Arquivo de noticias do CCG

“Os escolares que cursan bacharelato e, ao mesmo tempo, estudan música, teatro ou danza poden chegar a ter 50 horas de clase semanal. Se iso se traduce ao mundo laboral falariamos case de escravitude”. Así describiu Maximino Zumalave, coordinador da Sección de Música e Artes Escénicas do Consello da Cultura, unha situación que afecta a milleiros de escolares galegos. Para buscar fórmulas que permitan flexibilizar esa carga lectiva realizouse a xornada “Os currícula escolares nos novos plans de estudo: música e artes escénicas”. Unha cita de actualidade xa que o presidente do CCG, Ramón Villares, lembrou na inauguración que “o conselleiro de educación acaba de presentar o proxecto de decreto polo que se regulan os currículos das etapas de ESO e bacharelato adaptados á Lei orgánica para a mellora da calidade educativa (LOMCE)” e que deberán entrar en vigor no vindeiro curso.

O Consello da Cultura Galega organiza mañá a xornada “Os currícula escolares nos novos plans de estudo: música e artes escénicas”, unha cita de actualidade porque pon sobre a mesa unha realidade que afecta a preto de 8600 alumnos de toda Galicia. No vindeiro curso académico 2015-2016, entran en vigor os novos plans da ESO e do bacharelato fixados pola LOMCE, que buscan favorecer eses alumnos que tamén cursan ensinanzas reguladas de música e danza. Neste encontro, que se pode seguir en directo desde o web da institución, preténdese dar a coñecer a situación así como a especificidade das ensinanzas artísticas. O presidente do Consello da Cultura Galega, Ramón Villares; o coordinador da Sección de Música e Artes Escénicas, Maximino Zumalave, e o membro da sección Rodrigo Porral son os encargados da inauguración desta sesión.

Santiago de Compostela, 27 de maio de 2011.- O Consello da Cultura Galega presentou hoxe os cinco libros do método pedagóxico-musical "Paseniño". No acto participan Rosario Álvarez, vicepresidenta do CCG, Maximino Zumalave, coordinador da Sección de Música e Artes Escénicas, Rodrigo Porral e o autor Antonio Cerviño Loira. A iniciativa da Sección de Música e Artes Escénicas pretende, dixo Rosario Álvarez, que os alumnos de grao elemental das especialidades instrumentais poidan utilizar, coñecer e difundir o rico patrimonio musical galego.