Arquivo de noticias do CCG

A Sección de Comunicación do Consello da Cultura Galega (CCG) presentou esta mañá o Informe A Comunicación en Galicia 2004, unha publicación bianual que analiza a situación dos medios en Galicia e as tendencias que se perfilan no hipersector da comunicación.

A Sección de Comunicación do Consello da Cultura Galega (CCG) presentará este venres, día 28, o informe "A comunicación en Galicia 2004". A rolda de prensa terá lugar ás 12´00 horas no salón de actos da institución e intervirán: Xosé López, coordinador da Sección, vicepresidente do Consello e profesor da Facultade de Ciencias da Comunicación da Universidade de Santiago, e Alfonso Zulueta de Haz, presidente do CCG

O Consello da Cultura Galega (CCG) presenta este luns, día 24 de xaneiro, a colección de 11 carteis "Arquitectos galegos" e a serie documental "A idea construída" (13 arquitectos), dous achegamentos á obra das máis importantes figuras da arquitectura galega contemporánea. O acto, que se celebrará ás 20´00 horas na delegación do Colexio Oficial de Arquitectos de Galicia en Vigo (rúa Marqués de Valladares, 27), servirá tamén para render homenaxe á obra e á memoria do arquitecto Xosé Bar Boo.

O Plan Xeral de Normalización Lingüística (PXNL) que comeza a executarse mañá sábado é o gran protagonista do sesión de hoxe da VIII edición dos Encontros para a Normalización Lingüística, organizados polo Centro de Documentación Sociolingüística de Galicia do Consello da Cultura Galega (CCG). O director xeral de Política Lingüística da Xunta, Xesús Pablo González Moreiras, foi o encargado de debullar as súas principais características e perspectivas de execución ante os máis de 200 técnicos e investigadores da lingua asistentes ao foro.

A Sección de Patrimonio Histórico do Consello da Cultura Galega presentou este xoves, día 20 de xaneiro, a obra "Miliarios e outras inscricións viarias do Noroeste Hispánico (conventos bracarense, lucense e asturicense)", de Antonio Rodríguez Colmenero, Santiago Ferrer Sierra e Rubén Darío Álvarez Asorey, da Universidade de Santiago de Compostela. Trátase, como salientou Gèza Alföldy, catedrático de Historia Antiga da Universidade de Heidelberg e presidente do Proxecto da Academia de Berlín "Miliarii Imperii Roman, “dunha obra extraordinaria, do corpus máis grande deste ámbito que ten visto a comunidade científica internacional".

A oitava edición dos Encontros para a Normalización Lingüística, organizados polo Centro de Documentación Sociolingüística de Galicia do Consello da Cultura Galega (CCG), reúnen desde hoxe e ata o vindeiro sábado a máis de douscentos técnicos e investigadores de lingua en Santiago de Compostela. Na inauguración das xornadas, o director xeral de Política Lingüística, Xesús Pablo González Moreiras, e os responsables do CCG amosaron as súas expectativas en torno ao tema vertebrador deste encontro, a inminente posta en marcha por parte da Xunta das medidas do Plano Xeral de Normalización Lingüística (PXNL) o vindeiro sábado.

A Sección de Patrimonio Histórico do Consello da Cultura Galega presentará este xoves, día 20 de xaneiro, a obra "Miliarios e outras inscricións viarias do Noroeste Hispánico (conventos bracarense, lucense e asturicense)", de Antonio Rodríguez Colmenero, Santiago Ferrer Sierra e Rubén Darío Álvarez Asorey, da Universidade de Santiago de Compostela.

O director xeral de Política Lingüística da Xunta, Xesús Pablo González Moreiras, e o presidente do Consello da Cultura Galega, Alfonso Zulueta de Haz, inaugurarán este xoves, 20 de xaneiro, a oitava edición dos Encontros para a Normalización Lingüística, organizados polo Centro de Documentación Sociolingüística de Galicia do CCG. Ata o vindeiro sábado, este foro reunirá a máis de douscentos técnicos dos servizos de normalización lingüística e servizos de tradución das administracións galegas e de entidades privadas e a investigadores e estudantes de sociolingüística galega, para abordar os problemas do idioma en vésperas da aplicación do Plano Xeral de Normalización Lingüística (PXNL).

A Sección de Literatura e Industrias da Edición do Consello da Cultura Galega continúa o seu programa de tertulias mensuais coa celebración este xoves, día 20 de xaneiro, dunha tertulia sobre "A tradución". Tres convidados especializados no tema vertebrarán o encontro coas súas reflexións e valoracións en torno á situación, características e problemáticas da tradución de obras doutros idiomas ao galego e de obras galegas a outros idiomas.

O Centro de Documentación Sociolingüística de Galicia do Consello da Cultura Galega celebrará este xoves, venres e sábado, días 20, 21 e 22 de xaneiro, a oitava edición dos Encontros para a normalización Lingüística. Estes encontros constitúen o único foro regular convocado anualmente para o estudo, reflexión e o debate sobre os problemas da promoción social do idioma. Pretenden ademais converterse no punto de encontro das persoas que desenvolven o seu labor profesional nos diferentes servizos lingüísticos, contribuír á formación de especialistas en sociolingüística galega e dar a coñecer os novos proxectos e recursos elaborados para o desenvolvemento e difusión do galego.

