Arquivo de noticias do CCG

¿Que papel pode xogar a arte na procura dun cambio social cara un desenvolvemento sustentable e igualitario do mundo? Sobre esta pregunta falarán artistas e críticos na xornada “Da emerxencia (creativa)” que organiza a Sección de Creación e Artes Visuais Contemporáneas do Consello da Cultura Galega (CCG). Paula Cabaleiro coordina esta cita na que participan Fernando Casás, Ruth Montiel Arias, Pamen Pereira, Carlos Quintáns, Encarna Lago e Luís Martínez Santos. A xornada, que acaba de abrir a inscrición, é presencial pero pode seguirse en directo a través do web do CCG e as súas redes sociais.

Este 15 de setembro cumpríanse 170 anos do nacemento de Manuel Curros Enríquez. Con ocasión desta efeméride, a presidenta do Consello da Cultura Galega (CCG), Rosario Álvarez, trasladouse á fundación do escritor para participar nunha xuntanza cos membros desta entidade. No marco da reunión tivo lugar un encontro coas rapazas que participaron no vídeo en que se recita o poema que Curros escribiu sobre a chegada do Ferrocarril a Galicia hai 140 anos.

Hoxe, 13 de setembro é cabodano de Filgueira Valverde. Coa súa voz, xunto coa de Rafael Dieste e a de Maruxa Boga, o Consello da Cultura Galega (CCG) bota a andar “Voces centenarias”. Trátase dun proxecto que peneira no fondo inédito que custodia o Arquivo Sonoro de Galicia (ASG) para ofrecer mensualmente unha escolma das súas gravacións sonoras. Desde o web da institución poderase escoitar a voz de persoeiros da cultura, da política, da emigración... que axudaron a perfilar o noso pasado pero tamén o noso destino presente e futuro.

Xoán Manuel Pintos Villar (O Burgo-Pontevedra, 1811 - Vigo, 1876) foi un dos principais precursores literarios do rexurdimento. É o autor de A gaita galega, obra publicada en 1853 que se converteu no primeiro libro escrito case exclusivamente en galego. María do Carme Ríos Panisse é a autora da entrada que hoxe se incorpora ao Álbum de Galicia.

Viadutos, pontes, túneles, máquinas, estacións de trens... Galicia conta cun abondoso patrimonio vencellado á construción do ferrocarril. Do estado actual e dos retos que quedan por facer falaron historiadores e xestores de museos no Consello da Cultura Galega na xornada “ no Ano Europeo do Ferrocarril”. A cita, coordinada por Rebeca Blanco-Rotea e María Xosé Porteiro, puxo de manifesto a importancia de catalogar e protexer este tipo de patrimonio para a súa posta en valor, así como reforzar o Museo do Ferrocarril existente en Monforte para equiparalo a outros centros a nivel español.

Son trinta números que recollen unha mostra representativa do Boletín oficial de la sociedad Fomento de Porriño y su distrito, unha publicación editada en Bos Aires para informar dos asuntos internos da institución e outras novas de interese relacionadas con Porriño. É un novo lote de números que completa o proxecto Repertorio de prensa da emigración” que mantén o Arquivo da Emigración Galega do Consello da Cultura Galega (CCG) e que se pode consultar na rede.

Foz ten unha histórica relación co mar, de aí que fose unha parada relevante na itinerancia de “Inventio Mundi”, un proxecto expositivo do Consello da Cultura Galega (CCG) coa colaboración da Secretaría Xeral de Emigración. A presidenta do CCG, Rosario Álvarez; o secretario xeral da Emigración, Antonio Rodríguez Miranda, e o alcalde de Foz, Fran Cajoto, foron os encargados de inaugurar esta mostra que relata unha parte da historia da navegación marítima galega e que comeza co comercio coas Illas Molucas. A mostra, instalada no Centro de Interpretación da Mariña (CENIMA) de Foz, pode verse ata o vindeiro 15 de outubro.

Chamábase Francisca Claudia Josefa Antonia González-Garrido y García (A Coruña, 1842 - Madrid, 1917) aínda que era máis coñecida polo nome de Fanny Garrido e, moito menos e polo pseudónimo de “Eulalia de Liáns”. Muller de sonada beleza, foi unha figura carismática, de gran calado intelectual que amosou un gran interese e compromiso pola cultura galega. Laura Touriñán Morandeira asina a súa entrada no Álbum de Galicia.

