Arquivo de noticias do CCG

“Cancro: ciencia e conciencia nun desafío global” é o título da nova entrega de “Proxector”, iniciativa de divulgación de recursos audiovisuais que sirvan de apoio á docencia en lingua galega, que organiza o Centro de Documentación Sociolingüistica de Galicia do Consello da Cultura Galega (CCG) en colaboración coa Universidade de Santiago (USC). Nesta ocasión achegamos unha ducia de vídeos que se suma á conmemoración do Día Mundial contra o Cancro. A complexidade biolóxica da enfermidade, algunhas das novas terapias que se están a investigar na actualidade, os factores de risco, prevención... son algúns dos temas que se abordan coa intención de desterrar estigmas e transformar o medo en coñecemento.

Os Servizos de Normalización Lingüística (SNL) e os Equipos de Dinamización da Lingua Galega (EDLG) son dous colectivos que contan con máis de tres décadas de traxectoria e que resultan esenciais para a revitalización e o uso social do galego. Teñen un gran potencial humano pero necesitan dun cambio estrutural e de apoio económico para poder desenvolvelo. Reforzalos, incrementar os orzamentos e aproveitar as experiencias e os recursos que xestionan son algunhas das propostas que figuran nas conclusións dos XXVII Encontros para a Normalización Lingüística que se desenvolveron en outubro pasado. O documento de conclusións propón a derrogación do Decreto para o plurilingüismo, que a inspección educativa vele polo cumprimento dos Proxectos Lingüísticos de Centro, a aprobación urxente dunha normativa de ámbito supramunicipal que regule os SNL, ademais dun cambio de actitude das administracións públicas e un maior compromiso a todos os niveis. O documento, así como os vídeos das sesións, están dispoñibles para consulta.

Rabia, malaria, gripe aviaria, enfermidade de Lyme, infección por E. Coli. son algunhas das doenzas máis coñecidas que os animais lles transmiten de maneira natural ás persoas. A transmisión desas enfermidades, coñecida como zoonose, centra a nova entrega de “Proxector”, iniciativa de divulgación en lingua galega promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago de Compostela (USC). Baixo o titulo “Zoonoses: ameazas diversas para unha saúde única “ xúntanse doce vídeos para explicar este tipo de enfermidades ou infeccións, ademais de consellos de utilidade para evitar a súa expansión.

A nova entrega de “Proxector”, iniciativa de divulgación en lingua galega promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago de Compostela (USC), leva por título “Física cuántica: o enigmático mundo do pequeno” e conmemora dúas efemérides: o Ano Internacional da Ciencia e a Tecnoloxía Cuántica e o XVI Día da Ciencia en Galego. Unha ducia de vídeos ofrecen unha viaxe divulgativa polo universo das partículas subatómicas e as tecnoloxías de vangarda que delas se derivan.

O Consello da Cultura Galega (CCG) celebra unha nova edición dos Encontros para a Normalización Lingüística, que este ano chegan á súa vixésimo sétima edición baixo o título “Lingua en acción: pasado, presente e futuro dos equipos e servizos de normalización lingüística”. A xornada pon o foco en dous axentes fundamentais para o avance da lingua galega: os Servizos de Normalización Lingüística (SNL) e os Equipos de Dinamización da Lingua Galega (EDLG), dous colectivos que contan con máis de tres décadas de traxectoria e que resultan esenciais para a revitalización e o uso social do galego. A xornada é presencial e pode seguirse en directo a través do sitio web e da canle de Youtube.

Alternar a lingua vehicular dalgunhas materias, fomentar a acollida lingüística para o alumnado estranxeiro, incorporar cláusulas lingüísticas na contratación pública… son algunhas das 96 medidas que se propoñen no informe Un país coa súa lingua. Foro participativo, do Consello da Cultura Galega (CCG). Un ano de traballo no que participaron preto de 2000 persoas e no que se recibiron arredor de duascentas propostas. A presidenta do CCG, Rosario Álvarez, destacou na presentación “o espírito construtivo deste documento que acompaña a outras iniciativas e que ofrece ideas replicables e asumibles”. Canda ela a vicepresidenta e coordinadora do foro, Dolores Vilavedra, e o responsable do Observatorio da Cultura Galega, Håkan Casares, explicaron o documento que contén “medidas de aplicación inmediata, moitas delas sen custo económico, e estruturais que contribúen a reverter a situación do galego”. O informe xa se pode descargar desde o sitio web da institución.

