Arquivo de noticias do CCG

“Xardíns históricos: a protección dun patrimonio cultural” é o título da nova sesión dos Encontros Monográficos co Patrimonio Cultural (EMPC). A cita, organizada pola Sección de Patrimonio e Bens Culturais do Consello da Cultura Galega (CCG), reunirá este martes, 11 de xuño (16:00 horas), diferentes especialistas para abordar os problemas de conservación e valoración dos xardíns históricos como bens culturais. Ricardo Varela é o coordinador desta actividade, que se desenvolverá presencialmente na sede institucional do CCG e que tamén se poderá seguir en directo a través do sitio web e as redes sociais corporativas.

En novembro de 2019 o Consello da Cultura Galega (CCG) botou a andar o Foro Patrimonio e Sociedade, un ambicioso proxecto que tiña como obxectivo propor un cambio na xestión do noso inxente patrimonio. Trinta especialistas de diferentes ámbitos xuntáronse durante mais de ano e medio nun proceso único, deseñado expresamente para integrar a todas as persoas que teñen que ver co sector, desde a sociedade ata os partidos políticos. O resultado desta iniciativa se concreta nunha Guía Práctica que, ademais de recomendar a creación dun Observatorio de Patrimonio, unha comisión de Patrimonio no Parlamento e a elaboración dun Plan Autonómico Patrimonial de Galicia, traza a folla de ruta para a xestión do patrimonio galego nos vindeiros anos. A presidenta do CCG, Rosario Álvarez, e a coordinadora do Foro e mais da Sección de Patrimonio e Bens Culturais, Rebeca Blanco-Rotea, presentaron publicamente esta mañá os resultados deste proceso.

As xornadas sobre “A protección dos camiños históricos en Galicia” iniciadas onte, concluirán na mañá do xoves día 7 no Consello da Cultura Galega analizando a protección dos Camiños de Santiago. Organizadas pola Sección de Patrimonio e Bens Culturais, que coordina Iago Seara, as xornadas chamaron a atención sobre a necesidade de que a Lei 3/1996 de protección do Camiño de Santiago se estenda aos restantes camiños históricos, ou sexa, todos os que serviron a unhas relacións entre os núcleos, previas ao trazado das estradas a partir da segunda metade do século XVIII. Mal poderán estaren protexidos os camiños históricos se non o está debidamente o Camiño de Santiago por antonomasia, como apuntou o profesor Carlos Amoedo Souto, que definiu a Galicia como "primeira potencia polo número de camiños históricos" e "primeira impotencia no tocante á súa desprotección". As sesións foron inauguradas polo presidente do CCG, Ramón Villares e o conselleiro de Cultura, Xesús Vázquez Abad.

Unhas xornadas sobre “A protección dos camiños históricos en Galicia” terán lugar os días 6 e 7 de marzo no Consello da Cultura Galega organizadas pola Sección de Patrimonio e Bens Culturais, que coordina Iago Seara. Trátase de chamar a atención sobre a necesidade de que a Lei 3/1996 de protección do Camiño de Santiago se estensa aos restantes camiños históricos, entende por tales todos os que serviron a unhas relacións entre os núcleos previas ao trazado das estradas a partir da segunda metade do século XVIII.

O Consello da Cultura Galega acolleu hoxe a presentación da “Declaración de Santiago en defensa da conservación do patrimonio cultural galego” e do “Foro do Patrimonio Cultural Galego” como espazo de diálogo entre os profesionais e a Administración. Trátase de iniciativas plantexadas ao abeiro das “III xornadas sobre boas prácticas na conservación do patrimonio cultural”, celebradas o pasado mes de setembro por iniciativa da Escola Superior de Conservación e Restauración de Bens Culturais de Galicia e tres asociacións profesionais do sector, ademais da Sección de Patrimonio e Bens Culturais do Consello da Cultura Galega, requerido como activo cooperador do referido Foro.

A reflexión sobre o valor crítico dos Bens Culturais e a súa formulación, conservación e protección orientou as dúas xornadas de debate que sobre o patrimonio cultural galego convocou os días 11 e 15 de maio o Consello da Cultura Galega, en sesións de mañá e tarde. Organizadas pola Sección de Patrimonio e Bens Culturais, que coordina Iago Seara Morales, as xornadas reuniron expertos de Galicia, Andalucía, Aragón, Madrid e Valencia e continuaron outros encontros que sobre esta temática acolleu o Consello da Cultura en 2008 e 2011. As xornadas reclamaron un inventario oficial do patrimonio e subliñaron a necesidade de non separar o inmaterial do material, "caras dun mesmo poliedro", en expresió do profesor Marcial Gondar.

A Sección de Arquitectura do Consello da Cultura Galega (CCG) presentará este martes, día 7, ás 12:00 horas, as xornadas "A Arquitectura desde Andalucía". Este encontro, que se celebrará o 16, 17 e 18 de xuño, pretende ofrecer por primeira vez en Galicia unha ampla visión da arquitectura andaluza. Con este obxectivo, destacados arquitectos, críticos e investigadores andaluces compartirán con profesionais galegos tres días de debate e reflexión sobre as súas traxectorias profesionais e sobre os seus coñecementos e opinións arredor da arquitectura.

O Consello da Cultura Galega (CCG) presenta este luns, día 24 de xaneiro, a colección de 11 carteis "Arquitectos galegos" e a serie documental "A idea construída" (13 arquitectos), dous achegamentos á obra das máis importantes figuras da arquitectura galega contemporánea. O acto, que se celebrará ás 20´00 horas na delegación do Colexio Oficial de Arquitectos de Galicia en Vigo (rúa Marqués de Valladares, 27), servirá tamén para render homenaxe á obra e á memoria do arquitecto Xosé Bar Boo.

As xornadas "A ARQUITECTURA DESDE MADRID" serán presentadas en rolda de prensa mañá martes, día 14 de decembro, ás 12´00 horas, no salón de actos do Consello da Cultura Galega (CCG). O encontro está organizado pola Sección de Arquitectura do CCG e continúa a liña marcada polos encontros dedicados ás arquitecturas lisboeta, catalana e vasco-navarra celebrados con anterioridade.

As xornadas “A ARQUITECTURA VASCO-NAVARRA” serán presentadas en rolda de prensa mañá martes, día 2 de marzo, ás 12´30 horas, no salón de actos do Consello da Cultura Galega (CCG). As xornadas están organizadas pola Sección de Arquitectura do CCG e continúan a liña marcada polos encontros dedicados ás arquitecturas lisboeta e catalá, celebrados con anterioridade.

A necesidade de reactivar os espacios públicos, como premisa para unha maior calidade de vida, e a integración das periferias nos entornos urbanos foi unha das reflexións suscritas polos relatores das xornadas A ARQUITECTURA DESDE LISBOA, celebradas durante o venres e a mañá do sábado no auditorio do Consello da Cultura Galega, por iniciativa da súa Sección de Arquitectura, que dirixe Iago Seara Morales, coordinador do encontro xunto con Jorge Da Cruz Pinto, profesor da Escola de Arquitectura de Lisboa.