Estamos no Ano Europeo do Ferrocarril. Unha celebración que pretende concienciar no uso deste medio de transporte e á que se lle suma outra efeméride: neste 2021 cúmprense 140 anos da chegada do ferrocarril a Galicia. Con este motivo, o Consello da Cultura Galega (CCG) propón, para o vindeiro día 8 de setembro en Santiago, unha xornada que pretende poñer o foco na relevancia histórica deste medio de transporte e nas súas consecuencias para Galicia desde diferentes puntos de vista. Destacados especialistas participan nesta cita titulada “O patrimonio industrial ferroviario no Ano Europeo do Ferrocarril” que abre hoxe o seu prazo de inscrición a través do web do CCG.

O Consello da Cultura Galega (CCG) colabora na nova edición do Festiletras co espectáculo “Contos de animais” de Celso Fernández Sanmartín. A cita terá lugar o día 2 de setembro ás 16:30 horas, neste festival que leva case corenta anos promovendo a cultura no rural.

Mañá, martes 31 de agosto ás 11:00 horas, celebrarase no Consello da Cultura Galega a presentación do programa das xornadas de Boas Novas No Camiño que ao longo de mes do setembro abordarán as boas prácticas culturais nos territorios do Camiño. A iniciativa está organizada pola Asociación de Profesionais da Xestión Cultural co apoio do programa O Teu Xacobeo da Xunta de Galicia. Dolores Vilavedra, secretaria do CCG asiste a esta presentación na que explicarán todos os detalles Pilar Portela, presidenta da Asociación Galega de Profesionais da Xestión Cultural; Cecilia Pereira Marimón, comisaria do Xacobeo 2021 ; Belén Bermejo, directora do Festival Espazos Sonoros, proxecto recollido no Banco de Boas Prácticas da Xestión Cultural; e Samuel Diz, director artístico de Música no Claustro, proxecto recollido no Banco de Boas Prácticas da Xestión Cultural.

O compositor Felipe Paz, a escritora Francisca Herrera, o neurólogo Jesús Manuel Calle Pazos e o xornalista Antonio Neira de Mosquera son as últimas entradas do Álbum de Galicia. O proxecto do Consello da Cultura Galega (CCG) suma neste de mes de agosto catro novas entradas que axudan a afondar no coñecemento de numerosas personalidades da nosa cultura.

Este sábado 21 de agosto comeza a cuarta edición do Ares Indiano, unha celebración organizada por este concello coruñés para conmemorar o pasado emigrante da vila. O Consello da Cultura Galega (CCG) colabora nesta ocasión con Os Adeuses, a exposición que amosa, a través da ollada do fotógrafo Alberto Martí, os últimos momentos da emigración galega cara a América. A presidenta da institución, Rosario Álvarez, asiste á inauguración da mostra que se encadra dentro dos actos de apertura do Ares Indiano xunto co alcalde, Julio Iglesias Redondo, e a concelleira de Cultura e Emprego, Alma Barrón. A exposición está divida en dúas das escolas financiadas polos emigrantes locais, a escola Alianza Aresana e a escola da Tenencia en Caamouco, e pode verse ata o 31 de agosto.

O vindeiro domingo pecha as súas portas en Ourense Afonso X e Galicia, a mostra coa que o Consello da Cultura Galega (CCG), a Xunta e a Deputación de Ourense conmemoran o 800 aniversario do Rei Sabio. A exposición convida a coñecer a esta figura a través de documentos, testemuños arqueolóxicos, literarios e musicais que amosan o legado afonsino en paralelo ao esplendor da cultura galega na etapa medieval. O músico, musicólogo e medievalista Antoni Rossell é o comisario desta proposta que se enriqueceu para a súa exhibición en Ourense con materiais escolmados por Afonso Vázquez Monxardín que afondan na conexión do monarca con esta provincia.

