Arquivo de noticias do CCG

O Consello da Cultura Galega e o Instituto de Estudos Chairegos, (IESCHA) coa colaboración do Concello de Vilalba, celebran desde mañá ata o sábado as “Xornadas sobre inmigración”. Dous días de relatorios, exposicións e música que converterán a Casa da Cultura do concello lucense nun espazo de reflexión e diálogo arredor dos procesos migratorios, a diversidade cultural e os desafíos da convivencia e da integración social.

Crear redes estables de investigación entre museos, universidades, e centros especializados é unha das ideas centrais que se apuntaron este martes na xornada “Construír museo. A investigación como núcleo da institución”, organizada polo Consello da Cultura Galega (CCG) e o Consello Galego de Museos. A presidenta do CCG, Dolores Vilavedra Fernández, destacou na inauguración a importancia da investigación como “o corazón dos museos” e incidiu que o labor investigador precisa cooperación, diálogo e innovación. Pola súa banda, Ramón Yzquierdo Peiró, presidente do Consello Galego de Museos, reivindicou a utilidade e necesidade dos museos para a sociedade. M.ª Ángeles Tilve Jar, directora do Museo de Pontevedra, destacou que “o museo debe ser capaz de producir coñecemento, un lugar onde se investiga, se documenta, se formulan preguntas e se constrúen interpretacións sobre os bens culturais que conservamos”.

O corpo entendido como ferramenta de creación, como espazo de experimentación e como vehículo de reflexión e reivindicación. Sobre estas premisas constrúese “Sacar o corpo. A performance galega”, a xornada que a Sección de Creación e Artes Visuais Contemporáneas do Consello da Cultura Galega (CCG) organiza este xoves (12 de novembro, 16:45 horas) baixo a coordinación de Edu Valiña. A proposta busca achegarse á evolución desta disciplina, con especial atención ao caso galego, da man de figuras de referencia nesta disciplina como a madrileña Nieves Correa ou as galegas María Rojas, Ana Gesto, Mónica Maneiro. A sesión é presencial pero pode seguirse en directo desde a canle de YouTube do CCG.

A presidenta do Consello da Cultura Galega, Dolores Vilavedra, visitou a Escola de Arte e Superior de Deseño Mestre Mateo, onde foi recibida polo seu director, Juan Adrio. Durante o percorrido polas instalacións puido coñecer de primeira man o funcionamento do centro, os seus ámbitos de formación e os proxectos que desenvolve o alumnado nas distintas especialidades.

A Sección de Patrimonmio e Bens Culturais do Consello da Cultura Galega reuniu este luns na súa sede profesionais da arquitectura, a historia da arte e a conservación-restauración para reflexionar sobre os criterios e as metodoloxías de intervención no patrimonio arquitectónico de Galicia. Na sesón falouse da importancia do coñecemento rigoroso dos edificios, da identificación dos seus valores materiais e inmateriais e a colaboración entre profesionais de distintas disciplinas entre outros elementos como medidas fundamentais para garantir intervencións respectuosas coa historia e adaptadas ás necesidades actuais. Foi a primeira sesión dun ciclo dedicado analizar como se interven no patrimonio edificado que terá novas sesións os días 16 e 23 de novembro.

A entrega de novembro de Proxector, proposta elaborada polo Centro de Documentación Sociolingüística de Galicia (CDSG) do Consello da Cultura Galega, co apoio da Universidade de Santiago de Compostela (USC), achégase ao solo e á figura dun dos seus estudosos máis recoñecidos, o científico galego Francisco Díaz-Fierros. Baixo o título “O solo: un mundo por descubrir baixo os nosos pés”, unha ducia de recursos audiovisuais permiten achegarse ao coñecemento científico dos solos e á súa importancia para a vida e o equilibrio dos ecosistemas.

O Consello da Cultura Galega (CCG) e a Asociación de Entidades Locais pola Lingua Galega (Alingua), coa colaboración do Concello de Santiago de Compostela, reuniron o pasado 7 de novembro a vinte familias nunha xornada de traballo chamada “Criar en galego”. A presidenta do CCG, Dolores Vilavedra; xunto con Ramón Varela, presidente de a lingua e a alcaldesa de Santiago de Compostela abriron a sesión que permitiu detectar carencias e boas prácticas na oferta de produtos, contidos e servizos en lingua galega e recoller propostas para trasladar ao sector empresarial.

