Arquivo de noticias do CCG

O Consello da Cultura Galega estrea un documental sonoro en tres episodios sobre a vida e obra de Castelao na súa nova Plataforma de podcast, Ágora. “Castelao a carón de nós” é o primeiro título dunha serie de producións en formato podcast coas que o CCG quere incrementar a oferta sonora de calidade en lingua galega na rede. Os programas céntranse na figura de Alfonso Daniel Rodríguez Castelao, nunha oportunidade para escoitar as voces expertas sobre a obra literaria e gráfica do autor. O documental está realizado por Arraianos Producións.

En 1923 un grupo de estudantes idealistas, serios e comprometidos coa súa nación puxeron en marcha unha brillante aventura científica, política, e mesmo artística, ao abeiro da universidade. Foi o Seminario de Estudos Galegos (SEG). A importancia daquel proxecto, a súa comparación con entidades análogas e a relevancia do seu legado está presente no volume que vén de editar o Consello da Cultura Galega (CCG) baixo o título Saber de Nós. O Seminario de Estudos Galegos. “É unha obra colectiva con olladas que se cruzan para facer balance e valorar o legado que se foi construíndo” asegurou a presidenta do CCG, Rosario Álvarez, na presentación do volume á que asistiron os dous editores, Henrique Monteagudo e Ramón Villares, máis outros autores participantes como Alfonso Mato ou Francisco Díaz-Fierros. O libro xa se pode descargar desde o web da institución.

San Domingos de Bonaval acolle o vindeiro 7 de xaneiro un acto cívico que abre a celebración da conmemoración do 75 cabodano de Alfonso Daniel Rodríguez Castelao (Rianxo, 1886- Bos Aires, 1950). Diferentes representantes da comisión constituída o pasado 7 de novembro xuntáronse no Consello da Cultura Galega (CCG) este venres para presentar as primeiras accións de programación encamiñadas a poñer a atención sobre a vixencia e o legado da súa figura. A presidenta do CCG, Rosario Álvarez; o presidente da Fundación Castelao, Miguel Anxo Seixas; o director xeral de Cultura, Anxo Lorenzo; o presidente da Real Academia Galega (RAG), Víctor Freixanes; a presidenta do padroado do Museo do Pobo Galego, Concha Losada; xunto con representantes doutras entidades avanzaron as liñas de programación da celebración. Ademais, fixeron un chamamento á cidadanía da participar na celebración dunha personalidade irrepetible de tan alta transcendencia na historia contemporánea de Galicia.

Cando se cumpren 150 anos do nacemento do pintor Francisco Lloréns (A Coruña, 1874 -Madrid, 1948), recoñecido paisaxista e discípulo de Joaquín Sorolla, o Consello da Cultura Galega (CCG) organiza a xornada Francisco Lloréns. Paisaxe e territorio. A xornada, que se inclúe no ciclo Revisando a nosa arte, terá lugar este xoves (a partir das 16:00 horas) no Salón Azul do Edificio Liceo Arquivo do Antigo Reino de Galicia de Betanzos que tratará a vida e obra deste artista. A xornada, coordinada por Rosario Sarmiento, está organizada pola Sección de Creación e Artes Visuais Contemporáneas do CCG coa colaboración do Concello de Betanzos. Non se emite en directo, pero será gravada e subirase posteriormente ao web institucional. A entrada é libre e gratuíta.

O Consello da Cultura Galega (CCG) acolleu esta mañá a constitución da comisión para a conmemoración do 75 aniversario da morte de Alfonso Daniel Rodríguez Castelao, finado en Bos Aires o 7 de xaneiro de 1950. “É unha ocasión propicia para celebrar a vida e a obra dunha personalidade irrepetible e de tan alta transcendencia na historia contemporánea de Galicia”, apuntou a presidenta do CCG, Rosario Álvarez, no inicio deste primeiro encontro que busca unha celebración plural e diversa, aberta a toda a cidadanía. Na xuntanza participaron representantes do Parlamento de Galicia, da Consellería de Cultura, Lingua e Xuventude, das catro deputacións, das tres universidades, da Real Academia Galega, da Real Academia Galega de Belas Artes, do Museo do Pobo Galego, do Museo de Pontevedra, da Fundación Castelao e dos Concellos de Pontevedra, Rianxo e Santiago de Compostela.

A presidenta do Consello da Cultura Galega, Rosario Álvarez, mantivo unha xuntanza co presidente da Fundación Castelao, Miguel Anxo Seixas Seoane, por mor da celebración do 75 aniversario do pasamento de Alfonso Daniel Rodríguez Castelao (Rianxo, 1886- Bos Aires, 1950) que terá lugar en 2025. No marco da reunión acordáronse diferentes vías de colaboración e futuras actividades para conmemorar a efeméride.

