Arquivo de noticias do CCG

Os participantes no faladoiro “Cunqueiro e a cultura catalá”, organizado polo Consello da Cultura Galega e celebrado no Insitut d´Estudis Cataláns, en Barcelona, subliñaron o madrugador recoñecemento que Cataluña brindou ao xenial escritor galego, nomeadamente como poeta. Así o indicou Basilio Losada, catedrático da Universidade de Barcelona e crítico literario, logo de lembrar a aparición, entre 1932 e 1933 dos tres primeiros poemarios cunqueiriáns (Mar ao norde, Cantigas do si e non e Cantiga nova que se chama Riveira) e a excepcional acollida que tivera Alvaro Cunqueiro (1911-1981) en Barcelona en 1934, un feito ao que aludiu tamén Ramón Villares, presidente do Consello da Cultura Galega.

Cincuenta especialistas en industrias culturais e creativas procedentes de 6 países reuniranse do 19 ao 22 de setembro en San Simón, a Illa do Pensamento, con motivo da posta en marcha do proxecto INDCREA, una iniciativa promovida pola Consellería que Cultura e Turismo e o Consello da Cultura Galega (CCG) que bota a andar co foro de debate Galicia e as industrias culturais e creativas diante da Axenda 2020. O conselleiro de Cultura, Roberto Varela, e o presidente do CCG, Ramón Villares, desprazaranse o luns ás 12 horas ao enclave da ensenada da Ría de Vigo para inaugurar e participar neste encontro, organizado xunto ao CCG pola Fundación Illa de San Simón, a Agadic (Axencia Galega das Industrias Culturais) e coa participación activa das tres universidades galegas.

O Consello da Cultura Galega (CCG) e o Centro Galego de Artes da Imaxe (CGAI) inauguraron o 2 de setembro na Casa da Cultura da Pobra do Caramiñal (A Coruña), a exposición itinerante “OS ADEUSES, 73 imaxes da emigración galega (1957-1963)” captadas polo fotoxornalista Alberto Martí. O acto contou coas presenzas de Isaac Maceira, Alcalde de Pobra do Caramiñal, Ramón Villares, presidente do CCG, José María Arias Mosquera, presidente da Fundación Barrié e Banco Pastor, Alfonso Cabaleiro, secretario xeral de Medios da Xunta de Galicia, e Alberto Martí. A exposición estará na Pobra do Caramiñal ata o 20 de setembro. Con anterioridade puido verse na Coruña, Vigo e Santiago de Compostela.

Trátase de recuperar e dixitalizar a memoria audiovisual dos anos finais do Franquismo e dos albores da autonomía en Galicia, noticias e programas producidos aquí entre 1971 e 1976. Ou sexa, os fondos en formato cine, 16 milímetros, do Centro Territorial de TVE, que pasarán logo á Cidade da Cultura. Con ese obxectivo asinaron hoxe un protocolo xeral de colaboración os representantes da Xunta de Galicia, Fundación Cidade da Cultura de Galicia, Radiotelevisión Española e Consello da Cultura Galega. O acto, presidido por Alberto Núñez Feijóo, Presidente da Xunta, tivo lugar no plató do Centro Territorial de TVE en San Marcos-Santiago de Compostela. Os asinantes subliñaron a importancia de dispoñer da memoria audiovisual de quince anos cruciais gardada en 4.564 latas.

O presidente do Consello da Cultura Galega, Ramón Villares, e o conselleiro de Educación e Ordenación Universitaria, Jesús Vázquez Abad, asinaron hoxe un acordo de colaboración polo que a institución cultural porá a disposición da Rede de Normalización Lingüística diferentes recursos para a promoción do galego desde o ámbito local. Trátase de crear a plataforma web “d-linga”, o buscador “lingua en titulares” e o audiovisual “cincuenta anos de defensa e promoción do galego”. No acto paticiparon tamén Anxo Lorenzo, Secretario Xeral de Política Lingüística, e Henrique Monteagudo, director do Centro de Documentación Sociolingüística de Galicia do CCG. O presuposto ascende a 40.000 euros, dos que a Consellería aportará 35.000 euros e o CCG, 5.000 euros.

