Arquivo de noticias do CCG

A presidenta do Consello da Cultura Galega (CCG), Rosario Álvarez; Paolo Canettieri, director do Dipartimento di Studi Europei Americani e Interculturali da Università di Roma, e Arianna Punzi, decana da Facultad de Lettere e Filosofia, inauguraron hoxe na capital italiana unha nova itinerancia da exposición Afonso X e Galicia, que amosa a conexión galega do Rei Sabio. Tras a inauguración, o comisario, Antoni Rossell, fixo unha visita guiada comentada polo proxecto expositivo, organizado polo CCG coa colaboración da Xunta de Galicia e a Deputación de Ourense.

A Biblioteca do Consello da Cultura Galega acolleu do 5 ao 7 de setembro o curso "Carlos Casares, escritor e intelectual do seu tempo" programado pola Universidad Internacional Menéndez Pelayo (UIMP) e dirixido pola profesora e crítica literaria Dolores Vilavedra. O curso analizou a obra e a faceta intelectual de Carlos Casares (1941-2002) cando se cumpren dez anos do seu pasamento. O lembrado escritor foi tamén o terceiro presidente do Consello da Cultura Galega (1996-2002).

Os IX Encontros para a Normalización Lingüística, organizados polo Centro de Documentación Sociolingüística de Galicia do Consello da Cultura Galega, continuaron esta mañá en Santiago de Compostela abordando o papel que xogará no futuro do idioma a investigación, as institucións da lingua e a promoción do galego no exterior. Estes Encontros, nos que participan máis de 220 especialistas, pretenden ser o foro no que se faga balance da normalización do idioma e sobre todo, no que agromen propostas para un futuro do idioma no que o impulso político, o consenso social e a vertebración de iniciativas van ser factores ineludibles.