“O Seminario de Estudos Galegos (SEG) inaugurou unha nova forma de saber, ao introducir unha metodoloxía e un maior coñecemento global atendendo ao rigor científico” apuntou Francisco Díaz Fierros, coordinador do congreso Saber de Nós, na inauguración desta cita que convoca a destacados especialistas para ofrecer un balance do que significou este movemento no centenario da súa creación. A presidenta do Consello da Cultura Galega (CCG), Rosario Álvarez, destacou tamén a relevancia histórica desde grupo que mudou o coñecemento do país. A cita remata mércores cunha revisión as áreas de actividade nas que o Seminario conseguiu resultados máis tanxibles: a etnografía, a prehistoria e a arqueoloxía, as ciencias, as belas artes e os estudos literarios e a lingua. Sobre o SEG afonda tamén a nova entrega de Proxector, iniciativa que o CCG coa Universidade de Santiago de Compostela que nesta ocasión escolma doce vídeos vencellados ao movemento e os seus membros. A revisión do Seminario compleméntase o vindeiro 24 de outubro con outra xornada que ofrece unha análise en comparación con outros centros análogos no contexto hispánico.

“Saber de nós” é o título do congreso organizado polo Consello da Cultura Galega (CCG), coa colaboración de media ducia de entidades, que pretende facer balance da significación na historia científica, intelectual e cultural de Galicia da creación do Seminario de Estudos Galegos (SEG). Justo Beramendi, Ramón Villares, Henrique Monteagudo son algúns dos participantes nesta cita que arrinca mañá en Santiago. Ademais, no marco desta celebración, o xoves terá lugar a festa popular coa que unha serie de entidades conmemoran a andaina que cen anos atrás deu lugar á creación do seminario.

O 12 de outubro de 1923 un grupo de ilustres estudantes da Universidade de Santiago camiñaron xuntos ata a casa de Rosalía de Castro en Ortoño. Esa andaina derivou na creación do Seminario de Estudos Galegos (SEG), unha institución científica determinante no futuro do país. Cen anos despois, diferentes entidades repiten aquel percorrido cun acto festivo aberto á cidadanía. É un dos actos centrais que conmemora o centenario do SEG e que debullaron esta mañá a presidenta do Consello da Cultura Galega, Rosario Álvarez; a presidenta do Museo do Pobo Galego, Concha Losada; o secretario xeral de Política Lingüística, Valentín García; o presidente da Real Academia Galega, Víctor Freixanes; a alcaldesa de Santiago, Goretti Sanmartín; o alcalde de Ames, Blas García; máis a vicerreitora de Estudantes e Cultura da Universidade de Santiago (USC), Pilar Murias. Alén da festa popular do día 12 de outubro, na véspera (días 10 e 11) terá lugar o congreso «Saber de nós: Cen anos do Seminario de Estudos Galegos», que fará balance da significación na historia científica, intelectual e cultural de Galicia do SEG.

O Álbum de Galicia incorpora hoxe a entrada de Virxinia Pereira (A Estrada, 1884-Madrid, 1969). Ana Acuña asina o texto dunha destacada figura que foi moito máis que a muller de Castelao. A biografía, así como os materiais complementarios que a enriquecen, permiten ver a súa forte personalidade e o seu traballo en prol da causa antifranquista e a defensa da memoria do seu home.

Virxinia Pereira foi moito máis que a muller de Castelao. Foi unha destacada figura antifranquista e tamén o guieiro da memoria do seu home tras a súa morte. Boa parte da súa personalidade e preocupacións poden verse a través do seu epistolario. O Consello da Cultura Galega (CCG) pon desde hoxe á disposición da cidadanía as cartas que intercambiou con Valentín Paz-Andrade, que nos permiten ver, alén da súa personalidade, a complicada constitución do legado do galeguista durante o franquismo. Ademais, a correspondencia vén acompañada dunha reportaxe contextualizadora e do texto “Virxina e Daniel, a complicidade” en que Miguel Anxo Seixas que aborda a relación do matrimonio.

Estivo na Coruña onde xurdiu a formación Cántigas da Terra hai máis de cen anos. Despois foi a Ferrol, berce de Toxos e Froles; pasou por Ourense, onde se xestou a coral De Ruada e despois fixo recalada en Pontevedra e Vigo. A mostra Son de Galicia chega agora a Santiago, á cidade que viu nacer a Cantigas e Agarimos, un dos catro coros cuxa traxectoria nos permite construír o relato de como a música e o baile contribuíron á creación da nosa identidade. A mostra organizada polo Consello da Cultura Galega (CCG) inaugúrase este xoves (20:00 horas) no Museo do Pobo galego. Alí estará a presidenta do CCG, Rosario Álvarez; a vicepresidenta do Padroado do Museo, Concha Losada; Antón Fernández, representante do coro Cantigas e Agarimos; e o comisario, Miguel Anxo Seixas. A exposición poderase ver ata o 3 de decembro.

