Elena Colmeiro: Espazos da materia

Xoves, 30 de outubro de 2014
Elena Colmeiro: Espazos da materia

Esta xornada, dedicada á escultora Elena Colmeiro (Silleda, Pontevedra, 1932), preséntase como unha relectura a unha obra chea de liberdade creativa, fóra de modas e modismos, pero integrada dentro do eido da escultura actual e que achega un estilo propio á realidade da historia da escultura galega contemporánea.

Este encontro adquire unha especial importancia na vontade de revisar o pasado recente da arte contemporánea galega, coa intención de confeccionar un novo relato, de perspectiva actual, acerca desta artista que transcende a escultura para converterse en creadora global: tenaz, intuitiva e incansable procuradora de significados.

Así mesmo, outras voces da plástica e da visualidade artística en Galicia formularán distintas olladas sobre as prácticas artísticas creativas e interpretativas. Un encontro para achegarse á súa interesante xeografía vital e profesional desde a súa propia voz xunto ás de outras artistas e profesionais, co principal obxectivo de falar sobre a práctica artística, sobre os discursos e as narrativas debuxadas polas mulleres nas artes visuais, convincentes e resistentes na práctica actual. Diso trata precisamente a obra de Colmeiro, de empregar vivencias, pulsións e experiencias para medir o inquietante que pode ofrecer o material, dándolle forma, rompéndoo ou modelándoo, unindo realidade e ficción até presentar espazos da súa propia materia.

Conectate o Consello da Cultura Galega en Facebook, Twitter ou comparte esta nova: