acto institucional que terá lugar en Santiago.

O 24 de setembro de 1921 tivo lugar o congreso constituínte da Federación de Sociedades Gallegas Agrarias y Culturales, unha entidade promovida por Antón Alonso Ríos, Manuel San Luis, Enrique Rodal e Joaquín Folgar Lema para loitar contra o caciquismo e defender os intereses da colectividade galega emigrada. No centenario desta entidade, que aínda permanece activa, o Consello da Cultura Galega (CCG) presenta a renovación do sitio web do Arquivo da Emigración Galega (AEG). Este cambio preséntase tamén con novos contidos e unha nova entrega do especial “Historia de Ida e volta” centrada, precisamente, na difusión de material relativo á traxectoria desta histórica entidade.

Poñer enriba da mesa as investigacións científicas que analizan cando e como se configurou a paisaxe da Ribeira Sacra. Este é un dos obxectivos da xornada que o Consello da Cultura Galega (CCG) celebra a partir de mañá na Pobra do Brollón (Lugo). A cita está coordinada pola arqueóloga e coordinadora da sección de Patrimonio e Bens Culturais do CCG, Rebeca Blanco-Rotea, xunto co tamén arqueólogo e investigador, Xurxo Ayán. A xornada non se retransmite en directo pero será gravada e subirase ao sitio web da institución para consultas futuras.

Foi un publicista, editor comprometido, investigador e divulgador da identidade galega. Tamén cultivou a faceta de escritor e, segundo Carballo Calero, asinou cos pseudónimos de Carlos Florencio, Esteban de Paleo, Xan do Martinete e Eurico Nagere. A biografía de Uxío Carré Aldao (A Coruña, 1859 - 1932), asinada por Patricia Arias, acaba de incorporarse ao Álbum de Galicia.

O xurista, avogado e político Jaume Alonso-Cuevillas (Barcelona, 1961) participa mañá (18:00 horas) no ciclo Pensarmos, iniciativa da Sección de Pensamento do Consello da Cultura Galega (CCG). Alonso-Cuevillas é, entre moitos outros postos, exdeputado do Parlament de Catalunya, e ofrecerá un relatorio titulado “Proceso xudicial, fake news e xuízos paralelos: unha visión dende Catalunya”. O avogado Xoán Antón Perez Lema será o encargado de dialogar con Alonso-Cuevillas no marco deste formato de reflexión coordinado por Carme Adán. A xornada é presencial, precisa inscrición previa e pode seguirse en directo desde o web do CCG e as súas redes sociais.

O Consello da Cultura Galega (CCG) acolleu esta tarde unha xornada que visibilizou diferentes proxectos artísticos que amosan como a arte pode ser un medio e ferramenta de transformación social. Creadores e xestores amosaron proxectos que se desenvolven desde a Ribeira Sacra, África, Gondomar, León e que permiten ver que a arte tamén pode ser un motor de transformación económica e social concibida desde a sustentabilidade. A presidenta do CCG, Rosario Álvarez; o coordinador da Sección de Creación e Artes Visuais Contemporáneas, Manuel Quintana Martelo, e a coordinadora da xornada Paula Cabaleiro, inauguraron esta cita titulada “Da emerxencia(creativa)”, que foi gravada e se porá a disposición da cidadanía no web da institución.

O Congreso dos Deputados acolle este venres, 18 de setembro, un acto conmemorativo do trixésimo aniversario da creación do Instituto Cervantes. A presidenta do Consello da Cultura Galega, Rosario Álvarez, asiste a este acto no que os voceiros e representantes de varios grupos parlamentarios lerán poemas nas diferentes linguas do Estado, en recoñecemento ao labor do Cervantes na promoción internacional da diversidade lingüística.