A escena galega amosarase por vez primeira no Festival de Teatro en Língua Portuguesa (FESTLIP) de Río de Xaneiro mediante catro funcións do espectáculo “Memoria das memorias dun neno labrego”, un monólogo escénico-narrativo co que Cándido Pazó rende homenaxe ao libro de Xosé Neira Vilas,50 anos despois da súa primeira edición. A Agadic (Axencia Galega das Industrias Culturais) da Consellería de Cultura e Turismo e o Consello da Cultura Galega copatrocinan a presenza da compañía "Abrapalabra Creacións Escénicas" neste importante encontro teatral que se desenvolverá do 20 ao 30 de xullo na capital brasileira.

Os fondos documentais e a actividade dos catro arquivos do Consello da Cultura Galega trasladaranse neste mes de xullo á Biblioteca da Cidade da Cultura de Galicia. O convenio de colaboración será asinado mañá día 8 de xullo ás 12 horas no curso dun acto que, na referida Biblioteca, presidirá o conselleiro de Cultura e Turismo, Roberto Varela, e contará coa presenza do presidente do Consello da Cultura, Ramón Villares, e da directora-xerente da Fundación Cidade da Cultura de Galicia, Beatriz González Loroño. Ata o momento os Arquivos estaban instalados en dependencias alugadas polo CCG, institución estatutaria que ten a súa sede no Pazo de Raxoi, en Santiago de Compostela. O traslado supoñerá para o CCG un aforro de 40.OOO euros anuais en alugueres.

“Galicia sería díficil de entender sen emigración, pero moito máis difícil sería imaxinala de non se ter producido esta profunda e sostida onda migratoria, que vencellou estreitamente a imaxe dos galegos no mundo con tantos outros pobos europeos -e non europeos- que tamén foron países de emigrantes”. Así o ve Ramón Villares, presidente do Consello da Cultura Galega e catedrático de Historia Contemporánea da USC, no seu traballo “Vellas e novas formas de entender a emigración”, que abre as Actas do Congreso “Emigración e Educación (1900-1936)”, libro presentado hoxe no Consello da Cultura Galega.

O Consello da Cultura Galega acolle desde hoxe as sesións de traballo da VII Reunión de Escultura Romana en Hispania, en homenaxe á memoria do profesor Alberto Balil Illana. No acto inaugural interviron: Raquel Casal, directora do Departamento de Historia I da USC; José Manuel Rey Pichel, director xeral de Patrimonio Cultural da Xunta de Galicia, e Fernando Acuña Castroviejo, catedrático de Arquoloxía da USC, que disertou sobre “Alberto Balil e a renovación da arqueoloxía galaica”.

O Presidente do Consello da Cultura Galega, Ramón Villares, clausurou hoxe ás 20 horas no Real Club Náutico de Las Palmas de Gran Canaria a exposición NÓS MESMOS. ASOCIACIONISMO GALEGO NA EMIGRACIÓN. A mostra, realizada polo CCG a través do seu Arquivo da Emigración Galega, foi inaugurada o pasado 17 de xuño. Con anterioridade percorreu diferentes paísess europeos e americanos.

“O corpus poético do autor de Cantiga nova que se chama ribeira, duplicarase en breve, o que quere dicir que arestora só coñecemos a metade da súa poesía”, afirmou Manuel Forcadela, escritor e profesor da Universidade de Vigo, no curso do faladoiro celebrado no Consello da Cultura Galega.

Os impulsores do diálogo e os debates orientados a procurar estratexias compartidas para a cultura galega subliñan a necesidade dun novo contrato institucional e social para o futuro dun sector estratéxico no país. Así o proclama a publicación Reflexión estratéxica sobre a cultura galega, presentada hoxe no Consello da Cultura Galega, institución editora, promotora e acolledora dos debates, reflexións e centos de propostas que, durante máis dun ano, abriron e fomentaron o diálogo entre o sector e a sociedade galega.

Inspirado no seu último encontro con Cunqueiro, o cantautor berciano ofrece neste concerto unha versión da poesía do escritor mindoniense. O concerto celebrarase no Salón de Teatro de Santiago o venres 10 de xuño ás 21 horas.