O 29 de xullo é o sesenta cabodano de Aquilino Iglesia Alvariño (Seivane, Abadín, 1909–Santiago de Compostela, 1961), recoñecido poeta e tradutor de poesía clásica á nosa lingua. Pero foi moito máis ca iso, foi unha figura fundamental na construción do galego culto. O Consello da Cultura Galega (CCG) recupera esa faceta coa publicación «Da fonte máis fonda». Historia do vocabulario e outros escritos sobre o idioma galego, que recupera un texto inédito de Aquilino de gran valor. Dunha banda porque explica o elo perdido do proxecto editorial Historia de Galiza dirixido por Otero Pedrayo e, da outra, porque axuda a coñecer un episodio ignorado na configuración do galego culto. Cartas, textos inéditos e varios estudos contextualizadores a cargo dos filólogos Rosario Álvarez e Henrique Monteagudo e do historiador Ramón Villares complementan esta publicación que se pode descargar desde o web do CCG. Ademais, a publicación enriquécese cun especial web que visibiliza eses materiais nun relato cronolóxico.

O 25 de xullo de 1961 a praza da Quintana de Santiago de Compostela ateigouse de xente para asistir á primeira representación en Galicia de Os vellos non deben de namorarse a cargo do coro Cantigas e Agarimos. Foi un fito histórico e cultural do país pero tamén un dos capítulos máis destacados desta formación histórica que hoxe, 29 de xullo, cumpre cen anos. O Consello da Cultura Galega (CCG) celebra a efeméride nun especial que xunta imaxes, debuxos, recortes hemerográficos e diferentes materiais arredor daquela representación. Proceden de Son de Galicia, a mostra organizada polo CCG en 2018 que reconstrúe a historia do país a través do papel que desempeñaron os coros.

“Era unha rapaza máis ben pequena e delgada, moi churrusqueira e graciosa e moi seria e competente no seu labor” dixo Lois Tobío de Margot Sponer (Niesse, 1898 - Berlín, 1945), unha polaca que foi pioneira dos estudos lingüísticos galegos. A súa entrada, asinada por Patricia Arias, acaba de incorporarse ao Álbum de Galicia.

En novembro de 2019 o Consello da Cultura Galega (CCG) botou a andar o Foro Patrimonio e Sociedade, un ambicioso proxecto que tiña como obxectivo propor un cambio na xestión do noso inxente patrimonio. Trinta especialistas de diferentes ámbitos xuntáronse durante mais de ano e medio nun proceso único, deseñado expresamente para integrar a todas as persoas que teñen que ver co sector, desde a sociedade ata os partidos políticos. O resultado desta iniciativa se concreta nunha Guía Práctica que, ademais de recomendar a creación dun Observatorio de Patrimonio, unha comisión de Patrimonio no Parlamento e a elaboración dun Plan Autonómico Patrimonial de Galicia, traza a folla de ruta para a xestión do patrimonio galego nos vindeiros anos. A presidenta do CCG, Rosario Álvarez, e a coordinadora do Foro e mais da Sección de Patrimonio e Bens Culturais, Rebeca Blanco-Rotea, presentaron publicamente esta mañá os resultados deste proceso.

O filólogo lugués Aníbal Otero (Barcia, Ribeira de Piquín 1911-1974) é coñecido principalmente por ser un dos enquisadores do Atlas Lingüístico de la Península Ibérica, así como pola súa detención (e posterior condena) cando estaba a facer traballo de campo en Portugal no momento da rebelión militar de 1936. Ora ben, as súas contribucións van ben máis alá. Foi recolector destacado de romances, redactor de numerosas contribucións lexicográficas e etimolóxicas e tamén creador literario, se ben que boa parte dos seus escritos permanece inédita. O profesor Xosé Afonso Álvarez Pérez asina a entrada que se acaba de incorporar ao Álbum de Galicia.

Arqueixal, Gandeiria Quintián, Amarelante ou Adegas Celme son proxectos empresariais galegos que se caracterizan por un fondo compromiso polo medio, pola produción agrícola e gandeira sustentable e polo respecto á lingua e á cultura galegas. Os responsables destas iniciativas participan na xornada “Faladoiro de marcas que constrúen novas ruralidades” que a Sección de Lingua, Literatura e Comunicación do Consello da Cultura Galega (CCG) organiza mañá martes, 20 de xullo, en Castrelo de Miño. A presidenta da institución, Rosario Álvarez, inaugurará esta cita coordinada por Elisa Fernández Rei e Eva Sánchez Amboage.