Arquivo de noticias do CCG

A Sección de Creación e Artes Visuais Contemporáneas do Consello da Cultura Galega (CCG) achégase, no marco do ciclo “Revisando a nosa arte”, a unha voz imprescindible para entender o desenvolvemento das prácticas artísticas contemporáneas en Galicia. “Alberto González-Alegre. Que non pare a música!” é o título da xornada que busca render homenaxe, activar a memoria e reflexionar sobre a relevancia do seu legado desde a súa cidade natal, Vigo, e da man de xestores, críticos e profesionais cos que mantivo unha estreita colaboración. Paula Cabaleiro e Ángel Cerviño coordinan esta cita presencial que terá lugar en Vigo (MARCO, 7 de abril, 17:00 horas). Non se emite en directo, será gravada e subirase posteriormente ao web e canle de Youtube da institución.

Amparo Segarra converteuse, nos últimos anos, nunha referencia da reconstrución do discurso feminino dende o período de entreguerras, o exilio e o retorno a España. Xunto co seu home, Eugenio Granell, configuraron unha das máis destacadas coleccións de arte de vangarda e un dos legados máis importantes do país. Sobre a dimensión da súa figura falarán Susana Cendán Caaveiro, Carmen Gaitán Salinas, Lorena Rodríguez e Rosario Sarmiento Escalona na xornada “Amparo Segarra. Corpos de papel”. A cita está coordinada por Eduardo Valiña e insírese no ciclo “Revisando a nosa arte”. A presidenta, Rosario Álvarez, a coordinadora da Sección de Creación e Artes Visuais Contemporáneas, Paula Cabaleiro; xunto co coordinador da sesión inauguran a cita que terá lugar este mércores 25 de marzo (17:00 horas). Pode seguirse en directo a través do web e da canle de YouTube do CCG.

“A crítica de arte en Galicia no contexto actual. Novas olladas” é o título da nova sesión do ciclo “Arte en Tempo real" que organiza a Sección de Creación de Artes Visuais do Consello da Cultura Galega (CCG). María Marco, Manuel Padín e Marisol Salanova, voces relevantes do panorama artístico contemporáneo, reflexionan sobre o papel da crítica de arte no ecosistema cultural galego. Paula Cabaleiro e Patricia Verdial coordinan esta sesión que se pode seguir en directo desde o web corporativo e a nosa canle de YouTube.

O ciclo Revisando a nosa arte que organiza a Sección de Creación e Artes Visuais Contemporáneas do Consello da Cultura Galega (CCG) detívose este mércores na figura do pintor coruñés Francisco Miguel, asasinado en 1936, e puxo sobre a mesa novas achegas sobre a súa evolución artística, a dispersión da súa obra e o seu papel dentro dunha xeración truncada pola guerra e a represión. O crítico de arte Carlos L. Bernárdez, o escritor Manuel Rivas, a comisaria de exposición Rosario Sarmiento xunto coa vicepresidenta da agrupación cultural Alexandre Bóveda, Carmela Galego, participaron nesta sesión coordinada por Ramón Rozas. “Estamos en tempo de facer xustiza reparativa e afectiva” apuntou Dolores Vilavedra, vicepresidenta do CCG na apertura da sesión. Pola súa parte, a coordinadora da sección, Paula Cabaleiro, destacou que é “un pequeno gran de area que podemos achegar desde o CCG no proceso de resignificación da súa figura”.

Francisco Miguel Fernández Moratinos (A Coruña, 1897-1936) foi pintor, libreiro, ilustrador de revistas literarias do momento e unha promesa da plástica galega. Foi asasinado en 1936 e a súa figura ficou fondamente esquecida. Sobre a dimensión da súa obra reflexionarán Manuel Rivas, Carlos L. Bernárdez, Rosario Sarmiento, Ramón Rozas e Carmela Galego na xornada “Francisco Miguel. Tempo de facer xustiza”. A cita, que se insire no ciclo Revisando a nosa arte, terá lugar este mércores 24 de setembro (17:00 horas) e pode seguirse en directo a través do web e a canle de YouTube do CCG.

Francisco Miguel Fernández Díaz (A Coruña, 1897 – Bértoa, 1936) foi un destacado pintor e ilustrador. O seu legado ficou no esquecemento tras o seu asasinato en 1936. Os seus restos veñen de ser recuperados do cemiterio de Bértoa en Carballo enterraranse na Coruña o vindeiro 29 de setembro. Ao fío deste acontecemento, o Consello da Cultura Galega (CCG) incorpora hoxe ao Álbum de Galicia, colección de biografías dixitais, a entrada desta prometedora figura da arte plástica galega a cargo do crítico e comisario de arte Carlos L. Bernárdez. Ademais, o vindeiro día 24 na sede do CCG terá lugar a xornada Francisco Miguel. Tempo de facer xustiza que revisará a súa dimensión artística.