Santiago de Compostela, 3 de maio de 2011.- “Necesitamos máis pantallas para facer visible o audiovisual galego”, sostivo o crítico Miguel Anxo Fernández na xornada de reflexión e debate “A lingua do cine. A lingua e o cine”, dirixida pola realizadora e catedrática da Universidade de Santiago, Margarita Ledo, e celebrada esta tarde na Biblioteca do Consello da Cultura Galega. O debate contou coas intervencións do director brasileiro Carlos Gerbase, o Director do Institut Catalá de les Industries Culturals, Ton Lladó, e os apuntamentos do director, productor e creador cultural galego Antón Reixa.

O Consello da Cultura Galega presentou hoxe a edición facsimilar dos catro números da revista LOIA, editada en Madrid entre 1975 e 1978, e que acolleu as primeiras expresións poéticas de Lois Pereiro (Monforte de Lemos, 1958-A Coruña, 1996), figura senlleira do Día das Letras Galegas-2011. O Presidente da institución, Ramón Villares, e o coordinador da edición, e da revista, o xornalista Xosé Manuel Pereiro, glosaron a significación dunha publicación alternativa de estudantes galegos en Madrid, “movidos por impulsos renovadores e rupturistas”. A edición facsimilar e o estudo crítico  pode descargarse en: www.consellodacultura.org/mediateca

Santiago de Compostela, 12 de maio de 2011.- O 12 de maio ás 19 30 horas na Sala Valle Inclán do Círculo de Bellas Artes de Madrid (rúa Alcalá, 42) terá lugar o primeiro dos faladoiros do programa do Centenario  Cunqueiro (1911-2011) organizado polo Consello da Cultura Galega. Tres escritores (César Antonio Molina, Luís Mateo Díez e Vicente Araguas) e un crítico literario (Ángel Basanta), coordinados polo escritor e xornalista Carlos  Reigosa, falarán de “Cunqueiro desde Madrid”. Presentará o acto, como representante do Consello da Cultura, Henrique Monteagudo, coordinador do "Programa Cunqueiro".

Santiago de Compostela, 17 de maio de 2011.- O Consello da Cultura Galega programou para o día 17 de maio o primeiro “Concerto Día das Letras Galegas”, que ofreceu a orquestra Real Filharmonía de Galicia, dirixida por Maximino Zumalave na igrexa de San Domingos de Bonaval cun programa que uniu música e palabra nas partituras de destacados compositores sobre textos de figuras sobranceiras da litreratura galega. O Plenario da institución, a proposta da Sección de Música e Artes Escénicas, coordinada por Maximino Zumalave, aprobou a organización deste acto institucional o pasado 28 de abril.  Ao concerto, retransmitido pola TVG-2, asistiron representacións de institucións e entidades da cultura e a sociedade galegas. Entre outros, a Presidenta do Parlamento de Galicia, Pilar Rojo, e o Arcebispo de Santiago, Julián Barrio. 250 persoas seguiron o concerto en Bonaval.

Santiago de Compostela, 19 de maio de 2011.- O presente e o futuro do galego  como lingua de expresión científica e os seus diferentes formatos de comunicación serán analizados na xornada  "Escribir de ciencia en galego" o venres día 20 de maio no Consello da Cultura Galega. Organizada pola Sección de Ciencia, natureza e sociedade, que  coordina Francisco Díaz-Fierros, a xornada contará pola mañá con relatorios de expertos en comunicación científica para debatir pola tarde o futuro da publicación científica en galego. O programa pode verse en: http://consellodacultura.org/files/2011/05/escribir_de_ciencia.pdf

Santiago de Compostela, 20 de maio de 2011.- A necesidade inexcusable da presenza do idioma galego no mundo da ciencia e da técnica foi o fío conductor da xornada “Escribir de ciencia en galego”, celebrada hoxe no Consello da Cultura Galega. Non se trata de competir coa lingua franca actual, o inglés, no campo das revistas especializadas, pero si de aproveitar as posibilidades das publicacións divulgativas e pedagóxicas. Organizado pola Secciòn de “Ciencia, natureza e sociedade”, que coordina Francisco Díaz-Fierros, o encontro serviu tamén para anunciar a próxima publicación do documento “”Pasado, presente e futuro da publicación científica en galego”.