No serán do xoves faleceu o catedrático de pediatría Rafael Tojo Sierra. O Consello da Cultura Galega (CCG) expresa o seu fondo pesar pola perda do que foi membro do seu Plenario entre 2014 e 2018 como representante da Real Academia Galega de Ciencias. Tojo Sierra desenvolveu unha dilatada carreira profesional no ámbito da saúde onde destacou polo seu traballo para combater a obesidade infantil e difundir os beneficios da dieta atlántica. De feito, entre as actividades que desenvolveu no CCG destaca a xornada sobre dieta atlántica onde fixo especial fincapé na necesidade dunha cultura alimentaria saudable

A intimidade da imaxe suma un preto dun centenar de fotografías que percorren a Galicia da transición na ollada da fotógrafa catalá Anna Turbau (Barcelona, 1949). Imaxes que mostran os conflitos sociais, políticos e humanos cos que a fotógrafa se atopou na súa chegada a Galicia a finais dos anos setenta. Rebeca Blanco-Rotea, membro da Comisión Executiva do Consello da Cultura Galega; Abel Losada, concelleiro de Cultura e a propia fotógrafa, Anna Turbau, inauguraron na Casa das Artes esta mostra que se poderá visitar ata o 7 de novembro.

“Cal e á paisaxe sonora de Ribadavia? Axúdanos a buscala”. Esta é a proposta que o Arquivo Sonoro de Galicia (ASG), departamento do Consello da Cultura Galega (CCG), realiza os vindeiros días 17 e 24 de setembro no Museo Etnolóxico de Ribadavia. O director do ASG, Xosé Ramón Pousa, é o encargado de impartir dúas actividades encamiñadas visibilizar o proxecto e a convidar á veciñanza a que rexistre os sons característicos desta vila para incorporalos ao Mapa Sonoro de Galicia.

Este venres, 17 de setembro, terá lugar en Casaio (Carballeda de Valdeorras, Ourense) unha nova sesión dos Encontros Monográficos co Patrimonio Cultural “In situ” que debaterá sobre o papel, posibilidades e límites do patrimonio industrial dentro das políticas en materia de patrimonio no noso país. No marco da xornada, titulada “A guerra esquecida: volframio, modernidade e patrimonio industrial”, expoñerase o proxecto de recuperación e de declaración como BIC da mina de volframio de Casaio e doutros exemplos de posta en valor como a mina de Fontao. Rebeca Blanco-Rotea, Laura Martínez Panizo e Carlos Tejerizo son os coordinadores desta cita.

¿Que papel pode xogar a arte na procura dun cambio social cara un desenvolvemento sustentable e igualitario do mundo? Sobre esta pregunta falarán artistas e críticos na xornada “Da emerxencia (creativa)” que organiza a Sección de Creación e Artes Visuais Contemporáneas do Consello da Cultura Galega (CCG). Paula Cabaleiro coordina esta cita na que participan Fernando Casás, Ruth Montiel Arias, Pamen Pereira, Carlos Quintáns, Encarna Lago e Luís Martínez Santos. A xornada, que acaba de abrir a inscrición, é presencial pero pode seguirse en directo a través do web do CCG e as súas redes sociais.

Convocatoria Bolsas Casa Velázquez 2021

Este 15 de setembro cumpríanse 170 anos do nacemento de Manuel Curros Enríquez. Con ocasión desta efeméride, a presidenta do Consello da Cultura Galega (CCG), Rosario Álvarez, trasladouse á fundación do escritor para participar nunha xuntanza cos membros desta entidade. No marco da reunión tivo lugar un encontro coas rapazas que participaron no vídeo en que se recita o poema que Curros escribiu sobre a chegada do Ferrocarril a Galicia hai 140 anos.

Hoxe, 13 de setembro é cabodano de Filgueira Valverde. Coa súa voz, xunto coa de Rafael Dieste e a de Maruxa Boga, o Consello da Cultura Galega (CCG) bota a andar “Voces centenarias”. Trátase dun proxecto que peneira no fondo inédito que custodia o Arquivo Sonoro de Galicia (ASG) para ofrecer mensualmente unha escolma das súas gravacións sonoras. Desde o web da institución poderase escoitar a voz de persoeiros da cultura, da política, da emigración... que axudaron a perfilar o noso pasado pero tamén o noso destino presente e futuro.