O Consello da Cultura Galega (CCG) e o Consello Galego de Museos celebran este martes (10 novembro, a partir das 9:30 horas) en Santiago de Compostela a xornada “Construír museo. A investigación como núcleo da institución”, un encontro que reunirá responsables e profesionais de museos galegos e do conxunto do Estado para reflexionar sobre o papel da investigación na actividade museística contemporánea. A iniciativa propón reivindicar o labor investigador como unha función esencial dos museos, máis alá da conservación e exhibición das coleccións, e como fundamento do coñecemento, dos discursos expositivos e da relación destas institucións coa sociedade. Dolores Vilavedra Fernández, presidenta do CCG; Ramón Yzquierdo Peiró, director do Museo da Catedral de Santiago de Compostela e presidente do Consello Galego de Museos; e M.ª Ángeles Tilve Jar, directora do Museo de Pontevedra inauguran esta sesión presencial que se pode seguir en directo desde o web e a canle de Youtube do CCG.

Son só cinco cartas, pero abondan para revelar a amizade duradeira entre dúas figuras destacadas da cultura galega: Ramón Cabanillas (Cambados, 1876-1959) e Ramón Otero Pedrayo (Ourense, 1888-1976). Nelas afloran a fonda conexión intelectual e humana que os uniu durante décadas, así como as viaxes, as soidades, os desterros e os silencios que marcaron as súas vidas. O Consello da Cultura Galega (CCG), no día en que morreu Cabanillas, pon en rede este breve epistolario, acompañado de edición e estudo a cargo de Francisco Fernández Rei, do Instituto da Lingua Galega da Universidade de Santiago de Compostela.

O Consello da Cultura Galega (CCG) reforza a súa presenza e as relacións culturais con Portugal cunha viaxe institucional da súa presidenta, Dolores Vilavedra, a Lisboa. Durante a súa estadía, a responsable da institución asinará un protocolo de cooperación coa Universidade de Lisboa (ULisboa), a través da súa Facultade de Letras e da Cátedra de Estudos Galegos, co obxectivo de consolidar e desenvolver novas vías de colaboración académica, científica e cultural entre ambas institucións.

A Sección de Patrimonio e Bens Culturais do Consello da Cultura Galega (CCG) inaugura este luns 9 de novembro o foro “Intervir no patrimonio edificado. Incorporar o pasado ao futuro”, unha iniciativa que reúne en tres sesións (9, 16 e 23 de novembro) a profesionais da arquitectura, especialistas en patrimonio e representantes de institucións e entidades para reflexionar sobre os retos que presentan a conservación, a restauración e a rehabilitación dos bens arquitectónicos. A primeira das citas está dedicada aos “criterios e metodoloxías de intervención sobre o patrimonio edificado de Galicia: conservar, restaurar e rehabilitar”. O foro está coordinado por Carlos Amoedo, Rosa Benavides, Rebeca Blanco-Rotea e Teresa Nieto.

A Universidade Rennes 2, coa colaboración do Consello da Cultura Galega (CCG), vén de sacar do prelo a publicación Bretagne-Galice. Paysages et identités, unha obra colectiva que afonda nas semellanzas e nos vínculos históricos, culturais e paisaxísticos entre Galicia e Bretaña, dous territorios situados nos extremos atlánticos de Europa. O volume, coordinado por Christine Rivalan Guégo e Olivier David, reúne achegas de investigadores e investigadoras galegos e bretóns procedentes de diferentes disciplinas, que tiveron lugar no congreso realizado en Rennes e organizado por ambas as dúas entidades. O volume ofrece en 456 páxinas unha perspectiva comparada e transdisciplinar que permite superar visións parciais ou estereotipadas sobre estas rexións.

A presidenta do Consello da Cultura Galega (CCG), Dolores Vilavedra, e o presidente da Federación Galega de Municipios e Provincias (FEGAMP), Alberto Varela, asinaron este martes, na sede do CCG, o primeiro convenio marco entre ambas as dúas entidades, que permitirá desenvolver actividades de colaboración conxunta. "Congratulámonos con esta iniciativa porque os concellos son interlocutores estratéxicos", apuntou Vilavedra tras a sinatura. Unha idea que reforzou Varela ao sinalar que "somos a Administración máis próxima á cidadanía e a que máis impulsa a cultura". O convenio estréase co estudo de investigación titulado Cultura no territorio: o ecosistema cultural municipal en cifras, que permitirá coñecer a realidade cultural dos concellos galegos.

O Consello da Cultura Galega (CCG) participa no proxecto “Memoria Migrante (en) Movemento” - presentado polo Galgo Espazo Cultural da Coruña- a través da exposición “Emigrantas”. Parte dos contidos desta mostra exhibiranse nos escaparates de establecementos do barrio coruñés de Agra do Orzán. Esta iniciativa permitirá achegar o relato expositivo da mostra que documenta a historia da emigración galega en clave feminina a espazos cotiáns do barrio e visibilizar as experiencias e as memorias das mulleres migrantes, contribuíndo a promover o recoñecemento da diversidade cultural e o diálogo intercultural.