O Centro de Documentación Sociolingüística de Galicia do Consello da Cultura Galega (CCG) e a Universidade de Santiago de Compostela (USC) veñen de publicar unha nova entrega do especial “Proxector”, iniciativa de divulgación que ambas as institucións impulsan para achegar á cidadanía galega recursos didácticos de calidade en lingua galega. Na véspera da celebración do Día da Ciencia en Galicia, o monográfico leva por título “A investigación química aplicada ao desenvolvemento industrial”, e pon o foco na contribución da química á innovación tecnolóxica e ao progreso económico sostible.

“Xustiza social e cultura de paz” é o título da nova entrega de Proxector, iniciativa de divulgación en lingua galega promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago de Compostela (USC). Nesta ocasión, selecciona unha ducia de vídeos para conmemorar o Día Internacional da Paz, que a Asemblea Xeral das Nacións Unidas (ONU) celebra cada 21 de setembro.

“Arqueoloxía: un bo plan para coñecer Galicia este verán” é o título da nova entrega de Proxector, iniciativa de divulgación en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC). Con esta entrega, que fai un percorrido polo noso patrimonio arqueolóxico, o catálogo xeral do proxecto supera os 2.000 recursos audiovisuais de divulgación en galego.

A nova entrega de Proxector, iniciativa de divulgación científica en lingua galega promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC), afonda neste mes de maio na axuda que nos ofrecen os profesionais da enfermaría. Baixo o título “Enfermaría: a ciencia de saber coidar” escólmanse unha ducia de vídeos que nos achegan a biografía de tres mulleres galegas que foron pioneiras neste eido (Isabel Zendal, Elena López Mourín e Ramona Vaamonde) máis unha selección de recursos didácticos e divulgativos que nos falan da enfermaría, tanto desde o punto de vista práctico como académico.

Cómo organizar una foliada na escola en sete pasos. Esta é a proposta didáctica que contén a Guía docente Axudádeme a cantar que elaborou o Consello da Cultura Galega (CCG). Coordinada por Renée DePalma, o documento pretende servir de punto de encontro entre os saberes populares e tradicionais cos académicos ao tempo que “visibiliza o papel central das mulleres no patrimonio musical e literario de Galicia, na súa faceta de cantantes e tocadoras de instrumentos de percusión de man”. O documento, orientado ao terceiro ciclo de educación primaria e extensible a outros niveis, xa está dispoñible para descarga. É un produto complementario da serie audovisual homónima elaborada polo CCG que percorre en seis capítulos a historia e presente deste tipo de literatura oral, sostido por mulleres, que non aprenderon en ningunha escola e que son as grandes esquecidas da cultura tradicional oral.

Ao fío do Día Internacional do Deporte para o Desenvolvemento e a Paz, que a ONU conmemora cada 6 de abril, a nova entrega de Proxector, iniciativa de divulgación científica en lingua galega promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC), afonda no poder transformador do deporte. Unha ducia de vídeos que nos falan da historia e das principais características dalgunhas prácticas deportivas así como dos beneficios do deporte para o benestar físico e mental.

Achégase a data do Día Mundial da Auga, que se celebra cada 22 de marzo, e a nova entrega de Proxector, iniciativa de divulgación científica en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC), achégase á súa importancia. Unha ducia de vídeos para afondan na auga, nas súas características, nas súas problemáticas e nalgúns dos seus múltiples aproveitamentos (natural, patrimonial, médico, turístico ou enerxético) baixo o título “A auga: unha molécula fundamental”.

