Arquivo de noticias do CCG

A presidenta do Consello da Cultura Galega (CCG), Rosario Álvarez, participou esta mañá na sede da institución na inauguración da 22ª edición do simposio anual sobre o libro e a lectura que organiza a Asociación Galega de Editores (AGE). Alí destacou o apoio do CCG á entidade e ofreceu a “dispoñiblidade para desenvolver nos vindeiros meses calquera acción complementaria”. Canda ela estaban Anxo Lorenzo, Secretario xeral de Cultura, que incidiu na “colaboracion coa asociación a través do convenio que manteñen coa AGE e recordou a importancia da distribución e da exportación no sector do libro. Miguel Toval, que era o seu primeiro simposio como presidente da AGE, destacou a importancia da distribución nun momento que “aínsa que somos optimistas pola certa estabilidade, estamos nunha situación moi dificultosa”. O simposio titulado “A distribución do libro galego” analizou os modelos de distribución do libro galego e as liñas de apoio á exportación do libro.

Este 1 de febreiro fanse cen anos do pasamento de Manuel Murguía (O Froxel, Arteixo, 1833 - A Coruña, 1923), figura destacada da cultura galega. A súa vida estivo “marcada pola militancia rexurdimentista, pola implicación no proxecto político-cultural que pretendía restituír a dignidade a Galicia para abrir un horizonte de liberdade”, afirma Xurxo Martínez González, autor da súa entrada no Álbum de Galicia, colección dixital de biografías que mantén o Consello da Cultura Galega (CCG). Alén da biografía do intelectual galeguista, tamén se poden consultar outros materiais, como as epístolas que recibiu da súa dona, Rosalía de Castro, e de Emilia Pardo Bazán, coa que mantivo unha longa inimizade. Tamén se poden consultar os artigos que escribiu en publicacións como El Museo Universal e La Oliva ou o discurso que pronunciou nos Xogos Florais de Tui en 1891.

Hoxe, 25 de abril, conmemórase o aniversario da Revolución dos Cravos en Portugal. Aproveitamos esta efeméride para recuperar a gravación dunha mesa redonda celebrada na Facultade de Xeografía e Historia da Universidade de Santiago de Compostela (USC) na que se falaba das relacións entre Galicia e Portugal. A cita tivo lugar no marco do "Encontro Universitario do Noroeste Peninsular" e nela participaron Ricardo Carballo Calero, Ramón Villares, Ramón Martínez López, Carlos Alberto Ferreira de Almeida e Carlos García Martínez. O presentador daquel acto foi Manuel Martínez Barreiro.

A necesidade dunha estratexia común e a fixación de prioridades para a proxección de Galicia foi unha das conclusións da primeira sesión das xornadas sobre “Poder brando e diplomacia cultural en Galicia” iniciadas hoxe na Illa de San Simón, organizadas polo Consello da Cultura Galega en colaboración co Instituto Galego do Análise e Documentación Internacional (IGADI). Os obxectivos do encontro son a reflexión e o intercambio de ideas a propósito das estratexias a aplicar para promover unha diplomacia cultural galega. No acto inaugural participou Anxo Lorenzo, Secretario Xeral de Cultura da Xunta de Galicia, que apostou pola potenciación da imaxe de marca de Galicia e o fortalecemento das redes no exterior. As sesións concluirán hoxe venres a primeira hora da tarde. As sesións poden seguirse vía streaming en: www.consellodacultura.org