Toxos e Froles, Cántigas da Terra, De Ruada e mais Cantigas e Agarimos son os catro coros históricos que permanecen activos hoxe en día. Dos seus arquivos constrúese o relato narrativo da exposición Son de Galicia, que recolle o espírito dunha época que sentou a través da música e do baile a nosa identidade. A mostra, organizada polo Consello da Cultura Galega (CCG) coa colaboración de Afundación-Obra Social ABANCA e mais as catro sociedades corais históricas, chega agora a Vigo. Este martes inaugúrase ás 19:30 horas coa presenza da presidenta do CCG, Rosario Álvarez; Paloma Vela, coordinadora adxunta da Área de Cultura de Afundación, e o comisario, Miguel Anxo Seixas. A exposición poderase ver na sede Afundación Vigo ata o 28 de setembro.

Ferrol acolle estes días a exposición do Consello da Cultura Galega (CCG) Son de Galicia, na que se recolle o espírito dunha época que sentou a través da música e do baile a nosa identidade. Como complemento do discurso expositivo, mañá terá lugar un parladoiro no que se afondará no labor que xogaron os coros na divulgación dos símbolos de Galicia. Esta cita contará coa presenza da presidenta do CCG, Rosario Álvarez, e nela participarán Javier Jurado, Eduardo Pardo de Guevara y Valdés, Belén Sáenz-Chas Díaz e o comisario da mostra, Miguel Anxo Seixas. A sesión comeza ás 19:30 horas na sede de Toxos e Froles.

Son de Galicia non é só unha exposición sobre catro formacións musicais que aínda permanecen activas; é unha mostra que recolle o espírito dunha época que sentou a través da música e do baile a nosa identidade. Está organizada polo Consello da Cultura Galega (CCG) e peneira nos arquivos dos catro coros históricos (Toxos e Froles, Cántigas da Terra, Coral De Ruada e mais Cantigas e Agarimos) para reconstruír a historia de Galicia. A exposición, presentada en rolda de prensa esta mañá, inaugúrase no serán (19:00 horas) pola presidenta do CCG, Rosario Álvarez; o director-xerente de Afundación, Pedro Otero; o comisario, Miguel Anxo Seixas; e os representantes dos catro coros. A mostra poderase ver na sede de Afundación da Coruña ata o 26 de xaneiro, desde onde itinerará por outras cidades galegas.

As bibliografías dos irmáns Ramón e Antón Villar Ponte son as primeiras entradas do álbum Irmandades da Fala. Unha iniciativa do Consello da Cultura Galega que pretende difundir dun xeito divulgativo as biografías e materiais de máis de dúas ducias de persoas que formaron parte do movemento. O proxecto está coordinado por Miguel Anxo Seixas Seoane, quen asina un texto que explica o contexto de nacemento das Irmandades da Fala. O Álbum faise visible ao público hoxe, 21 de marzo, ao coincidir coa data na que Ramón Villar Ponte asina o manifesto “Nuestra afirmación regional” que reivindica a problemática do idioma e a necesidade de recuperar o seu uso. O Álbum actualizarase de xeito mensual e conforma algunha das actividades que o Consello da Cultura Galega ten programado para celebrar o centenario deste fenómeno.

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega (CCG) en colaboración coa Fundación “10 de Marzo”, foi inaugurada esta tarde no Centro Cultural “Marcos Valcárcel” da Deputación de Ourense. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega: “O Galo”. No acto inaugural interviron Francisco González, director do Centro Cultural da Deputación; Ricardo Gurriarán; Marcelino Fernández Santiago, xerente do CCG, e Roberto Castro, subdelegado do Goberno en Ourense. A exposición poderá visitarse ata o próximo 9 de xuño.

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega en colaboración coa Fundación “10 de Marzo”, foi inaugurada hoxeo xoves día 10 ás 20 horas no Círculo de las Artes de Lugo. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega: “O Galo”. No acto inaugural interviron Ramón Villares, presidente do Consello da Cultura Galega, Ricardo Gurriarán e José Clemente López Orozco, Alcalde de Lugo. Villares falou do labor dos pioneiros do asociacionismo cultural botando man do "foquismo guevarista": diferentes focos de luz e de transformación capaces de impulsar unha cultura nacioanl galega. A exposición poderá visitarse ata o próximo 3 de febreiro.

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega en colaboración coa Fundación “10 de Marzo”, foi inaugurada hoxe día 3 ás 20 horas na igrexa da Magdalena en Ribadavia. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega: “O Galo”. No acto inaugural intervirán Marcos Blanco Jorge, alcalde de Ribadavia; Ramón Villares, presidente do CCG; Ricardo Gurriarán, comisario, e José Carlos Sierra, director do Museo Etnográfico de Ribadavia. A exposición poderá visitarse ata o próximo 7 de xaneiro.

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega en colaboración coa Fundación “10 de Marzo”, foi inaugurada hoxe na Casa Galega da Cultura (Praza da Princesa, 2) en Vigo. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega “O Galo”. No acto inaugural interviron Ramón Villares, presidente do CCG, Ricardo Gurriarán, Alfonso Zulueta, presidente da Fundación Penzol, e o Alcalde de Vigo, Abel Caballero. A exposición, que conta coa colaboración do Concello de Vigo e o auspicio da Fundación Penzol, poderá visitarse ata o vindeiro 11 de novembro.