Transcripción da Carta de Otero Pedrayo a Cabanillas. 1958 en 28/12/1958
Trasalba 28 de Nadal do 1958
Sr. Dn. Ramón Cabanillas
Cambados
Meu querido e ademirado amigo: Unha aperta ben rexa e verdadeira vai nistas letras ca espranza de un novo ano pra ti ben asoallado de paz e lembranzas. Túa dita e legría é a dos teus amigos. Ti, co teu esprito, podente e ledo como as foulas da ría, nos sostés a todos. Inda no silencio e sin falas alentamos no teu fogar e ti sen reparar nelo cando te sentas á mesa benzoas urbi et orbi os teus amigos.
Sei como ti alentas nas emozoantes festas ergueitas en pórtico da Groria dende o Nadal ós2 Reis. Quen poidera disfroitar da beleza dos teus pensamentos e arelanzas nistes días!
Estiven en Madride dúas semáns de xuís dun tribunal de oposición a cadeiras. Chovía moito e todo andaba embarullado. Soio tiven canseira un día ben cheo en Toledo na exposición de Calros V. Ó3 chegar a Trasalba na noite de Nadal a casa soia e xiada estaba para min alumiada polo teu poema Samos. Deus che pague o ben que nos fixeches a moitos leentes! Eu alentei na ilusión das mañás románicas, dos abrentes remanecendo us de outros no decorrere dos séculos, no balbordo da vida pé das illas de fondura mística e coidei raxadas para min pola primadeira da espranza nesas fermosas montanas galegas bieitas...
Na túa poesía vai rubindo o esprito os seus tempos regoados como na historia trascendente dos homes, deténdose amorosiña pra enxergar o decorrido, non4 esquecendo caridosamente ningunha frol humilde do vieiro, descobrindo ó estilo da música de Bach o eterno en cada latexar do curazón.
Cando o tempo se poña menos bravo irei, si Deus quere, cos días crecedeiros a darche un abrazo e escuitar unhas palabras túas.
Saúdos moi gasalleiros ós fillos e familiares. Lembranzas da miña esposa. Sempre teu vello ademirador e amigo
Ramón Otero Pedrayo
Notas á transcrición
2 No texto pon "dende o Nadal os Reis" e no último parágrafo "Saudos moi gasalleiros os fillos", sen a preposición "a" co artigo. Poño "ós" nos dous casos porque no parágrafo 4º aparece a forma contracta en "ó estilo".
3 No texto pon "O chegar".
4 No texto lese "nos", pero non ten sentido a frase co pronome persoal.