“Pensamento visual e fotografía” é o nome da xornada coa que a Sección de Creación e Artes Visuais Contemporáneas do Consello da Cultura Galega (CCG) afonda desde o MARCO de Vigo (xoves 12 e venres 13 a partir das 11:00 horas), sobre o estado da fotografía contemporánea. Manuel Vilariño e Rosendo Cid coordinan esta sesión na que participarán durante dous días investigadores, escritores e figuras representativas da fotografía e das artes visuais como Mar Caldas, Paco Gómez, Rebecca Mutell ou Andrea Costas, entre outros. A presidenta do CCG, Rosario Álvarez, e o director do MARCO, Miguel Fernández Cid, abren esta xornada que se emite en directo desde o web e a canle de YouTube da institución.

Catálogo, revista especializada, libro de artista, fanzine... son variados os formatos das publicacións artísticas. Sobre as diferentes vertentes e ás súas problemáticas e posibilidades profunda a xornada deste mércores 26 de marzo (17:00 horas) coa que se pecha o ciclo Arte en tempo real. Lucia Yáñez coordina esta sesión organizada no marco da actividade da Sección de Creación e Artes Visuais Contemporáneas do Consello da Cultura Galega (CCG) coordinada por Paula Cabaleiro. A cita é presencial pero pode seguirse en directo desde o web e a canle de Youtube do CCG.

“Museos e coleccións” é o título da cuarta xornada do ciclo Arte en tempo real que organiza este mércores 26 de febreiro (16:30 horas) a Sección de Creación e Artes Visuais Contemporáneas que coordina Paula Cabaleiro. O director da Fundació Foto Colectania de Barcelona, Pepe Font de Mora; a directora do Museo de Pontevedra, Ángeles Tilve e o director do Museo de Artes do Gravado á Estampa Dixital, Xoán Pastor Rodríguez, son algúns dos especialistas que asisten a esta cita que analiza a estrutura do sistema artístico. Rosario Sarmiento e Sofía Santos coordinan esta xornada presencial e que pode seguirse en directo a través do web e das redes sociais da institución.

A terceira xornada do ciclo “Arte en tempo real” reflexiona este mércores 29 de xaneiro (17:00 horas) sobre a situación das galerías de arte no contexto actual. A sesión está coordinada por Lucía Pita e nela participan os responsables das galerías galegas Metro e Dupla, máis a asturiana Llamazares. A xornada, organizada pola Sección de Creación e Artes Visuais Contemporáneas que coordina Paula Cabaleiro, é presencial e pode seguirse en directo a través do web e das redes sociais da institución.

Cando se cumpren 150 anos do nacemento do pintor Francisco Lloréns (A Coruña, 1874 -Madrid, 1948), recoñecido paisaxista e discípulo de Joaquín Sorolla, o Consello da Cultura Galega (CCG) organiza a xornada Francisco Lloréns. Paisaxe e territorio. A xornada, que se inclúe no ciclo Revisando a nosa arte, terá lugar este xoves (a partir das 16:00 horas) no Salón Azul do Edificio Liceo Arquivo do Antigo Reino de Galicia de Betanzos que tratará a vida e obra deste artista. A xornada, coordinada por Rosario Sarmiento, está organizada pola Sección de Creación e Artes Visuais Contemporáneas do CCG coa colaboración do Concello de Betanzos. Non se emite en directo, pero será gravada e subirase posteriormente ao web institucional. A entrada é libre e gratuíta.

A Sección de Creación e Artes Visuais Contemporáneas do Consello da Cultura Galega (CCG) organiza este mércores 30 de outubro (17:00) unha nova xornada do ciclo A arte en tempo real centrada, desta vez, no traballo do comisariado de arte, as súas funcións, relación co resto de actores do proceso artístico e perspectivas de futuro. Esta sesión, que se pode seguir en directo desde o web e as redes do CCG, estará coordinada polo crítico e xornalista Ramón Rozas xunto coa xestora cultural Paula Cabaleiro e contará con voces expertas do oficio, entre as cales estará Santiago Olmo, director do CGAC.

A Sección de Creación de Artes Visuais Contemporáneas do Consello da Cultura Galega (CCG) comeza un novo ciclo de xornadas encamiñado a coñecer o estado actual da arte no noso país. Chámase Arte en tempo real e comeza este mércores 25 (17:00 horas) cunha revisión á situación dos artistas. Suso Fandiño, Tono Carbajo, Mónica Alonso e Diego Santomé participan nesta cita coordinada por Carmen Díaz Cacheda. A xornada é presencial e pode seguirse en directo a través do web e das redes sociais da institución.

En xullo de 1999 inaugurábase en Pontevedra a Illa das Esculturas, un espazo natural próximo ao centro da cidade no que realizaron as súas obras algúns dos creadores máis importantes do mundo: Richard Long, Dan Graham, Francisco Leiro…., entre moitos outros. A Illa das Esculturas vinte e cinco anos despois é o título do encontro no que a Sección de Creación e Artes Visuais Contemporáneas do Consello da Cultura Galega (CCG) xunta as persoas que botaron a andar este proxecto, como Antón Castro, con outros creadores e xestores para facer unha revisión do que foi este cuarto de século e das posibilidades de futuro. Ramón Rozas coordina esta cita, que se desenvolverá na tarde deste mércores (a partir das 17:00 horas) na Casa das Campás. A xornada non se retransmitirá en directo, pero será gravada e posteriormente subiranse os vídeos ao web e ás redes sociais do CCG.

A afluencia de mulleres na arte constitúe un fenómeno emerxente. Os datos dispoñibles a nivel estatal empezan a amosar un achegamento á paridade (a feira de arte contemporánea máis importante de España, ARCO, acadou este ano o 40 % de presenza feminina), pero con moitos espazos aínda por igualar. A situación galega foi radiografada en 2015 no informe Arte + mulleres. Creadoras galegas, elaborado pola Sección de Creación e Artes Visuais do Consello da Cultura Galega (CCG) e coordinado por Marisa Sobrino. Coa intención de actualizar ese estudo e de coñecer de primeira man a situación actual, a Sección organiza a xornada As creadoras galegas no século XXI, na que participan artistas e responsables de museos e coleccións. A cita, coordinada por Rosario Sarmiento e Sofía Santos, terá lugar o mércores 24 de abril.

Urbano Lugrís creou a través da súa obra un universo pictórico singular poucas veces visto na plástica galega. Ao pouco de conmemorarse o cincuenta aniversario do seu pasamento, a Sección de Creación e Artes Visuais Contemporáneas do Consello da Cultura Galega (CCG) dedica mañá, 24 de xaneiro (17:00 horas), unha xornada do ciclo Revisando a nosa arte a profundar na súa traxectoria artística e vital. A cita desenvolverase de xeito presencial na sede institucional do CCG, pero tamén poderá seguirse en directo a través do web e as redes sociais corporativas.

Paco Pestana atopou na escultura e na poesía as súas canles fundamentais de expresión. Creador multidisciplinar, a súa obra e traxectoria consolidárono como unha figura referencial para entender o desenvolvemento da escultura en Galicia nas últimas décadas do século XX. Cando se fan dous anos da súa morte, a Sección de Creación e Artes Visuais Contemporáneas do Consello da Cultura Galega (CCG) dedícalle mañá, 23 de outubro (16:00 horas), unha nova xornada do ciclo Revisando a nosa arte. A sesión, coordinada por Rosario Sarmiento e Lucila Yáñez, desenvolverase de xeito presencial no Vello Cárcere de Lugo. A cita non se poderá seguir en directo, pero será gravada e subida posteriormente á hemeroteca do CCG.

A Sección de Creación e Artes Visuais Contemporáneas do Consello da Cultura Galega (CCG) organiza este martes, 27 de xuño, ás 17:00 horas, unha nova sesión do ciclo Revisando a nosa arte. Baixo o título “Revisión histórica da banda deseñada galega: Xaquín Marín e Reimundo Patiño”, analizarase a figura destes dous ilustradores, considerados como os fundadores da banda deseñada galega. Coordinada por Manuel Quintana Martelo, a xornada contará cos relatorios de Miguelanxo Prado e Antón Patiño. A cita desenvolverase de xeito presencial na sede institucional do CCG, pero poderá seguirse en directo a través do web e as redes sociais corporativas.

Alberto Datas foi unha das figuras clave no movemento de renovación que experimentou a arte galega nos anos oitenta. Vinculado ao grupo Atlántica, destacou pola súa particular representación da condición humana, da natureza e da crise da nosa civilización a través dunha obra en que o xesto, a cor e a materia son os protagonistas. Co fin de profundar no imaxinario do pintor e na súa traxectoria artística, a Sección de Creación e Artes Visuais Contemporáneas do Consello da Cultura Galega (CCG) dedícalle este mércores, 31 de maio (19:00 horas), unha nova xornada do ciclo Revisando a nosa arte. A sesión, coordinada por Paula Cabaleiro, desenvolverase de xeito presencial na Casa das Campás (Pontevedra). A cita non se poderá seguir en directo, pero será gravada e subida posteriormente á hemeroteca do CCG.

“Hoxe temos a vontade de pertencer a sempre” é unha frase que Guillermo Monroy pronunciou nunha conversa co seu amigo Antón Patiño e que recolle boa parte da personalidade e espírito do artista. Falecido de xeito prematuro aos 28 anos, foi quen de deixar un abraiante e maduro proxecto persoal no que chama a atención o dinamismo, a liberdade e a radical frescura que lles conferiu ás súas obras. Da súa traxectoria profesional e vital falaron esta tarde o propio Antón Patiño, Menchu Lamas, Ángel Cerviño e Ramón Rozas nunha nova sesión do ciclo Revisando a nosa arte, que, desta volta, se trasladou ao Museo de Arte Contemporánea (MARCO) de Vigo. A inauguración da sesión estivo a cargo da presidenta do Consello da Cultura Galega (CCG), Rosario Álvarez e do alcalde de Vigo, Abel Caballero, xunto con Manuel Quintana Martelo, coordinador da sección.