O Arquivo Sonoro de Galicia (ASG) do Consello da Cultura Galega (CCG), pon en rede unha conferencia de Ramón Otero Pedrayo (Ourense, 1888 - 1976) dedicada á figura e á obra de Valentín Lamas Carvajal (Ourense, 1849 – 1906), nas vésperas do aniversario do nacemento do escritor: o 1 de novembro. A gravación permite recuperar a mirada dun dos grandes intelectuais galegos do século XX sobre unha figura fundamental das letras galegas e achegarse á súa personalidade, ao seu pensamento e á dimensión da súa creación literaria.

A presidenta do Consello da Cultura Galega (CCG), Dolores Vilavedra, reuniuse esta mañá co presidente da Xunta de Galicia e presidente de honra do CCG, Alfonso Rueda Valenzuela. Trátase da primeira visita institucional tras o nomeamento de Dolores Vilavedra como presidenta da institución. Durante o encontro abordouse a situación actual da lingua galega, a creación de diversas iniciativas como o Museo das Migracións ou a necesidade de crear máis contidos audiovisuais dirixidos á mocidade, entre outros asuntos.

“Todo é unha cuestión de toma de posición e co que fas contribúes a que se amplíen os espazos de emancipación”. Desta maneira, Margarita Ledo Andión (Castro de Rei, 1951) sintetizou o fío que atravesa a súa traxectoria vital, política e creativa. Na entrevista que lle fixo Mar Mato no marco da xornada “O punto de vista involucrado” reivindicou tamén o pracer de vivir ese compromiso: “E é cuestión de divertirte máis con isto que con calquera outra cousa” apuntou Ledo. Ao longo de todo o día diferentes especialistas contribuíron a revisar, ampliar e traducir a traxectoria desta xornalista, escritora, promotora de publicacións, activista, pioneira do feminismo, ensaísta, profesora e cineasta. A sesión organizada polo Centro de Documentación en Igualdade e Feminismos (CDIF) do Consello da Cultura Galega (CCG) foi gravada e está a disposición da cidadanía na canle de YouTube.

Xornalista, escritora, promotora de publicacións, activista, pioneira do feminismo, ensaísta, profesora e cineasta, Margarita Ledo Andión (Outeiro de Rei, 1951) é unha creadora polifacética cunha traxectoria decisiva para a cultura galega. O Centro de Documentación en Igualdade e Feminismos (CDIF) do Consello da Cultura Galega (CCG) dedícalle este ano a súa xornada “De pioneiras e andainas” baixo o título “O punto de vista involucrado no feito”. Celébrase este xoves, 29 de outubro, e escritoras, cineastas, xornalistas e investigadoras analizarán distintas dimensións do seu traballo, nun programa que contará cunha entrevista coa propia Margarita Ledo Andión. A sesión é presencial pero pode seguirse en directo desde o web corporativo e a canle de YouTube.

A presidenta do Consello da Cultura Galega (CCG), Dolores Vilavedra, compareceu na tarde deste mércores na Comisión 3ª de Economía, Facenda e Orzamentos, do Parlamento de Galicia, no marco das sesións informativas en relación co Proxecto de Lei de Orzamentos. O orzamento da institución para o próximo ano é de 3.531.091 euros, un 4,51%máis que en 2026. Na súa primeira comparecencia como presidenta, Vilavedra detallou que neste ano se contabilizarán 76 actividades, 7 publicacións, 19 informes e porá en rede máis de dous mil fondos documentais relativos ás súas áreas de traballo. Ao tempo, avanzou que para o vindeiro ano a institución explorará novos formatos, reforzará a asesoría con novas liñas de informes e atenderá ás figuras de Carlos Casares, polo seu 25 cabodano, e de Xosé Neira Vilas, homenaxeado co Día das Letras Galegas. Os voceiros dos grupos parlamentarios expresaron o seu recoñecemento ao labor da institución.

O Consello da Cultura Galega acolleu este martes a presentación de Cantares da tía Antonia de Atás, un cancioneiro recompilado por Xosé Lois Foxo, director da Escola Provincial de Gaitas de Ourense, que contribúe á conservación e difusión da memoria musical da Galicia rural. Publicada pola Deputación de Ourense en 2002 e reeditada en 2015, a obra recolle un amplo repertorio de composicións tradicionais que chegaron ata os nosos días grazas á transmisión oral. O vicepresidente do CCG, Alejo Amoedo; o secretario xeral da Lingua, Valentín García; o deputado de Relacións Institucionais da Deputación de Ourense, Rosendo Fernández; a musicóloga, Cristina Asenjo Rodríguez; mais o seu autor, Xosé Lois Foxo, participaron na presentación deste material. Na presentación houbo tamén unha recreación dun cantar con gaita e voz a cargo de Marco Foxo e Ana Belén Rodríguez, profesora de cantoi da Real Banda de Gaitas de Ourense.