O Pleno do Consello da Cultura Galega (CCG) reunido hoxe en sesión ordinaria, a primeira do novo ano, elixiu por unanimidade ao xornalista e profesor Xosé López García como novo vicepresidente da institución.

O Pleno do Consello da Cultura Galega (CCG) reunirase en sesión ordinaria, a primeira do novo ano, o vindeiro venres, día 14 de xaneiro, ás 17´00 horas. Nesta reunión procederase á elección dun novo vicepresidente entre os membros do Pleno. O novo cargo ampliará os integrantes da Comisión Executiva, que conta actualmente cun presidente, Alfonso Zulueta de Haz; dous vicepresidentes, Ramón Castromil Ventureira e Francisco Díaz-Fierros Viqueira, e un secretario, Henrique Monteagudo Romero.

As xornadas "A arquitectura desde Madrid" rematan esta tarde no Consello da Cultura Galega (CCG) cunha valoración moi positiva por parte de asistentes e participantes. O catedrático Gabriel Ruiz, coordinador das xornadas xunto ao responsábel da Sección de Arquitectura do CCG, Iago Seara, salientou que este encontro "conseguiu traer a Galicia a moitos dos mellores arquitectos que traballan na capital do Estado" o que lle permitiu aos asistentes, na súa maioría arquitectos ou estudantes de Arquitectura, "coñecer de primeira man o que se está cociñando nos mellores estudios de arquitectura madrileños; ver e reflexionar sobre obras de calidade que non estarán realizadas até dentro duns anos".

A tertulia mensual da Sección de Literatura e Industrias da Edición do Consello da Cultura Galega celebrarase mañá venres, día 17 de decembro, baixo o título "A animación á lectura". Pilar Sampedro, presidenta da Asociación Galega do Libro Infantil e Xuvenil (GALIX), presentará e conducirá o encontro, no que participarán Cristina Novoa, asesora de bibliotecas do Servizo de Formación do Profesorado; Magdalena de Rojas, escritora, mestra e bibliotecaria, e membros da sección organizadora.

As xornadas "A arquitectura desde Madrid" comezaron esta mañá no Consello da Cultura Galega (CCG) rendéndolle un emotivo recordo ao arquitecto Rafael Baltar Tojo, membro da Sección de Arquitectura do CCG falecido no día de onte. O presidente da institución, Alfonso Zulueta de Haz, o coordinador da Sección á que pertencían, Iago Seara, e o director xeral de Urbanismo da Xunta, Martín Fernández, aproveitaron a ocasión para destacar a calidade humana de Rafael Baltar e o enorme traballo que fixo a prol da arquitectura en Galicia.

A Sección de Arquitectura do Consello da Cultura Galega celebra este xoves e venres, días 16 e 17 de decembro, as xornadas "A arquitectura desde Madrid", coas que se pretende ofrecer por vez primeira en Galicia unha visión ampla e pluriperspectiva da arquitectura que se está a desenvolver na actualidade na capital do estado. Destacados arquitectos, críticos e investigadores compartirán dous días de debate e reflexión sobre as súas traxectorias e obras, sobre os seus coñecementos e opinións sobre a arquitectura madrileña.

A Sección de Arquitectura do Consello da Cultura Galega celebrará este xoves e venres, días 16 e 17 de decembro, as xornadas "A arquitectura desde Madrid". Nelas, 14 dos máis relevantes arquitectos, investigadores e críticos da capital madrileña analizarán pormenorizadamente a arquitectura que se está a desenvolver nese territorio e exporán as súas obras e opinións ante preto de 140 profesionais e universitarios matriculados no encontro.

As xornadas "A ARQUITECTURA DESDE MADRID" serán presentadas en rolda de prensa mañá martes, día 14 de decembro, ás 12´00 horas, no salón de actos do Consello da Cultura Galega (CCG). O encontro está organizado pola Sección de Arquitectura do CCG e continúa a liña marcada polos encontros dedicados ás arquitecturas lisboeta, catalana e vasco-navarra celebrados con anterioridade.

A Comandancia da Mariña de Baiona (Pontevedra) acollerá este sábado, 27 de novembro, as II Xornadas sobre "O Conde de Gondomar e a súa época". Organizado polo Consello da Cultura Galega (CCG), o encontro, en sesión de mañá e tarde, contará coa participación de oito historiadores galegos. O acto inaugural será presidido, ás 10´15 horas, polo presidente do CCG, Alfonso Zulueta de Haz, a quen acompañará o presidente da Deputación de Pontevedra, Rafael Louzán Abal.

O SIMPOSIO DE ANTROPOLOXÍA "LEMBRANDO A DON XAQUÍN LORENZO" servirá para estudar as orientacións que guiaron ao creador da etnografía galega e tamén para atender as incitacións da sociedade actual desde a perspectiva e a reflexión da antropoloxía cultural. Os obxectivos resumiunos o profesor Xosé Manuel González Reboredo durante a presentación do encontro que vai celebrarse os días 25, 26 e 27 de novembro no Museo do Pobo Galego, en Santiago de Compostela.