Valentín Lamas Carvajal (Ourense, 1849-1906) foi, ademais de poeta e narrador, xornalista de oficio que “actuou sobre a cultura galega do seu tempo e moi consciente do seu papel de promotor de ideas de restauración cultural no seo do pobo”. Así o asegura Afonso Vázquez-Monxardín, autor da entrada que hoxe se incorpora ao Álbum de Galicia, colección de biografías do Consello da Cultura Galega. Nela define a Lamas Carvajal como “o cuarto pé do Rexurdimento”.

Antroido, entroiro, entruido, entrudio... son moitas as formas para designar a unha das manifestacións máis sobranceiras do noso patrimonio cultural inmaterial: o entroido tradicional. A nova entrega de Proxector, iniciativa de divulgación científica en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC), escolma este mes unha ducia de vídeos para achegarse ás diferentes formas de celebración baixo o título “Cando o pobo vai de festa: celebracións e patrimonio inmaterial”.

“Investigación xenómica: descifrando a medicina do futuro” é o título do novo especial de Proxector, iniciativa de divulgación científica en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC). Doce vídeos divulgativos para descubrir máis sobre o ADN e o xenoma ao fío da posta en marcha do Proxecto Xenoma Galicia, iniciativa pioneira en España que busca avanzar no coñecemento das enfermidades mediante a recollida de datos clínicos, datos xenéticos e mostras biolóxicas que serán a clave para o avance da medicina personalizada e para establecer estratexias de saúde en Galicia.

O aumento do nivel do mar, desxeo dos glaciares, quecemento dos océanos e fenómenos meteorolóxicos extremos son algunhas das consecuencias do cambio climático. Sobre os fenómenos meteorolóxicos adversos e as consecuencias do cambio climático tratan os doce vídeos que conforman a nova entrega de Proxector, iniciativa de divulgación científica en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC). “A adversidade nos mapas do tempo” é o título desta entrega que xa está dispoñible.

O uso da lingua galega nas prácticas funerarias en Galicia ten experimentado unha progresiva normalización grazas ao impulso de diversas iniciativas. ”Percíbese un avance nas necrolóxicas publicadas nos medios, cun uso entre o 5% e o 10%” e “a presenza do galego nos cemiterio chegou a acadar un 20% nalgúns concellos” apuntan as conclusións dos XXVI Encontros para a Normalización Lingüística, cita organizada polo Centro de Documentación Sociolingüística de Galicia (CDSG) do Consello da Cultura Galega (CCG), feitas públicas hoxe. Este documento ofrece tamén recomendacións para mellorar esta situación e xa se pode consultar desde o web da institución.

A nova entrega de Proxector, iniciativa de divulgación en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC), pon o foco este mes na astronomía. Baixo o título “Unha ollada ao Universo no Día da Ciencia en Galego”, xunta unha ducia de vídeos que seguen o ronsel da celebración do XV Día da Ciencia en Galego, impulsado pola Institución Galega da Ciencia (Igaciencia).

Un exemplar do Cancionerio de Ajuda, o máis antigo e verificado dos cancioneiros da lírica galego portuguesa, presidiu a mesa dos XXVI Encontros para a Normalización lingüística, cita organizada polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Secretaría Xeral da Lingua. Este libro, símbolo do período de esplendor da cultura galega, presentouse como fío de unión das diferentes confesións relixiosas que participaron nesta cita que puxo en evidencia o uso minoritario do galego nos ritos funerarios. Representantes das confesións relixiosas maioritarias que existen en Galicia (católica, evanxélica e islámica), xunto cos empresarios implicados en diferentes partes dun acto funerario...) destacaron que o galego esmorece nas exequias, aínda que vén na lingua un fío de unión e de concordia. A presidenta do CCG, Rosario Álvarez destacou na inauguración o carácter de nexo desta cita e avanzou que nos vindeiros días se presentará un documento coas conclusións. Pola súa parte, Valentín García, secretario xeral da Lingua, destacou a importancia do uso do galego nun momento tan familiar e íntimo como é un pasamento. Os relatorios foron gravados e as intervencións pódense consultar no sitio web e as redes sociais.